പേരിന്റെ ഇനിഷ്യല് പുലിവാലാകും; പാന്കാര്ഡും ആധാറും ബന്ധിപ്പിക്കല് നടപ്പില്ല!!
ദില്ലി: പാന്കാര്ഡില് പേരിനൊപ്പമുള്ള ഇനിഷ്യലുകള് പാന്കാര്ഡുമായി ബന്ധിപ്പിക്കുന്നതിന് തടസ്സമാകുമെന്ന് വിദഗ്ദര്. ആദായ നികുതി സമര്പ്പിക്കുന്നതിനായി ആധാര് കാര്ഡും പാന്കാര്ഡും തമ്മില് ബന്ധിപ്പിയ്ക്കാന് ശ്രമിച്ചപ്പോള് ചെന്നൈയിലെ ഒരു അക്കൗണ്ടന്റാണ് പ്രശ്നം ചൂണ്ടിക്കാണിച്ചത്. ആദായ നികുതി സമര്പ്പിക്കുന്നതിനായി ജൂലൈ 31ഓടെ ലക്ഷക്കണക്കിന് ആളുകള് ആധാര് കാര്ഡും പാന് കാര്ഡും തമ്മില് ബന്ധിപ്പിക്കാനുള്ള നീക്കം നടത്തുന്നതോടെ ഇത് വെല്ലുവിളിയാവുമെന്നാണ് കണക്കുകൂട്ടല്.
പാന്കാര്ഡില് ഇനീഷ്യലിന്റെ പൂര്ണ്ണരൂപം നല്കിയതോ ആധാര് കാര്ഡില് ഇനിഷ്യല് മാത്രം നല്കുകയോ ചെയ്യുന്ന സംഭവഭങ്ങളിലാണ് ഇവ തമ്മില് കൂട്ടി യോജിപ്പിക്കാന് കഴിയാത്തത്. ഇരു കാര്ഡുകളിലും ഒരേ പേരാണെങ്കില് മാത്രമേ കമ്പ്യൂട്ടര് വഴി ഇരു കാര്ഡുകളും ബന്ധിപ്പിക്കല് സാധ്യമാകൂ. വ്യത്യസ്ത പേരുകള് ഉള്ള സാഹചര്യത്തില് ഇവ തമ്മില് ബന്ധിപ്പിക്കുന്നത് സാങ്കേതികമായി വെല്ലുവിളിയുയര്ത്തുന്നു. ആദായ നികുതി സമര്പ്പിക്കുന്നതിന് ആധാര് കാര്ഡും പാന് കാര്ഡും തമ്മില് ബന്ധിപ്പിക്കണമെന്ന നിര്ദേശം കര്ശനമായി പാലിക്കണമെന്ന നിബന്ധന വന്നതോടയാണ് ഈ സാങ്കേതിക പ്രശ്നം ശ്രദ്ധിയ്ക്കപ്പെടുന്നത്.
പാന്കാര്ഡിലുള്ള പ്രത്യേക ക്യാരക്ടറുകള് ചിഹ്നങ്ങള് എന്നിവ ആധാര് കാര്ഡ് അംഗീകരിക്കാത്തതാണ് വെല്ലുവിളിയ്ക്ക് പിന്നില്. പാന്കാര്ഡിലെ പേരുകള്ക്കും ഇനീഷ്യലുകള്ക്കുമിടയിലെ ഫുള്സ്റ്റോപ്പ് എന്നിവും ഇതോടെ പ്രശ്നമാകും. ബാങ്ക് അക്കൗണ്ട് ഉള്പ്പെടെയുള്ള വിവിധ രേഖകളില് അടയാളപ്പെടുത്തിയിട്ടുള്ള പാന്കാര്ഡിലെ വിവരങ്ങള് മാറ്റുക എളുപ്പമല്ലാത്തതും പ്രശ്നം ഗുരുതരമാക്കുന്നു. എന്നാല് കമ്പ്യൂട്ടര് വഴിയല്ലാതെ ഇരു കാര്ഡുകളും ബന്ധിപ്പിക്കുക എന്ന നിര്ദേശമാണ് സാങ്കേതിക വിദഗ്ദര് മുന്നോട്ടുവയ്ക്കുന്നത്.