കുടിവെള്ളം ചോദിച്ചെത്തി; ദാഹം മാറ്റിയതിന് ശേഷം വയോധികയുടെ മാല തട്ടിപ്പറിച്ച് യുവാക്കള്‍ കടന്നുകളഞ്ഞു

Updated: Saturday, October 3, 2020, 17:52 [IST]

ചെങ്ങന്നൂര്‍: കുടിവെള്ളം ചോദിച്ച് ബൈക്കിലെത്തിയ യുവാക്കള്‍ വയോധികയുടെ സ്വര്‍ണമാല കവര്‍ന്ന് കടന്നുകളഞ്ഞു. വെണ്‍മണി വാലില്‍ വീട്ടില്‍ കുഞ്ഞുകുട്ടിയുടെ ഭാര്യ ചിന്നമ്മയുടെ മാലയാണ് മോഷ്ടാക്കള്‍ കവര്‍ന്നത്. ഒന്നരപ്പവനോളം തൂക്കമുള്ള മാലയാണ് യുവാക്കള്‍ തട്ടിപ്പറച്ചത്. സംഭവത്തെ തുടര്‍ന്ന് വെണ്‍മണി പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

വീട്ടിലെ കിണറ്റില്‍ നിന്ന് വെള്ളം കോരുകയായിരുന്നു ചിന്നമ്മ. കുടിക്കാന്‍ വെള്ളം ആവശ്യപ്പെട്ടപ്പോള്‍ ചിന്നമ്മ ഇവര്‍ക്ക് വെള്ളം കോരിക്കൊടുത്തു. ഇത് വാങ്ങി ദാഹം മാറ്റിയതിന് ശേഷം ബൈക്കിന്റെ പിന്നിലിരുന്ന യുവാവ് മാല പൊട്ടിച്ച് കടന്നുകളയുകയായിരുന്നു. ഇതിനിടെ മാല കമ്മലില്‍ കുടുങ്ങി ചെവി മുറിയുകയും ചെയ്തിട്ടുണ്ട്.

മുറുവുള്ളതിനാല്‍ ചിന്നമ്മയെ അടുത്തുള്ള ആശുപത്രിയില്‍ പ്രവേശിപ്പിച്ചിരിക്കുകയാണ്. ഒരു പള്‍സര്‍ ബൈക്കിലാണ് മോഷ്ടാക്കള്‍ മാല തട്ടിപ്പറിക്കുന്നതിന് എത്തിയത്. ബൈക്ക് ഓടിച്ചിരുന്ന ആള്‍ ഹെല്‍മെറ്റും പിറകിലിരുന്ന ആള്‍ മാസ്‌കും ധരിച്ചിരുന്നു. അതുകൊണ്ട് തന്നെ സമീപത്തെ സിസിടിവി ക്യാമറയില്‍ പതിഞ്ഞ ചിത്രങ്ങള്‍ വ്യക്തമല്ല. സംഭവത്തില്‍ അന്വേഷണം ആരംഭിച്ചെന്ന് പൊലീസ് അറിയിച്ചു.