ആലപ്പുഴയില് ഇന്ന് രണ്ട് പേര്ക്ക് കൊവിഡ്, കരള് രോഗത്തെ തുടർന്ന് ഇന്നലെ മരിച്ചയാൾക്കും രോഗം
ആലപ്പുഴ: സംസ്ഥാനത്ത് ഇന്ന് സ്ഥിരീകരിച്ച 58 കൊവിഡ് കേസുകളില് രണ്ട് പേര് ആലപ്പുഴ ജില്ലക്കാര്. കരള് രോഗബാധയെ തുടര്ന്ന് ചികിത്സയിലിരിക്കെ ഇന്നലെ അന്തരിച്ച വ്യക്തിയും ഇതിലുള്പ്പെടുന്നു. മെയ് 27 - ന് അബുദാബി - കോഴിക്കോട് വിമാനത്തിലെത്തി ആലപ്പുഴ ജില്ലയില് കോവിഡ് കെയര് സെന്ററില് നിരീക്ഷണത്തിലായിരുന്ന ചെങ്ങന്നൂര് പാണ്ടനാട് തെക്കേ പ്ലാശ്ശേരില് ജോസ് ജോയ് (38) ആണ് മരിച്ചത്.
നാട്ടിലെത്തിയ ശേഷം കോവിഡ് കെയര് സെന്ററില് നിരീക്ഷണത്തിലിരിക്കെ, രക്തം ഛര്ദിച്ചതിനെ തുടര്ന്ന് മെഡിക്കല് കോളേജില് പ്രവേശിപ്പിക്കുകയും കരള് രോഗത്തിന് ചികിത്സയിലിരിക്കെ മരണമടയുകയും തുടര്ന്ന് നടത്തിയ പരിശോധനയില് കോവിഡ് സ്ഥിരീകരിക്കുകയും ചെയ്തു. മൃതദേഹം ചാത്തനാട് ഗ്യാസ് ക്രിമറ്റോറിയത്തില് കോവിഡ് പ്രോട്ടോക്കോള് പാലിച്ച് ഉടന് നടത്തും. മേയ് 22 - ന് റോമില് നിന്ന് കൊച്ചിയിലെത്തിയ ചേര്ത്തല താലൂക്ക് സ്വദേശിയായ യുവാവിനാണ് ഇന്ന് കോവിഡ് സ്ഥിരീകരിച്ചത്. ജില്ലയിലെ കോവിഡ് കെയര് സെന്ററില് നിരീക്ഷണത്തിലായിരുന്നു. രോഗിയെ മെഡിക്കല് കോളേജിലേക്ക് മാറ്റിയെന്ന് അധികൃതര് അറിയിച്ചു.
അതേസമയം, സംസ്ഥാനത്ത് ഇന്ന് 58 പേര്ക്ക് കോവിഡ്-19 സ്ഥിരീകരിച്ചു. തൃശൂര് ജില്ലയില് നിന്നുള്ള 10 പേര്ക്കും പാലക്കാട് ജില്ലയില് നിന്നുള്ള 9 പേര്ക്കും കണ്ണൂര് ജില്ലയില് നിന്നുള്ള 8 പേര്ക്കും കൊല്ലം, ഇടുക്കി, എറണാകുളം, കോഴിക്കോട് ജില്ലകളില് നിന്നുള്ള 4 പേര്ക്ക് വീതവും കാസര്ഗോഡ് ജില്ലയില് നിന്നുള്ള 3 പേര്ക്കും തിരുവനന്തപുരം, ആലപ്പുഴ ജില്ലകളില് നിന്നുള്ള 2 പേര്ക്കും കോട്ടയം ജില്ലയില് നിന്നുള്ള ഒരാള്ക്കുമാണ് രോഗം സ്ഥിരീകരിച്ചത്. ഇതുകൂടാതെ 7 എയര് ഇന്ത്യ ജീവനക്കാര്ക്കും രോഗം സ്ഥിരീകരിച്ചു.
ഇതില് ആലപ്പുഴ ജില്ലയില് കരള് രോഗബാധയെ തുടര്ന്ന് ചികിത്സയിലായിരിക്കെ ഇന്നലെ മരണമടഞ്ഞ വ്യക്തിയുടെ പരിശോധനാഫലവും ഉള്പെടുന്നു. 17 പേര് വിദേശത്ത് നിന്നും (കുവൈറ്റ്-6, യു.എ.ഇ.-6, ഒമാന്-2, സൗദി അറേബ്യ-1, ഖത്തര്-1, ഇറ്റലി-1) 31 പേര് മറ്റ് സംസ്ഥാനങ്ങളില് (മഹാരാഷ്ട്ര-19, തമിഴ്നാട്-9, തെലുങ്കാന-1, ഡല്ഹി-1, കര്ണാടക-1) നിന്നും വന്നതാണ്. ഒരു ആരോഗ്യ പ്രവര്ത്തകയ്ക്കും (പാലക്കാട്) 2 പേര്ക്ക് സമ്പര്ക്കത്തിലൂടെയും (കൊല്ലം, പാലക്കാട്) രോഗം ബാധിച്ചു.
രോഗം സ്ഥിരീകരിച്ച് ചികിത്സയിലായിരുന്ന 10 പേരുടെ പരിശോധനാഫലം നെഗറ്റീവ് ആയിട്ടുണ്ട്. മലപ്പുറം ജില്ലയില് നിന്നുള്ള 4 പേരുടെയും (ഒരു പാലക്കാട് സ്വദേശി) തൃശൂര് ജില്ലയില് നിന്നുള്ള 3 പേരുടെയും തിരുവനന്തപുരം, കോട്ടയം, കണ്ണൂര് ജില്ലകളില് നിന്നുള്ള ഓരോരുത്തരുടെ വീതവും പരിശോധനഫലമാണ് നെഗറ്റീവ് ആയത്. 624 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 575 പേര് കോവിഡ് മുക്തരായി.
Click it and Unblock the Notifications
Sign in with Google