ഒറ്റ പോസ്റ്റിന് 8 ലക്ഷം രൂപ! പ്രിയ വാര്യർ വീണ്ടും ഞെട്ടിക്കുന്നു... ബോളിവുഡ് താരങ്ങളെ വെല്ലും

By Desk

Published: Friday, February 23, 2018, 14:19 [IST]

സോഷ്യല്‍ മീഡിയയില്‍

ഒമര്‍ ലുലു സംവിധാനം ചെയ്യുന്ന 'ഒരു അഡാര്‍ ലൗ' എന്ന സിനിമയിലെ ആദ്യ ഗാനം പുറത്തിറങ്ങിയപ്പോള്‍ തന്നെ പ്രിയ വാര്യര്‍ പ്രശസ്തയായി. ഗാനത്തിലെ നിമിഷങ്ങള്‍ മാത്രം ദൈര്‍ഘ്യമുള്ള ചില രംഗങ്ങളായിരുന്നു പ്രിയയെ പ്രശസ്തിയുടെ കൊടുമുടിയില്‍ എത്തിച്ചത്. സോഷ്യല്‍ മീഡിയയില്‍ വന്‍ താരവും ആയി.

ഇന്‍സ്റ്റാഗ്രാമില്‍ റെക്കോര്‍ഡ്

ഇന്‍സ്റ്റാഗ്രാമില്‍ ആയിരുന്നു പ്രിയ ശരിക്കും റെക്കോര്‍ഡ് സൃഷ്ടിച്ചത്. ഒറ്റ ദിവസം കൊണ്ട് ഏറ്റവും കൂടുതല്‍ ഫോളോവേഴ്‌സിനെ സ്വന്തമാക്കിയ റെക്കോര്‍ഡില്‍ മൂന്നാം സ്ഥാനം സ്വന്തമാക്കി പ്രിയ. ഇതോടെ ആഗോള തലത്തില്‍ തന്നെ പ്രിയ വലിയ വാര്‍ത്താ പ്രാധാന്യം നേടി.

പ്രൊമോഷനും തുടങ്ങി

താരമായതിന് തൊട്ടുപിറകേ പ്രിയ വാര്യരുടെ സോഷ്യല്‍ മീഡിയ അക്കൗണ്ടുകള്‍ വഴി പരസ്യവും തുടങ്ങിയതായാണ് പറയുന്നത്. പെയ്ഡ് പ്രൊമോഷനുകള്‍ പ്രിയ നടത്തുന്നു എന്ന രീതിയിലും ആക്ഷേപം ഉയര്‍ന്നിരുന്നു.

ഒറ്റ പോസ്റ്റിന് എട്ട് ലക്ഷം?

സോഷ്യല്‍ മീഡിയയില്‍ ഇത്തരം പ്രൊമോഷണല്‍ പോസ്റ്റുകള്‍ ഇടുന്നതിന് പ്രിയ പണം വാങ്ങുന്നുണ്ട് എന്നാണ് പുതിയ ചര്‍ച്ചകള്‍. ഒറ്റ പോസ്റ്റിന് എട്ട് ലക്ഷം രൂപയാണ് വാങ്ങുന്നത് എന്നാണ് ആരോപണം. ട്വിറ്ററിലാണ് ഇത് സംബന്ധിച്ച ചര്‍ച്ചകള്‍.

ഗബ്ബാര്‍ പറയുന്നു

ട്വിറ്ററില്‍ ഏറെ ഫോളോവേഴ്‌സ് ഉള്ള ഒരു ഐഡിയാണ് ഗബ്ബാര്‍ എന്നത്. അഭിഷേക് അസ്താന എന്ന മാര്‍ക്കറ്റിങ് കക്ഷിയാണ് ഇത്. ഇദ്ദേഹമാണ് ഇപ്പോള്‍ പ്രിയ ഒറ്റ പോസ്റ്റിന് വേണ്ടി എട്ട് ലക്ഷം രൂപ വരെ വാങ്ങുന്നു എന്ന് വെളിപ്പെടുത്തിയിരിക്കുന്നത്.

