വീട്ടുകാര് വിവാഹത്തിന് നിര്ബന്ധിച്ചു, വനിത ഡോക്ടര് ജീവനൊടുക്കി
ബെംഗളൂരു: വീട്ടുകാര് വിവാഹത്തിന് നിര്ബന്ധിച്ചതിനെത്തുടര്ന്ന് വനിത ഡോക്ടര് ആത്മഹത്യ ചെയ്തു . ബെംഗളൂരിലെ ദൊബ്ബ ബനസ്വാദിയിലാണ് സംഭവം . ദീപിതി റെഡ്ഡി (28) എന്ന ഡോക്ടറാണ് ആത്മഹത്യ ചെയ്തത് . യുവതിയ്ക്ക് മറ്റൊരാളുമായി അടുപ്പമുണ്ടായിരുന്നതായി പൊലീസ് സംശയിക്കുന്നു.
ആന്ധ്രപ്രദേശിലാണ് യുവതിയുടെ കുടബം. മുത്തശ്ശിയ്ക്കൊപ്പം ബെംഗളൂരുവിലാണ് പെണ്കുട്ടി താമസിയ്ക്കുന്നത് . പെണ്കുട്ടിയുടെ പിതാവ് അഞ്ജനപ്പ റെഡ്ഡിയും മറ്റുബന്ധുക്കളും ചേര്ന്ന് യുവതിയെ വിവാഹം കഴിപ്പിയ്ക്കാന് തീരുമാനിച്ചു. ഇത് യുവതിയെ കടുത്ത മാനസിക സമ്മര്ദ്ദത്തിലാക്കിയിരുന്നു . ഇക്കാര്യങ്ങള് ചൂണ്ടിക്കാട്ടി യുവതിയുടെ ബന്ധു പൊലീസില് പരാതി നല്കിയിട്ടുണ്ട് .
വീട്ടുകാരുടെ സമ്മര്ദ്ദം അധികമായപ്പോഴാണ് യുവതി ആത്മഹത്യ ചെയ്തത് . ആത്മഹത്യ ചെയ്യുന്നതിന് മുന്പ് തന്റെ സഹപ്രവര്ത്തകനായ രഘു എന്നായാളെ ദീപ്തി വിളിച്ചിരുന്നു . താന് കടുത്ത സമ്മര്ദ്ദത്തിലാണെന്നും ആത്മഹത്യ ചെയ്യുകയാണെന്നും പറഞ്ഞു .
സഹപ്രവര്ത്തകന് ദീപ്തിയെ തിരഞ്ഞ് വീട്ടിലെത്തുമ്പോഴേയ്ക്കും തൂങ്ങിമരിച്ച നിലയില് കണ്ടെത്തുകയായിരുന്നു . വീട്ടുകാര് ദീപ്തിയുടെ പ്രണയത്തെ എതിര്ത്തിരുന്നതും മറ്റൊരു വിവാഹത്തിന് നിര്ബന്ധിച്ചതുമാണ് ആത്മഹത്യയ്ക്ക് കാരണമെന്ന് പൊലീസ് പറയുന്നു .