ജോക്കികളെ പീഡിപ്പിച്ചു; എഐആറില്‍ സസ്‌പെന്‍ഷന്‍

ദില്ലി: റേഡിയോ ജോക്കികളെ പീഡിപ്പിച്ച ഉന്നത ഉദ്യോഗസ്ഥരെ ആകാശവാണിയില്‍ നിന്നും സസ്‌പെന്‍ഡ് ചെയ്തു. റേഡിയോ ജോക്കികളായ പെണ്‍കുട്ടികളുടെ പരാതിയെ ത്തുടര്‍ന്നാണ് ഉയര്‍ന്ന ഉദ്യോഗസ്ഥരെ സസ്‌പെന്‍ഡ് ചെയ്തത്. പ്രസാര്‍ ഭാരതിയാണ് നടപടിയെടുത്തത്. ജോലി വീതം വെച്ച് കിട്ടുന്നതിനും സമയത്ത് ശമ്പളം ലഭിക്കുന്നതിനും ഉന്നത ഉദ്യോഗസ്ഥര്‍ക്ക് ലൈംഗികമായി വിധേയരാക്കുന്നു എന്നായിരുന്നു പരാതി.

സംഭവവുമായി ബന്ധപ്പെട്ട് ആകാശവാണി ദില്ലി ഡപ്യൂട്ടി ജനറല്‍ എസ് എല്‍ ബാജ്‌പേയിക്ക് കാരണം കാണിക്കല്‍ നോട്ടീസ് നല്‍കി. ഓള്‍ ഇന്ത്യാ റേഡിയോ ഗോള്‍ഡ് ചാനലിന്റെ തലവനെ സ്ഥാനത്ത് നിന്നും സസ്‌പെന്‍ഡ് ചെയ്തു. ഡ്യൂട്ടി ഓഫീസര്‍മാരായ എന്‍ കെ വര്‍മ, ഷെല്ലി എന്നിവരെ പിരിച്ചുവിട്ടു. പീഡനക്കേസിലെ അന്വേഷണത്തെ ബാധിക്കാതിരിക്കാന്‍ വേണ്ടിയാണ് ഇവരെ പുറത്താക്കിയത്.

റേഡിയോ ജോക്കികളുടെ പരാതിയില്‍ ഉടന്‍ അന്വേഷണം നടത്താന്‍ വാര്‍ത്താ വിതരണ പ്രക്ഷേപണ മന്ത്രാലയം അന്വേഷണത്തിന് ഉത്തരവിട്ടു. അന്വേഷണത്തിന് ദേശീയ വനിതാ കമ്മീഷനും ആവശ്യപ്പെട്ടിട്ടുണ്ട്. ജോക്കികളുടെ സംഘടന വാര്‍ത്താ വിതരണ പ്രക്ഷേപണ മന്ത്രാലയത്തിനും വനിതാ കമ്മീഷനംു പരാതി നല്‍കുകയായിരുന്നു.

ആകാശവാണിയുടെ സല്‍പ്പേരിന് കളങ്കം വരുത്തുന്ന പീഡന പരമ്പര രണ്ടുവര്‍ഷത്തിലധികമായി നടന്നുവരികയാണ്. 35 ലധികം പെണ്‍കുട്ടികളാണ് പരാതിയുമായി രംഗത്തെത്തിയത്.

English summary

AIR top officials suspended over sexual allegation in Delhi.