ലാദനും കസബിനുംവേണ്ടി പാകിസ്ഥാനില്‍ പ്രാര്‍ത്ഥന?

ദില്ലി: അതിര്‍ത്തിയില്‍ പകിസ്ഥാന്‍ ആക്രമണം നടത്തിയതിന് പിന്നാലെ കേള്‍ക്കുന്ന വാര്‍ത്തകളില്‍ പലതും ഇന്ത്യയെ ഞെട്ടിപ്പിക്കുന്ന തരത്തിലുള്ളതാണ്. മറ്റൊരു യുദ്ധത്തിന് അയല്‍രാജ്യം തയ്യാറെടുക്കുകയാണ് എന്ന ആരോപണം പലയിടത്തുനിന്നും ഉയരുന്നുണ്ട്. മുംബൈ ആക്രമണത്തിന് സമാനമായ മറ്റൊരു കടന്നാക്രമണത്തെക്കുറിച്ച് ഐ ബി ദില്ലി പോലീസിന് മുന്നറിയിപ്പ് നല്‍കിയതായാണ് റിപ്പോര്‍ട്ടുകള്‍.

പാകിസ്ഥാനിലെ പള്ളിയില്‍ ഈദ് നമസ്‌കാരത്തിനിടെ ഒസാമ ബിന്‍ ലാദനും അജ്മല്‍ കസബിനും വേണ്ടി പ്രാര്‍ത്ഥന നടത്തിയെന്ന റിപ്പോര്‍ട്ടും വാര്‍ത്തകള്‍ക്ക് ചൂട് പകരുന്നു. സെപ്തംബര്‍ 11 ലെ വേള്‍ഡ് ട്രേഡ് സെന്റര്‍ ആക്രമണത്തിന്റെ സൂത്രധാരനായ ബിന്‍ ലാദനും മുംബൈ ഭീകരാക്രമണത്തില്‍ പിടിക്കപ്പെട്ട് ഇന്ത്യയില്‍ തൂക്കിലേറ്റിയ കസബിനും വേണ്ടി പ്രാര്‍ത്ഥന നടത്തിയത് പാകിസ്ഥാന്റെ മനസ് ഭീകരവാദികള്‍ക്കൊപ്പമാണോ എന്ന സംശയമാണ് ഉയര്‍ത്തുന്നത്.

മരിച്ചവരുടെ ആത്മാവിന് വേണ്ടി പ്രാര്‍ത്ഥിക്കുന്നത് സാധാരണയാണെങ്കിലും അതിനപ്പുറമുള്ള മാനങ്ങള്‍ ഈ രണ്ടുപേരുടെ കാര്യത്തില്‍ ഉണ്ടോ എന്ന ആശങ്ക ഉയരുന്നുണ്ട്. ഈദ് പ്രാര്‍ത്ഥനകള്‍ക്കിടയില്‍ ബിന്‍ ലാദനും അജ്മല്‍ കസബിനും വേണ്ടി പ്രാര്‍ത്ഥിക്കാന്‍ വിശ്വാസികളോട് നിമ്ര മോസ്‌കിലെ ഇമാം ആവശ്യപ്പെടുകയായിരുന്നത്രെ.

അതേസമയം ഐ ബി മുന്നറിയിപ്പിനെ തുടര്‍ന്ന് ദില്ലി പോലീസ് അതീവ ജാഗ്രതയിലാണ്. സ്വാതന്ത്ര്യദിനത്തോടനുബന്ധിച്ച് തലസ്ഥാന നഗരിയിലും മറ്റും ആക്രമണമുണ്ടായേക്കാമെന്നാണ് മുന്നറിയിപ്പുകള്‍. കറാച്ചിയിലെ ഒരു റാലിയില്‍ വെച്ച് ഇന്ത്യയില്‍ ആക്രമണം നടത്തുമെന്ന് ഹഫീസ് സയ്യീദ് പറഞ്ഞതായും സ്ഥിരീകരിക്കാത്ത റിപ്പോര്‍ട്ടുകളുണ്ട്.

അതിര്‍ത്തിയില്‍ പാകിസ്ഥാന്‍ നടത്തിയ ആക്രമണത്തിനെതിരെ ജനരോഷ്ം പുകയുകയാണ്. അഞ്ച് ഇന്ത്യന്‍ സൈനികരാണ് പാക് ആക്രമണത്തില്‍ കൊല്ലപ്പെട്ടത്.

English summary

Reports suggested a Karachi imam offered prayers for forgiveness of Ajmal Amir Kasab and Osama Bin Laden in an Eid prayers.