30 ദിവസം ഇന്റര്‍നെറ്റ് വേഗത കുറയും

ദില്ലി: സമൂദ്രാന്തര്‍ കേബിള്‍ ലൈന്‍ തകര്‍ന്നതിനാല്‍ വരുന്ന 30 ദിവസത്തോളം ഇന്റര്‍നെറ്റ് വേഗതയില്‍ കാര്യമായ കുറവുണ്ടാകും . സിംഗപ്പൂരില്‍ നിന്നും ഫ്രാന്‍സിലേക്ക് നീളുന്ന പ്രാധാന കേബിളിന് ഈജിപ്ത് തീരത്തിനടുത്തുവെച്ചാണ് തകരാറ് സംഭവിച്ചിട്ടുള്ളത്. ഇന്ത്യയടക്കം 14 രാജ്യങ്ങളെ നേരിട്ട് ബാധിക്കുന്ന വിഷയമാണിത്. ഏഷ്യയെയും യൂറോപ്പിനെയും ബന്ധിപ്പിക്കുന്ന മറ്റൊരു കേബിള്‍ ലൈനിനും ഭാഗികമായി കേടുപാടുണ്ടായിട്ടുണ്ട്.

രാജ്യത്തെ ഒട്ടുമിക്ക ഇന്റര്‍നെറ്റ് ദാതാക്കളെയും ബാധിക്കുന്ന കാര്യമാണെങ്കിലും ഭാരതി എയര്‍ടെല്‍, ടാറ്റാ കമ്യൂണിക്കേഷന്‍, ബിഎസ്എന്‍എല്‍, എംടിഎന്‍എല്‍ സേവനങ്ങള്‍ ഉപയോഗിക്കുന്നവരായിരിക്കും ഏറ്റവും കൂടുതല്‍ പ്രയാസപ്പെടുക.

എത്രമാത്രം കേടുപാടുകളുണ്ടായിട്ടുണ്ടെന്ന് പരിശോധിച്ചുവരികയാണ്. ഇന്റര്‍നെറ്റ് വേഗത ഇന്ത്യയിലെ പ്രവര്‍ത്തനങ്ങളെ എങ്ങനെ ബാധിക്കുമെന്നറിയണമെങ്കില്‍ തിങ്കളാഴ്ച വരെ കാത്തിരിക്കേണ്ടി വരും. വ്യാഴം, വെള്ളി, ശനി, ഞായര്‍ ദിവസങ്ങള്‍ അവധിയായതിനാല്‍ ഡാറ്റാ ട്രാഫിക് കുറവായിരുന്നു.

അത്‌ലാന്റാ റൂട്ടിനു പകരം പസഫിക് റൂട്ടിലേക്ക് ട്രാഫിക് മാറ്റാന്‍ ഇന്ത്യന്‍ കമ്പനികള്‍ ശ്രമം തുടങ്ങിയിട്ടുണ്ട്. എന്നാല്‍ ഇതുകൊണ്ട് വലിയ കാര്യമില്ലെന്നാണ് വിദഗ്ധരുടെ അഭിപ്രായം. കൂടുതല്‍ ട്രാഫിക് താങ്ങാനുള്ള ശേഷി ആ ലൈനിനില്ലാത്തതാണ് കാരണം. ഇന്ത്യയെ കൂടാതെ മലേഷ്യ, തായ്‌ലാന്‍ഡ്, ബംഗ്ലാദേശ്, ശ്രീലങ്ക, പാകിസ്താന്‍, ടുണീഷ്യ, അള്‍ജീരിയ, യുഎഇ എന്നീ രാജ്യങ്ങളും സിംഗപ്പൂര്‍-ഫ്രാന്‍സ് ലൈനിലൂടെയാണ് പ്രാധാനമായും ഡാറ്റാ ട്രാന്‍സ്ഫര്‍ നടത്തുന്നത്.

English summary

Browsing speeds were likely to fall significantly in the coming days, even as they were unable to provide a timeframe as to when the problem will be resolved.