ബൈക്കില്‍ പോവുകയായിരുന്ന ദമ്പതികളെ രണ്ടംഗ സംഘം കുത്തി പരുക്കേല്‍പ്പിച്ചു,ഹെല്‍മറ്റുകൊണ്ടടിച്ചു

ബെംഗളൂരു: രാത്രി ജോലികഴിഞ്ഞു വീട്ടിലേയ്ക്കു പോവുകയായിരുന്ന ദമ്പതികളെ രണ്ടംഗ സംഘം ആക്രമിച്ചു പരുക്കേല്‍പ്പിച്ചു. ബെംഗളൂരു പി ആന്റ് ടി ലേ ഔട്ടില്‍ വെളളിയാഴ്ച്ച രാത്രി 11 മണിയോടു കൂടിയാണ് സംഭവം. ബാബുകുമാറും (35) ഭാര്യ ദിവ്യശാലിനിയും അള്‍സൂരുവില്‍ നിന്നും കെ ആര്‍ പുരത്തേയ്ക്കുള്ള വീട്ടിലേയ്ക്കുപോവുകയായിരുന്നു.

പി ആന്റ് ടി ലേ ഔട്ടിലെത്തിയപ്പോള്‍ ബൈക്കില്‍ അമിത വേഗത്തിലെത്തിയ രണ്ടു യുവാക്കള്‍ ഇവരുടെ ബൈക്കിനെ ഇടിക്കുകയും ഇടിയുടെ ആഘാതത്തില്‍ ശാലിനി മറിഞ്ഞു വീഴുകയുമായിരുന്നു. യുവാക്കളോട് ശ്രദ്ധിച്ച് വാഹനമോടിക്കണമെന്നു പറഞ്ഞപ്പോള്‍ യാതൊരു പ്രകോപനവും കൂടാതെ ആക്രമിക്കുകയായിരുന്നെന്ന് ഇവര്‍ പിന്നീട് പോലീസിനോട് പറഞ്ഞു.

ബാബുകുമാറിന്റെ കണ്ണില്‍ പൊടി വിതറിയതിനുശേഷം അക്രമികള്‍ മാരകായുധം കൊണ്ടു കുത്തി പരിക്കേല്‍പ്പിക്കുയും തടയാന്‍ ചെന്ന ശാലിനിയെ ഹെല്‍മറ്റുകൊണ്ട് മര്‍ദ്ദിക്കുകയുമായിരുന്നു. അപ്രതീക്ഷിതമായി അതുവഴി കടന്നു വന്ന ബാബുകുമാറന്റെ സുഹൃത്താണ് ഇവരെ ആശുപത്രിയില്‍ പ്രവേശിപ്പിച്ചത്.

ഉടന്‍ ഇദ്ദേഹത്തെ അടിയന്തിര ശസ്ത്രക്രിയക്ക് വിധേയമാക്കുകയും ചെയ്തു. സംഭവത്തില്‍ പോലീസ് കേസെടുത്ത് അന്വേഷണം തുടങ്ങിയിട്ടുണ്ട്.

English summary

A 35-year-old man and his wife, riding back home at night, were brutally attacked by two men on a bike