പത്താം ക്ലാസില്‍ പഠിക്കുകയാണ്, ഇന്ന് പരീക്ഷയാണ്; അഭിമന്യു രാഷ്ട്രീയ പ്രവര്‍ത്തകനല്ലെന്ന് പിതാവ്

ആലപ്പുഴ: വള്ളിക്കുന്നത്ത് കുത്തേറ്റ് കൊല്ലപ്പെട്ട 15 വയസുകാരന്‍ അഭിമന്യു രാഷ്ട്രീയ പ്രവര്‍ത്തകനല്ലെന്ന് പിതാവ് അമ്പിളി കുമാര്‍. അവന്‍ പത്താം ക്ലാസില്‍ പഠിക്കുകയാണ്. ഇന്ന് അവന് പരീക്ഷയുള്ളതാണ്. ഒരു പ്രശ്‌നത്തിനോ വഴക്കിനോ അവന്‍ പോവാറില്ല, അവന്റെ സഹോദരന്‍ അനന്തു ഡിവൈഎഫ്‌ഐ പ്രവര്‍ത്തകനാണ്. കുടുംബം കമ്മ്യൂണിസ്റ്റുകാരെങ്കിലും അഭിമന്യു രാഷ്ട്രീയ പ്രവര്‍ത്തനത്തിനൊന്നും പോകാറില്ലെന്ന് പിതാവ് മാധ്യമങ്ങളോട് പറഞ്ഞു.

എന്നാല്‍ അഭിമന്യുവിന്റെ കൊലപാതകം ആസൂത്രിതമാണെന്ന് സിപിഎം ആരോപിക്കുന്നു. പ്രദേശത്ത് ആര്‍എസ്എസ് പ്രവര്‍ത്തകരുടെ മയക്കുമരുന്ന് മാഫിയ പ്രവര്‍ത്തനങ്ങളെ ഡിവൈഎഫ്‌ഐ എതിര്‍ത്തിരുന്നു, ഈ പ്രശ്‌നമാണ് കൊലപാതകത്തില്‍ കലാശിച്ചതെന്ന് സിപിഎം പറയുന്നു. അഭിമന്യു സജീവ എസ്എഫ്‌ഐ പ്രവര്‍ത്തകനാണെന്നും സിപിഎം ചാരുമൂട് എരിയ കമ്മിറ്റി സെക്രട്ടറി ബിനു പറഞ്ഞു.

അതേസമയം, പതിനഞ്ച് വയസ്സുകാരനെ കുത്തിക്കൊലപ്പെടുത്തിയ സംഭവത്തില്‍ രണ്ടുപേര്‍ കസ്റ്റഡിയില്‍. കൊലപാതകത്തില്‍ നേരിട്ട് പങ്കെടുത്തതായി സംശയിക്കുന്ന സജയ് ദത്ത് എന്നയാളുടെ അച്ഛനെയും സഹോദരനെയുമാണ് പോലീസ് കസ്റ്റഡിയിലെടുത്തത്. ഇവരെ ചോദ്യം ചെയ്തുകൊണ്ടിരിക്കുകയാണ്. പ്രതികളെ കുറിച്ച് സൂചനകള്‍ ലഭിച്ച പൊലീസ് ഇവര്‍ക്കായി തിരച്ചില്‍ ശക്തമാക്കിയിട്ടുണ്ട്. വള്ളിക്കുന്ന ക്ഷേത്രോത്സവത്തിനിടെ ഇന്നലെ രാത്രി പത്തരയോടെയാണ് അഭിമന്യുവിനെ കുത്തിക്കൊലപ്പെടുത്തിയത്.

ഡിവൈഎഫ്‌ഐ പ്രവര്‍ത്തകനായ അനന്തുവും ആര്‍എസ്എസ് പ്രവര്‍ത്തകനായ സജയ് ദത്തും തമ്മില്‍ നേരത്തേയും പ്രശ്‌നങ്ങള്‍ ഉണ്ടായിരുന്നു. ഇതാണ് അഭിമന്യുവിന്റെ കൊലപാതകത്തില്‍ കലാശിച്ചതെന്നാണ് സിപിഎം നേതൃത്വം പറയുന്നത്. സംഭവത്തില്‍ പ്രതിഷേധിച്ച് ഡി വൈ എഫ്‌ ഐ സംസ്ഥാന അധ്യക്ഷന്‍ എഎ റഹീം ഉള്‍പ്പടേയുള്ള നേതാക്കള്‍ രംഗത്ത് എത്തിയിട്ടുണ്ട്. അനന്തുവിനെ ലക്ഷ്യം വച്ച് വന്ന പരിശീലനം ലഭിച്ച ആര്‍എസ്എസ് ക്രിമിനല്‍ സംഘം ജേഷ്ഠനെ കിട്ടാതെ വന്നപ്പോഴാണ് അനുജനെ കൊലപ്പെടുത്തിയതെന്നാണ് അദ്ദേഹം ആരോപിക്കുന്നത്.

ജീവിത പങ്കാളിയെ തേടുകയാണോ? കേരള മാട്രിമോണിയിൽ - രജിസ്ട്രേഷൻ സൗജന്യം!

English summary

Alappuzha Vallikunnam Abhimanyu Murder Case: Father says Abhimanyu is not a political worker