രണ്ടരവയസ്സുകാരി മണ്ണെണ്ണ കുടിച്ച് മരിച്ചു

By Soorya Chandran

Updated: Wednesday, September 18, 2013, 10:43 [IST]

ബാംഗ്ലൂര്‍: വെള്ളമാണെന്ന് കരുതി മണ്ണെണ്ണ എടുത്ത് കുടിച്ച രണ്ടര വയസ്സുകാരി മരിച്ചു. 2013 സെപ്റ്റംബര്‍ 15 നാണ് കുട്ടി മണ്ണെണ്ണ കുടിച്ചത്. ഉടന്‍ തന്നെ ആശുപത്രിയില്‍ പ്രവേശിപ്പിച്ചെങ്കിലും സെപ്റ്റംബര്‍17 ന് മരിച്ചു.

സുരക്ഷ ജീവനക്കാരനായ മഞ്ജുനാഥിന്റേയും ഗീതയുടേയും മകള്‍ ഭാനുപ്രിയ ആണ് മരിച്ചത്. തുങ്കൂര്‍ ജില്ലയിലെ സൈറ സ്വദേശികളാണ് ഇവര്‍.

ഡോക്ടറുടെ നിര്‍ദ്ദേശപ്രകാരം ഗീത വിശ്രമത്തിലായിരുന്നു. അപ്പോഴാണ് മകള്‍ കുടിക്കാന്‍ വെള്ളം ആവശ്യപ്പെട്ട് വന്നത്. അടുക്കളയില്‍ ഗ്ലാസ്സില്‍ വെളളം എടുത്ത് വച്ചിട്ടുണ്ടെന്നും പോയി എടുത്തു കുടിക്കാനും ഗീത ആവശ്യപ്പെട്ടു. പക്ഷേ ഭര്‍ത്താവ് മഞ്ജുനാഥ് മറ്റൊരു ഗ്ലാസില്‍ മണ്ണെണ്ണ നിറച്ചുവച്ചിരുന്ന കാര്യം ഗീതക്ക് അറിയില്ലായിരുന്നു.

ഭാനുപ്രിയ അടുക്കയില്‍ എത്തി കുടിച്ചത് മഞ്ജുനാഥ് എടുത്ത് വച്ച മണ്ണെണ്ണയായിരുന്നു. അല്‍പസമയം കഴിഞ്ഞപ്പോഴേക്കും കുട്ടി വയറുവേദനിക്കുന്നുവെന്ന് പറഞ്ഞ് കരഞ്ഞ് അടുത്തെത്തി. വായക്ക് മണ്ണെണ്ണയുടെ മണം ഉണ്ടായിരുന്നു. അപ്പോഴാണ് ഗീതക്കും മഞ്ജുനാഥിനും സംഭവം പിടികിട്ടിയത്. ഉടന്‍ തന്നെ ആശുപത്രിയില്‍ പ്രവേശിപ്പിക്കുകയും ചെയ്തു.

അടുക്കളയില്‍ ഉറുമ്പിനെ തുരത്താന്‍ വേണ്ടി മണ്ണെണ്ണ സ്പ്രേ ചെയ്തിരുന്നതായി മഞ്ജുനാഥ് പറഞ്ഞു. ബാക്കിവന്ന മണ്ണെണ്ണ ഒരു ഗ്ലാസ്സില്‍ ഒഴിച്ച് അടുപ്പിനടുത്ത് വച്ചിരിക്കുകയായിരുന്നു. ഇതാണ് കുട്ടി അറിയാതെ എടുത്ത് കുടിച്ചതെന്ന് മഞ്ജുനാഥ് പോലീസിനോട് പറഞ്ഞു.