ഇനി അനില് അംബാനിയുടെ കാലം? കഴുത്തറ്റം കടത്തില് നിന്ന് വമ്പന് തിരിച്ചുവരവ്, ഇന്ന് നിര്ണായകം
മുംബൈ: കഴുത്തറ്റം കടത്തില് നിന്ന് വമ്പന് തിരിച്ചുവരവിന്റെ പാതയിലാണ് അനില് അംബാനി. സഹോദരന് മുകേഷ് അംബാനി ലോകസമ്പന്നരുടെ പട്ടികയില് ഓരോ പടികള് കയറിക്കൊണ്ടിരുന്നപ്പോള് കടങ്ങളും നഷ്ടക്കണക്കുകളും മാത്രമായിരുന്നു അനില് അംബാനിയ്ക്ക് കൂട്ട്. ഒരുകാലത്ത് ഇന്ത്യയിലെ ആദ്യ പത്ത് സമ്പന്നരില് ഒരാളായിരുന്ന അനില് അംബാനി അവിശ്വസനീയമാംവിധം തകര്ന്നടിയുകയായിരുന്നു.
എന്നാല് കഴിഞ്ഞ ഒരു മാസക്കാലമായി അനില് അംബാനിയും അദ്ദേഹത്തിന്റെ ഉടമസ്ഥതയിലുള്ള റിലയന്സ് ഇന്ഫ്രാസ്ട്രക്ചറും മികച്ച നേട്ടമാണ് കൊയ്തത്. ഒരാഴ്ച്ചയ്ക്കുള്ളില് 50 ശതമാനം മൂല്യമാണ് ഓഹരികള്ക്ക് വര്ധിച്ചിരുന്നത്. അനിലിന്റെ മകന് ജയ് അന്മോള് അംബാനിയുടെ വരവാണ് കമ്പനിക്ക് തുണയായത്. ഇപ്പോഴിതാ അടുത്ത ഘട്ടത്തിലേക്ക് കാലെടുത്ത് വെക്കാനിരിക്കുകയാണ് അനില് അംബാനിയും അദ്ദേഹത്തിന്റെ ടീമും.
ഭീമമായ കടങ്ങളില് നിന്ന് മുക്തമായ റിലയന്സ് പവര് ലിമിറ്റഡ് അതിന്റെ അടുത്ത ഘട്ടത്തിനുള്ള പദ്ധതികള് പ്രഖ്യാപിച്ചിരിക്കുകയാണ്. ബിഎസ്ഇയുടെ അറിയിപ്പ് അനുസരിച്ച് സാധ്യതയുള്ള ധനസമാഹരണത്തെക്കുറിച്ച് ചര്ച്ച ചെയ്യുന്നതിനായി കമ്പനി ഇന്ന് ഒരു ബോര്ഡ് മീറ്റിംഗ് ഷെഡ്യൂള് ചെയ്തിട്ടുണ്ട്. കമ്പനിയുടെ ഭാവി സുസ്ഥിരമാക്കുന്നതിന് വേണ്ട പദ്ധതികള്ക്കായുള്ള തീരുമാനങ്ങള് ഇന്നത്തെ യോഗത്തില് ഉണ്ടാകാനാണ് സാധ്യത.
ഈ മാസം ആദ്യം, വിദര്ഭ ഇന്ഡസ്ട്രീസ് പവര് ലിമിറ്റഡിന്റെ ഗ്യാരന്ററായി റിലയന്സ് പവര് അതിന്റെ കടബാധ്യതകള് തീര്ത്തിരുന്നു. വിദര്ഭ ഇന്ഡസ്ട്രീസ് പവര് ലിമിറ്റഡിന്റെ കുടിശ്ശികയുള്ള 3,872.04 കോടി രൂപ കടം അടച്ചുതീര്ത്തതായി കമ്പനി റിപ്പോര്ട്ട് ചെയ്തു. അതിന്റെ ഫലമായി വിഐപിഎല്ലുമായി ബന്ധപ്പെട്ട കോര്പ്പറേറ്റ് ഗ്യാരന്റികളും മറ്റ് പ്രതിബദ്ധതകളും പുറത്തിറങ്ങി.
റിലയന്സ് പവര്, സിഎഫ്എം അസറ്റ് റീകണ്സ്ട്രക്ഷന് പ്രൈവറ്റ് ലിമിറ്റഡുമായി ഒരു കരാറിലെത്തിയിട്ടുണ്ട്. ഇതിന്റെ ഭാഗമായി കോര്പ്പറേറ്റ് ഗ്യാരന്റികളുടെ വിട്ടുകൊടുക്കലിന് പകരമായി വിഐപിഎല്ലിന്റെ 100% ഓഹരികളും പണയം വെച്ചു. റിലയന്സ് പവറിന്റെ സ്റ്റോക്ക് സമീപ മാസങ്ങളില് ശക്തമായ പ്രകടനം പുറത്തെടുത്തത്. കഴിഞ്ഞ ആറ് മാസത്തിനുള്ളില് 52.54% ഉം കഴിഞ്ഞ വര്ഷത്തേക്കാള് 90.51% ഉം ആയി ഓഹരി ഉയര്ന്നു.
കഴിഞ്ഞ മൂന്ന് വര്ഷത്തിനിടെ 170.26% ഉം കഴിഞ്ഞ അഞ്ച് വര്ഷങ്ങളില് 1149.14% ഉം ആയി സ്മോള്-ക്യാപ് സ്റ്റോക്ക് ഉയര്ന്നു. ശക്തമായ പ്രകടന ചരിത്രവും പുതിയ കട രഹിത നിലയും ഉള്ളതിനാല്, റിലയന്സ് പവറിന്റെ വരാനിരിക്കുന്ന ധനസമാഹരണം കമ്പനിയുടെ കൂടുതല് വളര്ച്ചയെ സൂചിപ്പിക്കുന്നതാണ് എന്നാണ് ബിസിനസ് വിദഗ്ധരും ചൂണ്ടിക്കാണിക്കുന്നത്.
Click it and Unblock the Notifications
Sign in with Google