സരിതയെ വിദേശത്തേക്ക് രക്ഷപ്പെടുത്താന്‍ ശ്രമംനടന്നു

By Aswathi

Updated: Monday, July 15, 2013, 9:25 [IST]

തിരുവനന്തപുരം: സോളാര്‍ തട്ടിപ്പു കേസിലെ മുഖ്യ പ്രതി സരിത എസ് നായരെ അറസ്റ്റ് ചെയ്യുന്നതിനു മുമ്പ് വിദേശത്തേക്ക് കടത്താന്‍ ശ്രമിച്ചതായി സരിതയുടെ മുന്‍ഡ്രൈവര്‍ വെളിപ്പെടുത്തി. തട്ടിപ്പു പുറത്തായതോടെ സരിതയെ ഗള്‍ഫിലേക്ക് കടത്താനായിരുന്നു ശ്രമമെന്ന് ശ്രീജിത് പറഞ്ഞു

ജോപ്പനും തോമസ് കുരുവിളയും അടക്കമുള്ളവരാണ് ഇതിനുള്ള ശ്രമം നടത്തിയതെന്നും ശ്രീജിത്ത് വെളിപ്പെടുത്തി. പക്ഷേ നേരത്തെയുള്ളകേസുകളുമായി ബന്ധപ്പെട്ട് സരിതയുടെ പാസ്‌പോര്‍ട്ടും മറ്റും നിയമക്കുരുക്കിലായതിനാല്‍ ഈ രക്ഷപ്പെടുത്തല്‍ ശ്രമംപരാജയപ്പെടുകയായിരുന്നത്രെ. തന്റെ ആരോപണങ്ങള്‍ക്ക് എന്തെങ്കിലും തെളിവ് ഹാജരാക്കേണ്ടതായിട്ടുണ്ടോ എന്ന് ശ്രീജിത് ചോദിച്ചു.

ബിജു രാധാകൃഷ്ണന്‍ നടി മുക്തയുടെ വീട്ടില്‍ പോയിട്ടുണ്ടെന്നും മുക്തയുടെ സഹോദരിക്ക് ടീം സോളാറിന്റെ തിരുവനന്തപരത്തെ ഓഫീസില്‍ജോലി നല്‍കിയെന്നതുമായ വെളിപ്പെടുത്തല്‍ നടത്തിയതും സരിതയുടെ ഡ്രൈവറാണെന്ന് റിപ്പോര്‍ട്ടുകള്‍ വന്നിരുന്നു.

അതേസമയം, സോളാര്‍ തട്ടിപ്പുമായി ബന്ധപ്പെട്ട വാര്‍ത്ത അന്താരാഷ്ട്ര തലത്തില്‍ ശ്രദ്ധ നേടി. യുകെ ആസ്ഥാനമായ ഡെയ്‌ലി മെയിലില്‍സോളാര്‍ തട്ടിപ്പുമായി ബന്ധപ്പെട്ട വാര്‍ത്ത പ്രസിദ്ധീകരിച്ചിരിക്കുകയാണ്. സോളാര്‍ വിവാദത്തിലായ ഉമ്മന്‍ചാണ്ടിക്ക് കോണ്‍ഗ്രസിന്റെ പിന്തുണ എന്ന തലക്കെട്ടോടു കൂടിയാണ് വാര്‍ത്ത.