ഐപിഎല്‍: 21കാരന്‍ ഒരു ദിവസം നേടുന്നത് 10 കോടി

റായ്പൂര്‍: ഇന്ത്യന്‍ പ്രീമിയര്‍ ലീഗ് ക്രിക്കറ്റ് കളി കണ്ട് ആനന്ദിക്കുന്നവര്‍ കേട്ടാല്‍ ഞെട്ടുന്ന വാര്‍ത്തയാണ് ഛത്തീസ്ഗഡിലെ റായ്പൂരില്‍ നിന്നും പുറത്തുവരുന്നത്. രണ്ട് ലക്ഷം രൂപ കൊടുത്ത് ബെറ്റിങ് കമ്പനിയുടെ ഫ്രാഞ്ചൈസി തുറന്ന മുഹമ്മദ് സിദ്ദിഖി എന്ന 21കാരന്‍ ഐപിഎല്‍ മത്സരം നടക്കുന്ന ഓരോ ദിവസവും പത്തുകോടി രൂപവീതമാണ് ശേഖരിക്കുന്നത്.

സംസ്ഥാനത്തെ 28 കേന്ദ്രങ്ങളില്‍ ഓഫിസുകള്‍ തുറന്നുകൊണ്ടുള്ള വിപുലമായ വാതുവെപ്പിന് റായ്പൂരിലുള്ള ഇരുനില കെട്ടിടമാണ് സിദ്ദിഖി ഉപയോഗിച്ചിരുന്നതെന്ന് പോലിസ് പറയുന്നു. അമര്‍ ഗാവ്‌ലി, വാസു കെവാല്‍രമണി എന്നീ രണ്ടു സഹായികളും ഇയാള്‍ക്കുണ്ടെന്ന് എഎസ്പി ശ്വേതാ സിന്‍ഹ പറയുന്നു.

ഈ കണ്‍ട്രോള്‍ റൂമിനെ കുറിച്ച് ഒരാള്‍ പോലിസിന് ഒറ്റികൊടുക്കുകയായിരുന്നു. തുടര്‍ന്ന് പോലിസ് നടത്തിയ തിരച്ചിലില്‍ പണവും മറ്റു രേഖകളും പിടിച്ചെടുത്തു. 5000 രൂപ നിക്ഷേപിക്കുന്ന ഏതൊരാള്‍ക്കും വാതുവെപ്പില്‍ പങ്കെടുക്കാം. സിദ്ദിഖി രണ്ടു ലക്ഷം രൂപ ഫീസായി കമ്പനിക്ക് നല്‍കേണ്ടതുണ്ട്. പക്ഷേ, ബെറ്റിങ് കമ്പനിയെ കുറിച്ച് അധികമൊന്നും അറിയില്ലെന്നാണ് സിദ്ദിഖി പോലിസിനോട് പറഞ്ഞത്. ഫോണിലൂടെയുള്ള ബന്ധം മാത്രമാണുള്ളത്.

English summary

Chhattisgarh Police has busted a network of bookies in the capital city nabbing three people who ran the franchise.