അനൂപ് ജേക്കബിനെതിരെ വിജിലന്‍സ് അന്വേഷണം

തൃശൂര്‍: ഭക്ഷ്യ സിവില്‍ സപ്ലൈസ് മന്ത്രി അനൂപ് ജേക്കബിനും കേരള കോണ്‍ഗ്രസ്(ജേക്കബ്) വര്‍ക്കിങ് ചെയര്‍മാന്‍ ജോണി നെല്ലൂരിനുമെതിരെ വിജിലന്‍സ് അന്വേഷണം. സിവില്‍ സപ്ലൈസ് വകുപ്പില്‍ അനധികൃതമായി മൊത്ത വ്യാപാര കേന്ദ്രങ്ങള്‍ അനുവദിച്ചത് ചൂണ്ടിക്കാണിച്ച് സമര്‍പ്പിച്ച ഹര്‍ജിയില്‍ തൃശൂര്‍ വിജിലന്‍സ് കോടതിയാണ് അന്വേഷണത്തിന് ഉത്തരവിട്ടത്.

വിജിലന്‍സിന്റെ തിരുവനന്തപുരം യൂണിറ്റിനാണ് അന്വേഷണച്ചുമതല. ഏപ്രില്‍ 17 നകം റിപ്പോര്‍ട്ട് സമര്‍പ്പിക്കണമെന്നാണ് കോടതിയുടെ നിര്‍ദേശം.ഏപ്രില്‍ 17നകം അന്വേഷണ റിപ്പോര്‍ട്ട് സമര്‍പ്പിക്കണമെന്നും കോടതി നിര്‍ദ്ദേശിച്ചിട്ടുണ്ട്.

അനധികൃതമായി റേഷന്‍ മൊത്തവ്യാപാര ഡിപ്പോ അനുവദിക്കുന്നതിനും ജില്ലാ സപ്ലൈ ഓഫീസര്‍, താലൂക്ക് സപ്ലൈ ഓഫീസര്‍ തുടങ്ങിയ തസ്തികകളിലേക്ക് സ്ഥലംമാറ്റം നല്‍കുന്നതിനുമായി ലക്ഷക്കണക്കിന് രൂപ കൈക്കൂലി വാങ്ങിയെന്നാരോപിച്ച് ഓള്‍ ഇന്ത്യ റേഷന്‍ ഡീലേഴ്‌സ് അസോസിയേഷന്‍ ദേശീയ സെക്രട്ടറി ബേബിച്ചന്‍ മുക്കാടന്‍ ആണ് തൃശ്ശൂര്‍ വിജിലന്‍സ് കോടതി മുമ്പാകെ പരാതി നല്‍കിയത്.

മുന്‍ കോട്ടയം ഡി.എസ്.ഒ. ശ്രീലതയുടെ വെളിപ്പെടുത്തലുകളുടെ അടിസ്ഥാനത്തിലാണ് പരാതി. ശ്രീലതയുമായി നടത്തിയ സംഭാഷണത്തിന്റെ ദൃശ്യങ്ങളടങ്ങിയ സി.ഡി.യും തെളിവായി നല്‍കിയിട്ടുണ്ട്. അനൂപ് ജേക്കബ് പിറവം ഉപതിരഞ്ഞെടുപ്പില്‍ മത്സരിച്ചപ്പോള്‍ ഓരോ റേഷന്‍ മൊത്തവ്യാപാരിയുടെ കൈയില്‍നിന്ന് പതിനായിരം രൂപവീതം പിരിച്ചെടുത്ത് പാര്‍ട്ടി ചെയര്‍മാനെ ഏല്‍പ്പിച്ചതായും ശ്രീലത വെളിപ്പെടുത്തുന്നുണ്ട്. പാര്‍ട്ടി നിര്‍ദേശപ്രകാരമായിരുന്നു ഇത്.

ക്രമവിരുദ്ധമായി റേഷന്‍ മൊത്തവ്യാപാര ഡിപ്പോ അനുവദിച്ചതിന് പാര്‍ട്ടിനേതാക്കള്‍ പണം വാങ്ങിയതായും 50,000 രൂപ തനിക്കും ലഭിച്ചതായും ശ്രീലത സമ്മതിച്ചതായി ബേബിച്ചന്‍ മുക്കാടന്‍ ഹര്‍ജിയില്‍ ആരോപിയ്ക്കുന്നു. അതേസമയം അന്വേഷണത്തെ സ്വാഗതം ചെയ്യുന്നതായി ജോണി നെല്ലൂര്‍ പറഞ്ഞു.