റിപ്പര് ജയില് ചാടി
പൂജപ്പുര സെന്ട്രല് ജയിലില് നിന്നും ഞായറാഴ്ച രാത്രിയാണ് റിപ്പര് ജയാനന്ദനും പ്രകാശും രക്ഷപ്പെട്ടത്. ഇതാദ്യമായല്ല റിപ്പര് ജയാനന്ദന് തടവുചാടുന്നത്. നേരത്തെ കണ്ണൂര് സെന്ട്രല് ജയിലില് നിന്നും ഇയാള് തടവുചാടിയിരുന്നു. ആഴ്ചകള്ക്ക് ശേഷമാണ് അന്ന് ഇയാളെ പിടികൂടാന് പോലീസിന് സാധിച്ചത്.
കണ്ണൂരുലെ തടവുചാട്ടത്തിന് ശേഷം വിയ്യൂരില് കഴിയുമ്പോഴും ജയാനന്ദന് തടവുചാടാനുള്ള ശ്രമം നടത്തിയിരുന്നു. സുരക്ഷ മുന്നിര്ത്തിയാണ് ഇയാളെ പൂജപ്പുരയിലെ സെന്ട്രല് ജയിലില് പ്രവേശിപ്പിച്ചത്. എന്നാല് ഇവിടെയും പോലീസിനെ പറ്റിച്ച് ഇയാള് രക്ഷപ്പെട്ടു. ജയാനന്ദനെ കണ്ടെത്താനായി പോലീസ് ഊര്ജ്ജിതമായ ശ്രമം ആരംഭിച്ചു.
തൃശ്ശൂര് പള്ളിപ്പുറം സ്വദേശിയാണ് റിപ്പര് എന്ന് വിളിപ്പേരുള്ള ജയാനന്ദന്. ഇരട്ടക്കൊലപാതകം ഉള്പ്പെടെ 14 കൊലക്കേസുകള് ഇയാളുടെ പേരിലുണ്ട്. കൂടാതെ നിരവധി കവര്ച്ചാക്കേസുകളിലും പ്രതിയാണ് ഇയാള്. വധശിക്ഷയ്ക്ക് വിധിക്കപ്പെട്ട് ജയിലില് കഴിയുകയായിരുന്നു ജയാനന്ദന്.