ബെംഗളൂരുവില്‍ റവന്യു വകുപ്പ് ഓഫീസില്‍ തീപ്പിടുത്തം : ഒട്ടേറെ ഫയലുകള്‍ കത്തി നശിച്ചു

By Pratheeksha

Updated: Sunday, May 1, 2016, 14:20 [IST]

ബെംഗളൂരു: ബെംഗളുരുവില്‍ വിധാന്‍ സൗധയ്ക്കു സമീപമുളള എം.എസ് കെട്ടിടത്തിലുണ്ടായ തീപ്പിടുത്തത്തില്‍ ഭൂമി ഇടപാടുകളുമായി ബന്ധപ്പെട്ട ഒട്ടേറെ രേഖകള്‍ കത്തി നശിച്ചതായി റിപ്പോര്‍ട്ട്. റവന്യു വകുപ്പിന്റെ കീഴില്‍ ഭൂമി ഇടപാടുകളുമായി ബന്ധപ്പെട്ട രേഖകള്‍ സൂക്ഷിക്കുന്ന ഓഫീസിലാണ് ശനിയാഴ്ച് രാവിലെ ഏഴുമണിയോടെ തീപ്പിടുത്ത
മുണ്ടായത്.വിധാന്‍ സൗധ പോലീസ് സ്‌റ്റേഷന്‍ ജീവനക്കാരാണ് കെട്ടിടത്തില്‍ നിന്നും പുക ഉയരുന്നതു കണ്ടത്.തുടര്‍ന്ന് അഗ്നി ശമനസേനയെ വിവരമറിയിക്കുകയായിരുന്നു.

കെട്ടിടത്തിലെ അഞ്ചാം നിലയിലാണ് ഓഫീസ് പ്രവര്‍ത്തിക്കുന്നത്.ഷോര്‍ട്ട് സര്‍ക്യൂട്ട് കാരണമാണ് തീപ്പിടുത്ത
മുണ്ടായതെന്നാണ് പ്രാഥമിക നിഗമനം.അതേ സമയം സംഭവത്തില്‍ അട്ടിമറി സാധ്യതകള്‍ തള്ളിക്കളയാനാവില്ലെന്നും അന്വേഷണ ഉദ്യോഗസ്ഥര്‍ പറയുന്നു.വയലികാവല്‍ ഹൗസ് ബില്‍ഡിംഗ് കോ-ഓപ്പറേറ്റീവ് സൊസൈറ്റിയുടെതടക്കമുളള ഭൂമി ഇടപാടു രേഖകള്‍ കത്തിനശിച്ചിട്ടുണ്ട്. ഏകദേശം മൂന്നു ലക്ഷത്തോളം രൂപയുടെ നഷ്ടം സംഭവിച്ചതായാണ് കണക്കാക്കുന്നത്.

സര്‍ക്കാര്‍ ഉത്തരവുകളും വിജ്ഞാപനങ്ങളും കത്തി നശിച്ചവയില്‍പ്പെടുന്നു.അനേകം ഫയലുകളും ഒരുലാപ്‌ടോപ്പു കത്തിനശിച്ചിട്ടുണ്ടെന്ന് റവന്യു വകുപ്പ് ഓഫീസ് അണ്ടര്‍ സെക്രട്ടറി മഹാലക്ഷ്മി പറഞ്ഞു.തീപ്പിടത്തമുണ്ടായ എം എസ് കെട്ടിടത്തില്‍ വിവിധ വകുപ്പുകളുടെ 30 ഓളം ഓഫീസുകള്‍ പ്രവര്‍ത്തിക്കുന്നുണ്ട്.എല്ലാ ഓഫീസുകളിലും രണ്ടുസുരക്ഷാജീവനക്കാരെയും നിര്‍ത്തിയിട്ടുണ്ട്.കെട്ടിടത്തില്‍ സിസിടിവി ക്യാമറ സ്ഥാപിച്ചിരുന്നില്ലെന്നതാണ് പ്രധാന ന്യുനത.ഇടുങ്ങിയ ഓഫീസ് ഘടനയാണ് തീപ്പിടുത്തത്തിനു കാരണമെന്നു ചില ഓഫീസ് ജീവനക്കാര്‍ ആരോപിക്കുന്നു.

അതേസമയം തലേ ദിവസം കമ്പ്യൂട്ടര്‍ ഓഫ് ചെയ്യാന്‍ മറന്നിരുവെന്ന് മറ്റു ചില ജീവനക്കാര്‍ പറഞ്ഞു. കത്തി നശിച്ച ഫയലുകളുടെ പകര്‍പ്പ് കമ്പ്യൂട്ടറില്‍ സൂക്ഷിച്ചിട്ടുണ്ടോ എന്ന ചോദ്യത്തിന് മേലുദ്യോഗസ്ഥന്മാരോട് ചോദിക്കണമെന്നായിരുന്നു ജീവനക്കാരുടെ മറുപടിയെന്ന് സംഭവത്തില്‍ അന്വേഷണം നടത്തുന്ന വിധാന്‍ സൗധ പോലീസ് പറഞ്ഞു. റവന്യു വകുപ്പ് ചീഫ് സെക്രട്ടറി അരവിന്ദ് ജാദവിനെ ഫോണില്‍ ബന്ധപ്പെട്ടെങ്കിലും അദ്ദേഹം പ്രതികരിച്ചില്ലെന്നും പോലീസ് വ്യക്തമാക്കി.