മോഡിയ്ക്ക് കലാപത്തില്‍ പങ്കില്ല: കെഎം ഷാജി

പാനൂര്‍: ഗുജറാത്ത് മുഖ്യമന്ത്രി നരേന്ദ്രമോഡിയ്ക്ക് കെഎം ഷാജി എംഎല്‍എയുടെ ക്ലീന്‍ ചിറ്റ്. മാര്‍ച്ച് 6ന് ബുധനാഴ്ച കടവത്തൂരില്‍ നടന്ന മുസ്ലീം ലീഗ് പൊതുയോഗത്തില്‍ സംസാരിക്കുന്നതിനിടെയാണ് ഷാജി മോഡിയെ വാനോളം പുകഴ്ത്തിയിരിക്കുന്നത്. ഗുജറാത്ത് കലാപത്തില്‍ മോഡിയ്ക്ക് പങ്കില്ലെന്നും കലാപത്തില്‍ ഹിന്ദുത്വ അജണ്ടയുണ്ടായിരുന്നില്ലെന്നും എംഎഎല്‍ പറഞ്ഞു.

മുസ്ലീങ്ങളെ മോഡി കൊന്നൊടുക്കിയിട്ടില്ല. ഒരു പള്ളിപോലും ആക്രമിച്ചിട്ടോ നശിപ്പിച്ചിട്ടോ ഇല്ല. ഗുജറാത്തില്‍പോയി അവിടുത്തെ മനുഷ്യാവകാശ പ്രവര്‍ത്തകരുമായി സംസാരിച്ചപ്പോഴാണ് ഇക്കാര്യങ്ങള്‍ മനസിലായത്. കലാപം വ്യവസായികള്‍ സ്‌പോണ്‍സര്‍ ചെയ്തതായിരുന്നു. ഇതില്‍ മതത്തെ മറയാക്കിയെന്നുമാത്രം- ഷാജി പറഞ്ഞു.

ഈ കലാപത്തോടെയാണ് വന്‍ വ്യവസായികള്‍ക്ക് ഗുജറാത്തിന്റെ മണ്ണില്‍ കാലുകുത്താന്‍ കഴിഞ്ഞത്. അവിടെ ഹിന്ദുക്കളും മുസ്ലിങ്ങളും ഐക്യത്തോടെയാണ് കഴിയുന്നത്. മോഡിയെക്കുറിച്ച് മലയാളികളായ മുസ്ലിങ്ങള്‍ക്ക് നല്ലതേ പറയാനുള്ളൂ. വികസന കാര്യത്തില്‍ ഗുജറാത്തിനെ മാതൃകയാക്കാമെന്നതില്‍ സംശയം വേണ്ട- ഷാജി പറഞ്ഞു.

മുസ്ലിം ലീഗ് നേതാക്കളെ വേദിയിലിരുത്തിക്കൊണ്ടായിരുന്നു ഷാജി മോഡിയെ പ്രകീര്‍ത്തിച്ച് സംസാരിച്ചത്.

English summary

Muslim League MLA KM Shaji gave a clean chit to Gujarat CM Narendra Modi over riots and he also said that state can consider Modi's policies as a model for Developments