ഹാഫ് മാരത്തോണിനിടെ ടെക്കി കുഴഞ്ഞുവീണ് മരിച്ചു

ബെംഗളൂരു: 21 കിലോമീറ്റര്‍ ഹാഫ് മാരത്തോണിനിടെ സോഫ്റ്റ്‌വെയര്‍ എഞ്ചിനീയര്‍ കുഴഞ്ഞുവീണ് മരിച്ചു. ഞായറാഴ്ച രാവിലെ രാമനഗരം ജില്ലയിലായിരുന്നു സംഭവം. ബെംഗളൂരു ഇലക്ട്രോണിക്‌സ് സിറ്റിയിലെ താമസക്കാരനായ പ്രകാശ് ഗുപ്തയാണ് മരിച്ചത്. 27 വയസ്സായിരുന്നു. ഉത്തര്‍ പ്രദേശ് സ്വദേശിയാണ് ഇയാള്‍

പ്രകാശ് ഗുപ്ത 5 കൂട്ടുകാര്‍ക്കൊപ്പമാണ് ഹാഫ് മാരത്തോണിന് രജിസ്റ്റര്‍ ചെയ്തത്. ഓടുന്നതിനിടെ ഹൃദായാഘാതത്തെ തുടര്‍ന്ന് ഇയാള്‍ കുഴഞ്ഞുവീഴുകയായിരുന്നു. ഓട്ടക്കാര്‍ക്കൊപ്പമുണ്ടായിരുന്ന വൈദ്യസംഘം പ്രാഥമിക ശുശ്രൂക്ഷകള്‍ നല്‍കിയ ശേഷം രാമനഗരത്തെ അഭി ആശുപത്രിയില്‍ എത്തിച്ചു.

പിന്നീട് ഇവിടെ നിന്നും ആംബുലന്‍സില്‍ രാജരാജേശ്വരി ആശുപത്രിയിലേക്ക് മാറ്റി. എന്നാല്‍ ഈ ശ്രമങ്ങള്‍ക്കൊന്നും പ്രകാശ് ഗുപ്തയുടെ ജീവന്‍ രക്ഷിക്കാനായില്ല. യെല്ലോ ആന്‍ഡ് റെഡ് എന്ന ടീമാണ് ഹാഫ് മാരത്തോണ്‍ സംഘടിപ്പിച്ചത്. ഇവരുടെ പ്രസിഡണ്ട് അമിത് രാജ് ശിവത്തെ ഫോണില്‍ ബന്ധപ്പെടാന്‍ ശ്രമിച്ചെങ്കിലും കിട്ടിയില്ല.

അഭൂതപൂര്‍വ്വമായ പ്രതികരണമാണ് ഹാഫ് മാരത്തോണിന് കിട്ടിയത്. 21.1, 11, 7 കിലോമീറ്റര്‍ വിഭാഗങ്ങളിലായി 1245 പേരാണ് ഓടാനെത്തിയത്. രാവിലെ 6.45 നാണ് മൂന്ന് കാറ്റഗറികളിലായി ഓട്ടം തുടങ്ങിയത്. ബസവനപുരയിലാണ് ഹാഫ് മാരത്തോണിന്റെ രണ്ടാം എഡിഷന്‍ തുടങ്ങിയത്.

English summary

Techie dies of cardiac arrest during run in Bengaluru