അബുദാബിയില്‍ നിന്ന് ദുബായിലേക്ക് തീവണ്ടി 2017ല്‍

ദുബായ്: അബുദാബിയെയും ദുബായിയെയും ബന്ധിപ്പിച്ചകൊണ്ടുള്ള റയില്‍വെ അടുത്ത അഞ്ച് വര്‍ഷത്തിനുള്ളല്‍ യാഥാര്‍ത്ഥ്യമാവുമെന്ന് യുഎഇ റെയില്‍വെ അധികൃതര്‍ അറിയിച്ചു. 2013 അവസാനമാവുമ്പോഴേക്കും ഇപ്പോള്‍ പുരോഗമിച്ചു കൊണ്ടിരിക്കുന്ന ആദ്യഘട്ട നിര്‍മ്മാണ പ്രവര്‍ത്തനം പൂര്‍ത്തിയാക്കും. 2009 ലാണ് പദ്ധതിക്ക് തുടക്കം കുറിച്ചത്.

2017 ല്‍ അബുദാബിയില്‍ നിന്ന് ദുബായിലേക്കുള്ള തീവണ്ടി ഓടി തുടങ്ങുമെന്നും തൊട്ടടുത്തവര്‍ഷം 2018ല്‍ 1,200 കിലോമീറ്റര്‍ വരെയുള്ള റെയില്‍വെ ബന്ധങ്ങള്‍ സ്ഥാപിക്കാന്‍ കഴിയും എന്നാണ് പ്രതീക്ഷ എന്നും അധികൃതര്‍ അറിയിച്ചു.

2013 ഏപ്രിലില്‍ തീവണ്ടിയുടെ എന്‍ജിന്‍ എത്തിയെന്നും നേരത്തെ നിശ്ചയിച്ചതു പ്രകാരം വര്‍ഷാവസാനം ഹബ്ഷാനില്‍ നിന്ന് റുവാഷിലേക്ക് ആദ്യ ട്രെയിന്‍ ഇറക്കുമെന്നും ഇതിഹാദ് റെയില്‍വെ അധികൃതര്‍ അറിയിച്ചു. അബുദാബി, അല്‍ഐന്‍, ദുബായ്, ഷാര്‍ജ, ഫുജയ്‌റ, റസ് അല്‍ ഖയ്മ, കോര്‍ ഫക്കാന്‍ എന്നിവിടങ്ങളെ ബന്ധിപ്പിച്ചു പത്ത് ബില്യണ്‍ ഡോളറിന്റെ പദ്ധതിയാണ് 2018 നടക്കാനിരിക്കുന്നത്.

റെയില്‍ മാര്‍ഗമുള്ള ദീര്‍ഘയാത്രയ്ക്ക് ഇത് ഒരു തുടക്കം മാത്രമാണെന്നും അന്താരാഷ്ട്രതലത്തിന്‍ യുഎഇയെ മറ്റ് പശ്ചിമേഷ്യന്‍ രാജ്യങ്ങളുമായും ഇതര ഏഷ്യന്‍ രാജ്യങ്ങളുമായും യൂറോപുമായും ബന്ധിപ്പിക്കാനുള്ള പദ്ധതികള്‍ക്ക് തുടക്കം കുറിക്കുമെന്നും ഇതിഹാദ് റെയില്‍വെ അധികൃതര്‍ അറിയിച്ചു.

English summary

2017: Abu Dhabi to Dubai by train. Etihad Rail on track for stage one completion by year-end.