കുറ്റം തെളിയിച്ചാല് അടിമയാകാം; ആശ്രാം ബാപ്പു
ദില്ലി: രാജസ്ഥാനില് ബാധ ചികിത്സക്കാനെത്തി പ്രായ പൂര്ത്തിയാകാത്ത പെണ്കുട്ടിയെ പീഡിപ്പിക്കാന് ശ്രമിച്ച കേസില് ആരോപണവിധേയനായ ആള് ദൈവം ആശ്രാം ബാപ്പു പുതിയ തന്ത്രത്തോടെ വീണ്ടും മന്ത്രിക്കുന്നു. താന് കുറ്റക്കാരെന്ന് ആരെങ്കലും തെളിയിക്കുകയാണെങ്കില് പിന്നെയുള്ള കാലം താന് അയാള്ക്ക് അടിമയായിരിക്കുമെന്നാണ് ആള്ദെവത്തിന്റെ വെല്ലുവിളി.
കുറ്റക്കാരനെന്ന് തെളിയിക്കുന്നയാള്ക്ക് ഇനിയുള്ള കാലം താന് അടിമയാകുക മാത്രമല്ല അയാള്ക്ക് അഞ്ച് ലക്ഷം രൂപം പാരിതോഷികമായി നല്കുകയും ചെയ്യുമെന്നാണ് ബാപ്പുവിന്റെ പ്രഖ്യാപനം. അതോടൊപ്പം, സിക്ക് സമൂഹത്തിന്റെ വികാരത്തെ വ്രണപ്പെടുത്തുന്ന രീതിയില് ഗുരുനാനാക്കിനെ കുറിച്ച് തന്റെ വക്താവ് നടത്തിയ പ്രസ്താവനയ്ക്കും ആശ്രാം ബാപ്പു ക്ഷമ ചോദിച്ചു.
അതേ സമയം, കേസുമായി ബന്ധപ്പെട്ട ചോദ്യം ചെയ്യലിന് ഹാജരായില്ലെങ്കില് ആശ്രാം ബാപ്പുവിനെ അറസ്റ്റ് ചെയ്യുമെന്ന് പൊലീസ് വ്യക്തമാക്കി. സെപ്തംബര് 19വരെ വിവിധ പരിപാടികളില് പങ്കെടുക്കേണ്ടതുകൊണ്ട് ഹാജരാകാന് കൂടുതല് സമയം അനുവദിക്കണമെന്നാവശ്യപ്പെട്ട് ബാപ്പു പൊലീസിനെ സമീപിച്ചിരുന്നു. എന്നാല് അടുത്ത ദിവസം തന്നെ ഹാജരാകാത്ത സാഹചര്യത്തില് അറസ്റ്റ് ചെയ്യുമെന്ന് ജോധ്പൂര് കമ്മീഷ്ണര് അറിയിച്ചു.