ഐഎഎസ് ഓഫീസര്‍ ദുരൂഹസാഹചര്യത്തില്‍ മരിച്ച നിലയില്‍

ബെംഗളൂരു: ഐഎഎസ് ഉദ്യോഗസ്ഥനെ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തി. ബെംഗളൂരുവിലാണ് സംഭവം.

വാണിജ്യനികുതി വകുപ്പിലെ അഡീഷണല്‍ കമ്മീഷണര്‍ ആയ ഡികെ രവി ആണ് മരിച്ചത്. അസ്വാഭാവിക മരണത്തിന് പോലീസ് കേസെടുത്തു.

മാര്‍ച്ച് 16 ന് സ്വന്തം അപ്പാര്‍ട്ട്‌മെന്റിലാണ് രവിയുടെ മൃതദേഹം കണ്ടെത്തിയത്. ആത്മഹത്യയാണെന്നാണ് പ്രാഥമിക നിഗമനം. ഇദ്ദേഹത്തിന്റെ സഹായിയേയും ഡ്രൈവറേയും പോലീസ് ചോദ്യം ചെയ്യലിനായി കസ്റ്റഡിയില്‍ എടുത്തിട്ടുണ്ട് .

ഭാര്യക്കൊപ്പം ഭാര്യവീട്ടിലായിരുന്നു ഇദ്ദേഹം ഞായറാഴ്ച ഉണ്ടായിരുന്നത്. അവിടെ നിന്ന് തിങ്കളാഴ്ച നേരിട്ട് ഓഫീസിലേക്ക് പോവുകയായിരുന്നു. എന്നാല്‍ തിങ്കളാഴ്ച രാവിലെ 11 മണിയോടെ ഇദ്ദേഹം സ്വന്തം വീട്ടില്‍ തിരിച്ചെത്തി .

ഭാര്യ പലതവണ ഫോണില്‍ വിളിച്ചെങ്കിലും അദ്ദേഹത്തെ ലഭിച്ചില്ല . പിന്നീട് ഓഫീസില്‍ വിളിച്ചപ്പോള്‍ വീട്ടിലേക്ക് പോയി എന്ന വിവരമാണ് ലഭിച്ചത്. വീട്ടിലെത്തി നോക്കിയപ്പോഴാണ് രവിയെ മരിച്ച നിലയില്‍ കണ്ടെത്തിയത് .

വീട്ടില്‍ നിന്ന് ആത്മഹത്യാകുറിപ്പൊന്നും ലഭിച്ചിട്ടില്ല . എങ്കിലും ആത്മഹത്യ തന്നെയാകാനാണ് സാധ്യതയെന്നാണ് പോലീസിന്റെ നിഗമനം. രവിയുടെ ഫോണ്‍ രേഖകളും ഇമെയിലും പരിശോധിക്കുമെന്നും പോലീസ് അറിയിച്ചു .

English summary

IAS officer found dead in Bengaluru; no suicide note recovered