സ്വർണ്ണ വില കുതിച്ചു; ലാഭം കൊയ്ത് ജ്വല്ലറി ഉടമകള്; ഈ പ്രമുഖ ബ്രാന്ഡിന്റെ ലാഭത്തില് 52.5 ശതമാനം വർധനവ്
സ്വർണ വിലയിലെ വർധനവ് ജ്വല്ലറി ഉടമകളുടെ ലാഭത്തിലുണ്ടാക്കിയത് വന്വർധനവ്. രാജ്യത്തെ പ്രമുഖ ആഭരണ-വാച്ച് നിർമാതാക്കളായ ടൈറ്റൻ മാത്രം 2025 ജൂൺ പാദത്തിൽ ലാഭത്തില് 52.5 ശതമാനം വർധനവ് രേഖപ്പെടുത്തിയെന്നാണ് അന്താരാഷ്ട്ര വാർത്താ ഏജന്സിയായ റോയിട്ടേഴ്സ് റിപ്പോർട്ട് ചെയ്യുന്നത്. സ്വർണ വിലയിലെ ഉയർച്ചയാണ് ഈ വളർച്ചയ്ക്ക് പ്രധാന കാരണമെന്നും കമ്പനി വ്യക്തമാക്കി.
വില ഉയർന്നപ്പോള് ഉപഭോക്താക്കൾ കുറഞ്ഞ കാരറ്റ്, ഭാരം കുറഞ്ഞ ആഭരണങ്ങൾ തിരഞ്ഞെടുത്തിട്ടും ടൈറ്റന്റെ ലാഭം ഏറിയെന്നതാണ് ശ്രദ്ധേയം. തനിഷ്ക്, കാരറ്റ്ലെയ്ൻ എന്നീ ബ്രാൻഡുകളുടെ മാതൃ കമ്പനിയാ ടൈറ്റന് ഈ പാദത്തിൽ 10.91 ബില്യൺ രൂപ (ഏകദേശം 125 മില്യൺ ഡോളർ) ലാഭം നേടി. മുൻ വർഷം ഇതേ കാലയളവിൽ ഇത് 7.15 ബില്യൺ രൂപയായിരുന്നു. കമ്പനിയുടെ മൊത്തം വരുമാനം 21% വർധിച്ച് 148.14 ബില്യൺ രൂപയുമായി.
ഈ കാലയളവില് സ്വർണ വില 5.5% ഉയർന്നു. അമേരിക്കയിലെ വ്യാപാര അനിശ്ചിതത്വങ്ങളും മിഡിൽ ഈസ്റ്റിലെ ഭൗമരാഷ്ട്രീയ സംഘർഷങ്ങളും സുരക്ഷിത നിക്ഷേപ മാർഗമായ സ്വർണത്തിലേക്ക് നിക്ഷേപകരെ ആകർഷിച്ചു. ഉപഭോക്താക്കളുടെ എണ്ണത്തിൽ വർധനവില്ലെങ്കിലും, നിക്ഷേപ-ഗ്രേഡ് സ്വർണ നാണയങ്ങളുടെയും കുറഞ്ഞ കാരറ്റ് ആഭരണങ്ങളുടെയും വിൽപ്പന കാരണം ടൈറ്റന്റെ ആഭ്യന്തര വിൽപ്പനയിൽ ഇരട്ട അക്ക വളർച്ച രേഖപ്പെടുത്തി.
"സ്വർണം അലങ്കാരമെന്ന നിലയിലും മൂല്യ സംഭരണ മാർഗമെന്ന നിലയിലും ഉപഭോക്താക്കൾക്കിടയിൽ വിശ്വാസം നിലനിർത്തുന്നു," ടൈറ്റൻ മാനേജിംഗ് ഡയറക്ടർ സി.കെ. വെങ്കടരാമൻ പറഞ്ഞു. ടൈറ്റന്റെ ആഭരണ വിഭാഗമായ തനിഷ്ക്, സോയ, മിയ തുടങ്ങിയ ബ്രാൻഡുകളാണ് മൊത്തം വരുമാനത്തിന്റെ 88% വിഹിതം നൽകുന്നു. ഈ വിഭാഗത്തിന്റെ വിൽപ്പന 19% വർധിച്ചു.
