വിവേക് ഒബ്രോയിയുടെ ഭാര്യാ സഹോദരനും പ്രതിപട്ടികയില്, രാഗിണി രണ്ടാം പ്രതി, ഉന്നതരിലേക്ക് കേസ്!!
ബെംഗളൂരു: മയക്കുമരുന്ന് കേസില് ക്രൈംബ്രാഞ്ചിന്റെ പ്രതിപ്പട്ടികയില് 11 പേര്. പ്രമുഖ നടി രാഗിണി ദ്വിവേദി രണ്ടാം പ്രതിയാണ്. എന്നാല് ഇവിടം കൊണ്ട് കാര്യങ്ങള് അവസാനിച്ചിട്ടില്ല. നടന് വിവേക് ഒബ്രോയിയുടെ ഭാര്യാ സഹോദരനും കേസില് ഉള്പ്പെടുത്തിട്ടുണ്ട്. പ്രതിപ്പട്ടികയില് ആദിത്യ ആല്വയുടെ പേരുമുണ്ട്. ബിജെപിയുടെയും ജെഡിയുവിന്റെയും നേതാവായിരുന്ന ജീവരാജ് ആല്വയുടെ മകനാണ് ആദിത്യ. അമ്മ നന്ദിനി ആല്വ പ്രശസ്ത നര്ത്തകിയാണ്. ഇവരുടെ മകള് പ്രിയങ്ക ആല്വയെയാണ് വിവേക് ഒബ്റോയ് വിവാഹം കഴിച്ചത്.
ബെംഗളൂരുവിലെ പാര്ട്ടി കേന്ദ്രങ്ങളില് വളരെ പ്രശസ്തമായ പേരാണ് ആദിത്യ ആല്വയുടേത്. അതുകൊണ്ട് തന്നെ അദ്ദേഹത്തിന്റെ പേര് പ്രതിപ്പട്ടികയില് വന്നത് എല്ലാവരെയും ഞെട്ടിച്ചിരിക്കുകയാണ്. അതേസമയം ഇതുവരെ ആദിത്യയെ പോലീസ് കസ്റ്റഡിയില് എടുത്തിട്ടില്ല. അദ്ദേഹത്തിനെ ഉടന് തന്നെ ചോദ്യം ചെയ്യുമെന്നാണ് സൂചന. ലഹരി ഇടപാടിലെ മുഖ്യ കണ്ണിയെന്ന് കരുതുന്ന ശിവപ്രകാശാണ് കേസിലെ ഒന്നാം പ്രതി. അറസ്റ്റിലായ ആഫ്രിക്കന് സ്വദേശിക്ക് ചലച്ചിത്ര പ്രവര്ത്തകരുമായുള്ള ഇടപാടിന്റെ തെളിവുകളും ക്രൈംബ്രാഞ്ചിന് ലഭിച്ചു.
ഇന്നലെ ബെംഗളൂരുവില് പിടിയിലായ ആഫ്രിക്ക സ്വദേശി ലോം പെപ്പര് സാംബ, നടി രാഗിണി ദ്വിവേദിയുടെ സുഹൃത്ത് രവിശങ്കറുമായും പലതവണ ഇടപാടുകള് നടത്തിയിട്ടുണ്ട്. വരും ദിവസങ്ങളില് കൂടുതല് പേരെ ചോദ്യം ചെയ്യുമെന്നാണ് വ്യക്തമാകുന്നത്. ബെംഗളൂരു നഗരത്തിലും ലഹരിവേട്ട ശക്തമാക്കിയിട്ടുണ്ട്. അതേസമയം ഒന്നാം പ്രതി ശിവപ്രകാശിനെ ഇനിയും കണ്ടെത്താനായിട്ടില്ല. നഗരത്തില് ഉന്നതര്ക്കായുള്ള ലഹരി പാര്ട്ടികളുടെ സംഘാടകന് വിരേന് ഖന്നയാണ് കേസിലെ മൂന്നാം പ്രതി.
അതേസമയം അറസ്റ്റിലായ രാഗിണി ദ്വിവേദി കര്ണാടക നിയമസഭാ ഉപതിരഞ്ഞെടുപ്പില് ബിജെപിയുടെ താരപ്രചാരകയായിരുന്നു. കെആര് പേട്ട മണ്ഡലത്തില് വീടുകയറിയിറങ്ങിയുള്ള പ്രചാരണത്തില് താരം സജീവമായിരുന്നു. കെസി നാരായണ ഗൗഡയായിരുന്നു ഇവിടെ ബിജെപി സ്ഥാനാര്ത്ഥി. രാഗിണിയും യെഡിയൂരപ്പയും മകനും ഒരുമിച്ച് നില്ക്കുന്ന ചിത്രങ്ങള് സമൂഹ മാധ്യമങ്ങളില് പ്രചരിച്ചിരുന്നു. ഇവര് നേരത്തെ ബിജെപിയില് ചേരുമെന്ന് വാര്ത്തകളുണ്ടായിരുന്നു. ഇവര് നിരവധി റോഡ് ഷോകളിലും പങ്കെടുത്തിരുന്നു.