വാഹനത്തിന് തീപിടിച്ച് വധുവുംകൂട്ടുകാരികളും മരിച്ചു

സാന്‍ ഫ്രാന്‍സിസ്‌കോ: വിവാഹഘോഷയാത്രയ്ക്കിടെ വാഹനത്തിന് തീപിടിച്ച് വധുവും സുഹൃത്തുക്കളും മരിച്ചു. കാലിഫോര്‍ണിയയിലാണ് ദാരുണമായ സംഭവം നടന്നത്. ഞായറാഴ്ച നടന്ന വിവാഹ ഘോഷയാത്രയില്‍ വധുവും കൂട്ടുകാരികളും സഞ്ചരിച്ച വാഹനത്തിന് തീപിടിയ്ക്കുകയായിരുന്നു. വധുവും നാല് കൂട്ടുകാരികളുമാണ് മരിച്ചത്, വാഹനത്തിന്റെ ഡ്രൈവറും അതിലുണ്ടായിരുന്ന മറ്റ് നാല് സ്ത്രീകളും രക്ഷപ്പെട്ടു.

ഫിലീപ്പീന്‍സ് സ്വദേശിനിയായ നെറീസ ഫോജാസിന്റെ(31) വിവാഹത്തോടനുബന്ധിച്ചാണ് ഘോഷയാത്ര നടന്നത്. വധു മരിച്ചുവെന്നകാര്യം അവരുടെ സഹോദരിയെ ഉദ്ധരിച്ചുകൊണ്ട് ദി സാന്‍ഫ്രാന്‍സിസ്‌കോ ക്രോണിക്കിളാണ് റിപ്പോര്‍ട്ട് ചെയ്തിരിക്കുന്നത്. മറിച്ച സ്ത്രീകളെല്ലാം മുപ്പതിനും നാല്‍പ്പതിനും മധ്യേ പ്രായമുള്ളവരാണ്.

സാന്‍ ഫ്രാന്‍സിസ്‌കോയുടെ തെക്കുഭാഗത്തുസ്ഥിതിചെയ്യുന്ന സാന്‍ മാറ്റിയോയിലാണ് അപകടം നടന്നത്. അപകടത്തിന്റെ കാരണം വ്യക്തമായിട്ടില്ലെന്നാണ് കാലിഫോര്‍ണിയ ഹൈവേ പട്രോള്‍ ഓഫീസര്‍ ജെയിംസ് ഈവന്‍ പറയുന്നത്. വാഹനങ്ങള്‍ തമ്മില്‍ കൂട്ടിയിടി ഉണ്ടായിട്ടില്ലെന്നും വധു സഞ്ചരിച്ച വാഹനത്തിന് മാത്രം തീപിടിച്ചതിന്റെ കാരണം അജ്ഞാതമാണെന്നും ഓഫീസര്‍ അറിയിച്ചു.

English summary

A bride and four members of her bridal shower burned to death in a horrific accident, in California.