കമ്പനിയുടെ EBIT (ലാഭം - പലിശയും നികുതിയും കുറയ്ക്കുന്നതിന് മുമ്പ്) മാർജിൻ 9.8%-ൽ നിന്ന് 11.8%-ലേക്ക് മെച്ചപ്പെട്ടു. എന്നാൽ, സ്വർണ വിലയിലെ തുടർച്ചയായ വർധനവ് 11%-11.5% എന്ന കോർ ലാഭ മാർജിൻ ലക്ഷ്യത്തെ ബാധിച്ചേക്കുമെന്ന് ടൈറ്റന്റെ ഫിനാൻസ് ചീഫ് ഫെബ്രുവരിയിൽ മുന്നറിയിപ്പ് നൽകിയിരുന്നു. രണ്ടാമത്തെ വലിയ വിഭാഗമായ വാച്ചുകളുടെ വരുമാനം 24% വർധിച്ചു. ഉയർന്ന വരുമാനമുള്ള ഉപഭോക്താക്കൾ പ്രീമിയം ടൈംപീസുകൾ തിരഞ്ഞെടുത്തതും ഈ വളർച്ചയ്ക്ക് കാരണമായി.
അമേരിക്ക അടക്കമുള്ള വിദേശ വിപണികളിലും ടൈറ്റന്റെ വളർച്ച തുടരുകയാണ്. യു.എസ്. വിപണിയിൽ കുറഞ്ഞ നിരക്ക് ഉറപ്പാക്കാൻ ഗൾഫ് മേഖലയിൽ ഒരു ഉൽപ്പാദന കേന്ദ്രം സ്ഥാപിക്കുന്ന കാര്യം കമ്പനി പരിഗണിക്കുന്നുണ്ടെന്ന് മാനേജിംഗ് ഡയറക്ടർ സി.കെ. വെങ്കടരാമൻ റോയിട്ടേഴ്സിനോട് വെളിപ്പെടുത്തി. ഉയർന്ന സ്വർണ വിലയും സാമ്പത്തിക അനിശ്ചിതത്വങ്ങളും ഉപഭോക്താക്കളെ നിക്ഷേപ-ഗ്രേഡ് സ്വർണത്തിലേക്ക് ആകർഷിക്കുന്നു. ഇത് ടൈറ്റന്റെ തനിഷ്ക്, കാരറ്റ്ലെയ്ൻ ബ്രാൻഡുകൾക്ക് പ്രയോജനം ചെയ്യുന്നു.
അതേസമയം, യു എ ഇയിലെ പ്രമുഖ ജ്വല്ലറി ഗ്രൂപ്പിന്റെ ഭൂരിപക്ഷം ഓഹരികളും ടൈറ്റൻ അടുത്തിടെ ഏറ്റെടുത്തിരുന്നു. ജി സി സി മേഖലയിലെ തന്നെ പ്രമുഖ കമ്പനിയായ ഡമാസ് യു എ ഇയുടെ 67 ശതമാനം ഓഹരികളാണ് ടൈറ്റൻ സ്വന്തമാക്കിയതെന്ന് റിപ്പോർട്ടുകള് വ്യക്തമാക്കുന്നു. ഏകദേശം 1038 മില്യൺ യുഎഇ ദിർഹത്തിന്റെ, അതായത് 2357.25 കോടി രൂപയുടെ ഇടപാടാണ് നടന്നത്. ഇടപാട് പൂർത്തിയായതോടെ, ടൈറ്റന് യുഎഇ, സൗദി അറേബ്യ, ഖത്തർ, ഒമാൻ, കുവൈത്ത്, ബഹ്റൈൻ എന്നീ ഗൾഫ് സഹകരണ കൗൺസിൽ (GCC) രാജ്യങ്ങളിലെ ദമാസിന്റെ ബിസിനസ്സും ട്രേഡ്മാർക്കും ഉടമസ്ഥാവകാശം ലഭിക്കും
Click it and Unblock the Notifications
Sign in with Google