സൂര്യനെല്ലി പെണ്‍കുട്ടിയെ അധിക്ഷേപിച്ച് ജോര്‍ജ്

തിരുവനന്തപുരം: നാക്കിന് ലൈന്‍സന്‍സില്ലാത്ത പിസി ജോര്‍ജ്ജിന്റെ പരാക്രമം സൂര്യനെല്ലി പെണ്‍കുട്ടിയോടും. സൂര്യനെല്ലി കേസില്‍ ആരോപണവിധേയനായ പിജെ കുര്യനെ പിന്തുണച്ച് നടത്തിയ വാര്‍ത്താസമ്മേളനത്തില്‍ പെണ്‍കുട്ടിയെ അവഹേളിയ്ക്കുന്ന രീതിയിലാണ് സര്‍ക്കാര്‍ ചീഫ് വിപ്പ് പിസി ജോര്‍ജ്ജ് സംസാരിച്ചത്.

തന്നെ എത്രപേര്‍ പീഡിപ്പിച്ചുവെന്ന് പെണ്‍കുട്ടിയ്ക്ക് അറിയില്ലെന്നും പിന്നെ എങ്ങനെ പിജെ കുര്യനെ ഓര്‍ത്തിരിയ്ക്കുമെന്നുമായിരുന്നു ജോര്‍ജ്ജിന്റെ ചോദ്യം. പീഡിപ്പിക്കാന്‍ കുര്യന്‍ പോയെന്നു താന്‍ പറഞ്ഞിട്ടില്ല. പെണ്‍കുട്ടിയെ പീഡിപ്പിച്ചതു കുര്യനല്ല. കുര്യന്‍ പാവമാണെന്നും ജോര്‍ജ് വ്യക്തമാക്കി.

അതിനിടെ പി.ജെ.കുര്യനെ സുപ്രീംകോടതി നേരത്തെ തന്നെ കുറ്റവിമുക്തതനാക്കിയതാണെന്ന് കെ.പി.സി.സി പ്രസിഡന്റ് രമേശ് ചെന്നിത്തല പറഞ്ഞു. പരമോന്നത കോടതിയായ സുപ്രീംകോടതി തന്നെ വെറുതെ വിട്ട സാഹചര്യത്തില്‍ അതു സംബന്ധിച്ച് തനിക്ക് യാതൊന്നും പറയാനില്ലെന്നും ചെന്നിത്തല വ്യക്തമാക്കി.

കേസിന്റെ തുടരന്വേഷണത്തിന്റെ സാധ്യതകളെക്കുറിച്ച് തനിക്കറിയില്ല. ഇതു സംബന്ധിച്ച പുതിയ വെളിപ്പെടുത്തലുകള്‍ തന്റെ ശ്രദ്ധയില്‍പെട്ടിട്ടില്ലെന്നും ചെന്നിത്തല വ്യക്തമാക്കി.