ഉപരോധം അലസിപ്പോയ മുല്ലപ്പൂ സമരമെന്ന് കെസി ജോസഫ്

തിരുവനന്തപുരം: സോളാര്‍ വിവാദത്തില്‍ മുഖ്യമന്ത്രിയുടെ രാജിയാവശ്യപ്പെട്ട് എല്‍ഡിഎഫ് നടത്തിയ സെക്രട്ടറിയേറ്റ് ഉപരോധ സമരത്തെ ശക്തമായി വിമര്‍ശിച്ച് മന്ത്രി കെസി ജോസഫ് രംഗത്ത്. അലസിപ്പോയ ഒരു മുല്ലപ്പൂ സമരമെന്നാണ് മന്ത്രി ഉപരോധത്തെ വിശേഷിപ്പിച്ചത്. മാതൃഭൂമി പത്രത്തില്‍ പ്രസിദ്ധീകരിച്ച ലേഖനത്തിലാണ് കെസി ജോസഫിന്റെ വിമര്‍ശനം.

'ചരിത്രത്തിലെ അത്യപൂര്‍വമായ സമരമെന്നും വാള്‍സ്ട്രീറ്റ് സമരത്തിന്റെ നവീകരിച്ച കേരളാ പതിപ്പെന്നും 'മല്ലപ്പൂ'വിപ്ലവത്തിന്റെ തനിയാവര്‍ത്തനമെന്നുമെല്ലാം കൊട്ടിഗ്‌ഘോഷിച്ച സെക്രട്ടറിയേറ്റ് ഉപരോധ സമരം 29 മണിക്കൂറിനു ശേഷം പൊടുന്നനെ അവസാനിച്ചു. പ്രതിപക്ഷ ഉപനേതാവ് കോടിയേരി ബാലകൃഷ്ണന്‍ അവകാശപ്പെടുന്നത് അതിശക്തമായ പതുസമരത്തിന് കരുത്ത് സമാഹരിച്ചുകൊണ്ടാണ് സമരം അവസാനിച്ചതെന്നാണ്'- എന്നു പറഞ്ഞുകൊണ്ടാണ് ലേഖനം ആരംഭിക്കുന്നത്.

സിപിഎം നേതൃത്വത്തില്‍ അണികള്‍ക്കുള്ള വിശ്വാസം നഷ്ടപ്പെടുന്നതു തന്നെയാണ് ഉപരോധ സമരത്തിന്റെ ബാക്കിപത്രം. ജുഡീഷ്യല്‍ അന്വേണ പ്രഖ്യാപനം കേട്ടതു പാതി കേള്‍ക്കാത്തതു പാതി സമരം പിന്‍വലിക്കാന്‍ സിപിഎം തയ്യാറായതിനെ തുടര്‍ന്ന് നിരവധി സംശയങ്ങള്‍ പാര്‍ട്ടി കേഡറിന് മാത്രമല്ല, നേതാക്കള്‍ക്കും ഉണ്ടായാല്‍ കുറ്റപ്പെടുത്താന്‍ കഴിയില്ലെന്ന് കെസി ജോസഫ് ലേഖനത്തില്‍ പറയുന്നു.

English summary

Minister KC Joseph criticize CPIM over LDF Secretariat siege in Mathrubhumi article.