ഹാള്‍ടിക്കറ്റില്‍ കാമുകിയുടെ പേര്; കാമുകന്റെ പടം

മുംബൈ: കാമുകിയുടെ ഹാള്‍ടിക്കറ്റില്‍ സ്വന്തം ഫോട്ടോ ഒട്ടിച്ച് പരീക്ഷയെഴുതിയ വിരുതനെ പിടികൂടി. മുംബൈയിലാണ് സംഭവം. എല്‍ എല്‍ ബി ഒന്നാം വര്‍ഷ പരീക്ഷാ ഹാളിലാണ് പെണ്‍കുട്ടിയുടെ പേരും ആണ്‍കുട്ടിയുടെ ഫോട്ടോയുമുള്ള ഹാള്‍ടിക്കറ്റുമായി പരീക്ഷയെഴുത്ത് നടന്നത്. പല്‍ഘാറിലെ ലോ കോളേജ് വിദ്യാര്‍ത്ഥിയായ ജതീഷ് മാലിയാണ് പരീക്ഷയില്‍ ക്രമക്കേട് നടത്തിയതിന് പിടിയിലായത്. 22 കാരനായ ഇയാളെ കോളേജ് അധികൃതര്‍ പോലീസില്‍ ഏല്‍പ്പിച്ചു.

കാമുകി പരീക്ഷയ്ക്ക് ശരിക്ക് പഠിക്കാത്തതുകൊണ്ടാണ് താന്‍ രക്ഷകന്റെ വേഷം കെട്ടി പരീക്ഷാഹാളിലെത്തിയതെന്ന് ജതീഷ് മാലി പോലീസിനോട് പറഞ്ഞു. ജലദോഷം കാരണം കാമുകിയായ ശ്വേത വിദ്യയ്ക്ക് പരീക്ഷയ്ക്ക് പഠിക്കാന്‍ കഴിഞ്ഞില്ല. അതുകൊണ്ട മാലി സഹായിക്കുകയായിരുന്നു. ശ്വേതയുടെ ഹാള്‍ ടിക്കറ്റിലെ ഫോട്ടോ ഇളക്കിമാറ്റി സ്വന്തം ഫോട്ടോ ഒട്ടിച്ചാണ് മാലി പരീക്ഷ എഴുതാനെത്തിയത്.

മാലിയെ കണ്ട് സംശയം തോന്നിയ ഇന്‍വിജിലേഷന്‍ ഓഫീസര്‍ പരിശോധിച്ചപ്പോഴാണ് പെണ്‍കുട്ടിയുടെ പേരും ആണ്‍കുട്ടിയുടെ ഫോട്ടോയുമാണ് ഹാള്‍ടിക്കറ്റില്‍ ഉള്ളതെന്ന് മനസ്സിലായത്. തുടര്‍ന്ന് അധികൃതരെ അറിയിക്കുകയും ഇയാളെ പോലീസിന് കൈമാറുകയുമായിരുന്നു. പ്രിവന്‍ഷന്‍ ഓഫ് മാല്‍പ്രാക്ടീസസ് അറ്റ് യൂണിവേഴ്‌സിറ്റി എക്‌സാമിനേഷന്‍ ആക്ട് പ്രകാരമാണ് ഇയാള്‍ക്കെതിരെ കേസെടുത്തത്.

പരീക്ഷ എഴുതിക്കൊടുക്കുന്നതിന് പ്രതിഫലമായി മാലി പണമോ മറ്റെന്തിങ്കിലുമോ സ്വീകരിച്ചിട്ടുണ്ടോ എന്ന് പരിശോധിച്ചുവരികയാണെന്ന് പോലീസ് അധികൃതര്‍ അറിയിച്ചു. കാമുകിയായ ശ്വേത വിദ്യയെ പോലീസ് അന്വേഷിച്ചുവരികയാണ്.

English summary

year old law student arrested in Mumbai for malpractice in LLB exam.