ബോളിവുഡ് താരങ്ങള്‍ പോലും

പല ബോളിവുഡ് താരങ്ങളും ഇത്തരത്തില്‍ തങ്ങളുടെ പേജുകള്‍ വഴി പ്രൊമോഷന്‍ നടത്താറുണ്ട്. അതിന് പണവും വാങ്ങാറുണ്ട്. എന്നാല്‍ ഏറ്റവും പ്രധാനപ്പെട്ട ബോളിവുഡ് താരങ്ങള്‍ പോലും പ്രിയ പ്രകാശ് വാര്യര്‍ വാങ്ങുന്ന അത്രയും പണം വാങ്ങാറില്ലെന്നാണ് ഗബ്ബാര്‍ തന്റെ ട്വീറ്റില്‍ പറയുന്നത്.

Just to update Priya Prakash varrier -the wink girl - is charging 8L for one social media post, that's more than most A-list bollywood actors.
— Gabbbar (@GabbbarSingh) February 23, 2018

ഗബ്ബാറിന്റെ ട്വീറ്റ്

ഇതാണ് ഗബ്ബാറിന്റെ ട്വീറ്റ്. താങ്കള്‍ക്ക് എങ്ങനെ അറിയാം, പ്രിയ ഇത്രയധികം പണം വാങ്ങുന്ന കാര്യം എന്നും ചോദിക്കുന്നവരുണ്ട്. പ്രിയ വാര്യര്‍ ഇങ്ങനെ പണം വാങ്ങുന്നതില്‍ എന്താണ് കുഴപ്പം എന്ന് ചോദിക്കുന്നവരും കുറവല്ല.

രണ്ട് കോടി ചോദിച്ചെന്ന്

ഇതിനും മുമ്പായിരുന്നു പ്രിയയെ കുറിച്ച് മറ്റൊരു ആരോപണം പുറത്ത് വന്നത്. ഒരു തെലുങ്ക് ചിത്രത്തിന്റെ സംവിധായകനോട് പ്രിയ വാര്യര്‍ രണ്ട് കോടി രൂപ പ്രതിഫലം ആവശ്യപ്പെട്ടു എന്നതായിരുന്നു ആ വാര്‍ത്ത. തെലുങ്ക് മാധ്യമങ്ങള്‍ ഇത് വലിയ തോതില്‍ ആഘോഷിക്കുകയും ചെയ്തിരുന്നു.

കേസ് വേറെ

പാട്ട് ഹിറ്റ് ആയതിനെ തുടര്‍ന്ന് ഹൈദരാബാദില്‍ ഒരു സംഘം ആളുകള്‍ പ്രിയക്കും സംവിധായകന്‍ ഒമര്‍ ലുലുവിനും എതിരെ പരാതിയും കൊടുത്തിരുന്നു. മതവികാരം വ്രണപ്പെടുത്തി എന്നാരോപിച്ചായിരുന്നു അത്. എന്തായാലും ആ കേസില്‍ സുപ്രീം കോടതി പ്രിയ്ക്കും ഒമര്‍ ലുലുവിനും അനുകൂലമായ നിലപാടാണ് സ്വീകരിച്ചത്.

എന്താണ് തെറ്റ്

പ്രിയ വാര്യര്‍ സോഷ്യല്‍ മീഡിയയിലൂടെ പ്രൊമോഷന്‍ നടത്തുന്നുണ്ടെങ്കില്‍ തന്നെ എന്താണ് തെറ്റ് എന്ന ചോദ്യവും ഇതോടൊപ്പം ഉയരുന്നുണ്ട്. പ്രശസ്തി ഉപയോഗപ്പെടുത്തുന്ന ആദ്യത്തെ ആളൊന്നും അല്ലല്ലോ പ്രിയ.

Published On February 23, 2018