പാക് അംപയര്‍ റൗഫ് ഒത്തുകളിച്ചെന്ന് മുന്‍കാമുകി

Updated: Friday, May 24, 2013, 11:51 [IST]

മുംബൈ: കളിക്കാര്‍ക്ക് മാത്രമല്ല, അംപയര്‍മാര്‍ക്കും ഒത്തുകളി സംഘവുമായി ബന്ധമുണ്ടെന്ന് ആരോപണം. പാകിസ്ഥാന്‍ സ്വദേശിയും ഐ പി എല്ലിലെ സ്റ്റാര്‍ അംപയര്‍മാരില്‍ ഒരാളുമായ വിവാദ നായകന്‍ ആസാദ് റൗഫിന് ഒത്തുകളിക്കാരുമായി ബന്ധമുണ്ടെന്നാണ് പുതിയ വെളിപ്പെടുത്തല്‍. മുന്‍ കാമുകിയും മുംബൈയിലെ മോഡലുമായ ലീന കപൂറാണ് ആസാദ് റൗഫിനെതിരെ ആരോപണവുമായി രംഗത്ത് വന്നത്.

നേരത്തെ ആസാദ് റൗഫ് തന്നെ ലൈംഗികമായി പീഡിപ്പിച്ചു എന്ന പരാതിയിലൂടെ ലീന കപൂര്‍ പ്രശസ്തയായിരുന്നു. ശ്രീലങ്കയിലെ പബ്ബില്‍വച്ച് ആസാദ് റൗഫ് വാതുവെപ്പ് സംഘങ്ങള്‍ എന്നു സംശയിക്കുന്ന ആളുകളുമായി ബന്ധപ്പെട്ടിരുന്നു എന്നാണ് ലീന കപൂറിന്റെ വെളിപ്പെടുത്തല്‍.

ഐ പി എല്ലിലെ ഒത്തുകളി വിവാദത്തിന്റെ പശ്ചാത്തലത്തില്‍ ഈ വെളിപ്പെടുത്തല്‍ വിവാദമാകാനാണ് സാധ്യത. ആസാദ് റൗഫ് വാതുവെപ്പ് സംഘങ്ങളില്‍ നിന്നും സമ്മാനങ്ങള്‍ സ്വീകരിച്ചതായി നേരത്തെ തന്നെ റിപ്പോര്‍ട്ടുകള്‍ ഉണ്ടായിരുന്നു. എന്ത് പ്രത്യുപകാരമാണ് ആസാദ് റൗഫ് ഇവര്‍ക്ക് ചെയ്തുകൊടുത്തതെന്ന അന്വേഷണത്തിലേക്ക് ഇപ്പോഴത്തെ ആരോപണം വഴിവെച്ചേക്കുമെന്നാണ് കരുതുന്നത്.

2012 സെപ്റ്റംബറിലാണ് റൗഫ് തന്നെ ലൈംഗികമായി പീഡിപ്പിച്ചു എന്ന പരാതിയുമായി ലീന കപൂര്‍ രംഗത്തുവന്നത്. വിവാഹ വാഗ്ദാനം നല്‍കി തന്നെ ലൈംഗികമായി ഉപയോഗിക്കുകയായിരുന്നു എന്നാണ് എഴുതിനല്‍കിയ പരാതിയില്‍ മോഡല്‍ ആരോപിച്ചത്. എന്നാല്‍ ഇക്കഴിഞ്ഞ ഫെബ്രുവരിയില്‍ ഈ പരാതി ലീന കപൂര്‍ പിന്‍വലിച്ചിരുന്നു.