ഓണം കഴിഞ്ഞാല്‍ ശ്രീശാന്തിന് മിന്നുകെട്ട്

Updated: Wednesday, June 19, 2013, 17:49 [IST]

കൊച്ചി: ക്രിക്കറ്റിലെ വിവാദങ്ങളെല്ലാം തല്‍ക്കാലം ഒതുങ്ങിയതുപോലെയാണ്. കേസും കൂട്ടങ്ങളും തല്‍ക്കാലം പ്രശ്‌നങ്ങളൊന്നും ഉണ്ടാക്കുന്നില്ല. ജയിലും കോടതിയും ബഹളങ്ങളുമില്ല. പതിയെ കളിക്കളത്തിലേക്കും ജീവിതത്തിലേക്കും തിരിച്ചുവരാനുള്ള തയ്യാറെടുപ്പിലാണ് മലയാളി ഫാസ്റ്റ് ബൗളര്‍ എസ് ശ്രീശാന്ത്.

ഓണം കഴിഞ്ഞാലുടന്‍ തന്റെ വിവാഹമുണ്ടാകും എന്നാണ് ശ്രീ വെളിപ്പെടുത്തുന്നത്. നേരത്തെ ശ്രീശാന്തുമായി ചുറ്റിപ്പറ്റി ഒട്ടേറെ പെണ്‍കുട്ടികളുടെ പേരുകള്‍ പറഞ്ഞുകേട്ടിരുന്നു. സിനിമാ താരം ലക്ഷ്മി റോയി ആയിരുന്നു ഇവരില്‍ ഏറ്റവും കൂടുതല്‍ ശ്രദ്ധ നേടിയത്. എന്നാല്‍ ഇവരൊന്നുമല്ല, ജയ്പൂരിലുള്ള രാജകുടുംബത്തിലെ പെണ്‍കുട്ടിയാണ് ശ്രീശാന്തിന് വധുവാകുക എന്നായിരുന്നു ഒടുവിലത്തെ കഥ.

ശ്രീ ജയിലിലായിരുന്നപ്പോളും ജയ്പൂര്‍ കുട്ടി ശ്രീശാന്തുമായി ബന്ധപ്പെട്ടിരുന്നു എന്നും കുട്ടിയുടെ അച്ഛന്‍ താരത്തെ കാണാനായി ജയിലില്‍ എത്തി എന്നും റിപ്പോര്‍ട്ടുകള്‍ ഉണ്ടായിരുന്നു. എന്നാല്‍ ഇതാദ്യമായാണ് ശ്രീശാന്ത് വിവാഹക്കാര്യത്തെക്കുറിച്ച് പ്രതികരിക്കുന്നത്. ഐ പി എല്‍ മത്സരങ്ങള്‍ക്ക് മുന്‍പ് തന്നെ വിവാഹക്കാര്യം നിശ്ചയിച്ചിരുന്നത്രെ.

ശബരിമല തീര്‍ത്ഥാടനത്തിന് ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു ശ്രീശാന്ത്. ഇനിയും കുറെ ക്ഷേത്രങ്ങള്‍ സന്ദര്‍ശിക്കാനുണ്ട്. ഉടന്‍ തന്നെ പരിശീലനം തുടങ്ങാനാണ് ശ്രമം. വിലക്കുള്ളതിനാല്‍ കേരള ക്രിക്കറ്റ് അസോസിയേഷന്റെ സൗകര്യങ്ങള്‍ ശ്രീക്ക് ഉപയോഗിക്കാനാവില്ല. സ്വന്തമായി പ്രാക്ടീസ് തുടങ്ങാനാണ് ശ്രീശാന്തിന്റെ തീരുമാനം.