സഫാരി കാറിനുള്ളിൽ സ്വിമ്മിംഗ് പൂൾ; സഞ്ജു ടെക്കിക്കെതിരെ നടപടി, സംഭവം ഇങ്ങനെ..
ആലപ്പുഴ: കാറിനുള്ളിൽ സ്വിമ്മിംഗ് പൂളൊരുക്കി യാത്ര ചെയ്ത യൂട്യൂബർ സഞ്ജു ടെക്കിക്കെതിരെ നടപടിയുമായി ആലപ്പുഴ എൻഫോഴ്സ്മെന്റ് ആർ ടി ഒ. കാർ ഉടമയുടെയും ഡ്രൈവറുടെയും ലൈസൻസ് റദ്ദാക്കി. വെള്ളം നിറച്ച കാറിൽ അപകടകരമായ രീതിയിൽ യാത്ര ചെയ്തതിനാണ് നടപടി. സഞ്ജുവിന്റെ വാഹനം എൻഫോഴ്സ്മെന്റ് ആർ ടി ഒ പിടിച്ചെടുക്കുകയും ചെയ്തിട്ടുണ്ട്.
സഫാരി കാറിനുള്ളിൽ സ്വിമ്മിംഗ് പൂൾ ഒരുക്കി യാത്ര ചെയ്യുന്നതിന്റെ വീഡിയോ സഞ്ജു യൂട്യൂബിൽ പങ്കുവെച്ചിരുന്നു. വാഹനത്തിൽ സഞ്ചരിച്ചുകാെണ്ട് കുളിയ്ക്കുകയും വെള്ളം റോഡിലേക്ക് ഒഴുക്കിവിടുകയും ചെയ്തിരുന്നു. ഇത്തരം യാത്രകൾ അത്യന്തം അപകടകരം ആണെന്ന് എൻഫോഴ്സ്മെന്റ് ആർ ടി ഒ രമണൻ പറഞ്ഞു.
ആവേശം സിനിമയിൽ ഫഹദ് ഫാസിൽ അവതരിപ്പിച്ച രംഗണ്ണൻ എന്ന കഥാപാത്രത്തിന്റെ സഹായിയായ അംബാൻ ലോറിയ്ക്ക് പിന്നിൽ ഒരുക്കിയ സ്വിമ്മിംഗ് പൂൾ മാതൃകയിൽ ആയിരുന്നു സഞ്ജു കാറിനുള്ളിൽ സ്വിമ്മിംഗ് പൂൾ ഒരുക്കിയത്. കഴിഞ്ഞ ദിവസമാണ് വാഹനം മോട്ടോർ വാഹന വകുപ്പ് കാർ പിടിച്ചെടുത്തത്. അപകരമായ വിധത്തിലാണ് പൊതു നിരത്തിലൂടെ വാഹനം ഓടിച്ചിരുന്നത് എന്നാണ് വിവരം.
കാറിന്റെ പിൻഭാഗത്ത് പാസഞ്ചേഴ്സ് ഇരിക്കുന്ന സീറ്റ് അഴിച്ച് മാറ്റിയാണ് സ്വിമ്മിംഗ് പൂൾ ഒരുക്കിയത്. ടാർപോളിൻ വലിച്ചുകെട്ടി അതിൽ കുഴലിലൂടെ വെള്ളം നിറച്ചാണ് കാറിനുള്ളിൽ സ്വിമ്മിംഗ് പൂൾ ഒരുക്കിയത്. ദേശീയ പാതയിലൂടെ ഉൾപ്പെടെയാണ് സഞ്ജുവും കൂട്ടുകാരും വാഹനം ഓടിച്ചത്. നിരവധി പേർ കാറിനുള്ളിലെ പൂളിൽ കുളിക്കുന്നതും വാഹനം റോഡിലൂടെ സഞ്ചരിക്കുന്നതായും വീഡിയോയിൽ കാണാം.
അതിനിടെ വാഹനത്തിലെ പൂളിനുള്ളിലെ മർദ്ദം കാെണ്ട് എയർ ബാഗ് പുറത്തേക്ക് വരികയും ഒടുവിൽ ബാക്ക് ഡോർ തുറന്ന് ഇവർ വെള്ളം പുറത്തേക്ക് ഒഴുക്കി വിടുന്നതും കാണാം. യൂട്യൂബിൽ മത്സരം കൂടി വരുന്നതോടെ വ്യത്യസ്തമായ വീഡിയോ ചെയ്ത് റീച്ചുണ്ടാക്കാനാണ് ഈ വീഡിയോ എടുത്തത് എന്നാണ് സഞ്ജു ടെക്കി പറയുന്നത്.
സഞ്ജുവിന്റെ വീഡിയോയ്ക്ക് ധാരാളം വ്യൂസ് ലഭിക്കാറുണ്ട്. ടെക്നോളജി, ലൈഫ് സ്റ്റൈൽ തുടങ്ങിയ വീഡിയോകളാണ് സഞ്ജു പങ്കുവെയ്ക്കാറുള്ളത്. യൂട്യൂബിലും ഫേസ് ബുക്കിലും ഇൻസ്റ്റയിലുമൊക്കെ ധാരാളം ഫോളോവേഴ്സും ഇയാൾക്കുണ്ട്. വീഡിയോസിനൊക്കെ ലക്ഷക്കണക്കിന് വ്യൂസ് ലഭിക്കാറുണ്ട്. എന്നാൽ ഈ വീഡിയോയ്ക്കെതിരെ പലരും വിമർശനം ഉന്നയിച്ചിരുന്നു.
Click it and Unblock the Notifications
Sign in with Google