ഒരു ജിബി ഡാറ്റയ്ക്ക് 49 രൂപ!! റിലയന്‍സ് ജിയോയില്‍ പുതിയ പ്ലാനുകള്‍, ഡാറ്റയും വോയ്സ് കോളും!!

ദില്ലി: കുറഞ്ഞ നിരക്കില്‍ ഡാറ്റാ പ്ലാനുമായി റിലയന്‍സ് ജിയോ. 49 രൂപയ്ക്കാണ് റിലയന്‍സ് 1 ജിബി 4ജി ഡാറ്റ നല്‍കുന്നത്. 28 ദിവസമാണ് ഓഫർ കാലാവധി. റിപ്പബ്ലിക് ദിന പ്രമോഷന്റെ ഭാഗമായാണ് റിലയൻ‍സ് ജിയോ പുതിയ ഓഫർ പുറത്തിറക്കിയിട്ടുള്ളത്. 49 രൂപയുടെ പ്ലാനിന് പുറമേ 11 രൂപ, 21രൂപ, 51 രൂപ, 101 രൂപ എന്നീ നിരക്കുകളിലും ജിയോ ഓഫർ പുറത്തിറക്കിയിട്ടുണ്ട്. എന്നാൽ റിലയന്‍സ് ജിയോ ജൂലൈയില്‍ പുറത്തിറക്കിയ ഫീച്ചര്‍ ഫോണ്‍ ഉപയോക്താക്കള്‍ക്ക് മാത്രമാണ് ഈ പ്രീ പെയ്ഡ് പ്ലാനുകൾ ലഭിക്കുക. വ്യാഴാഴ്ചയാണ് കമ്പനി ഓഫര്‍ പുറത്തിറക്കിയത്.

1ജിബി ഡാറ്റയ്ക്ക് പുറമേ ജിയോ ആപ്പ് സേവനങ്ങളായ ജിയോ മ്യൂസിക്, ജിയോ സിനിമ, ജിയോ ടിവി എന്നിവയുടെ സേവനവും ലഭിക്കും. നോൺ ജിയോ ഫോണ്‍ ഉപയോക്താക്കള്‍ക്ക് 500എംബി ഡാറ്റ നൽകുന്ന പ്ലാൻ ഉടൻ തന്നെ അപ്ഗ്രേഡ് ചെയ്യും. 1ജിബി 1.5 ജിബി എന്ന തോതിലായിരിക്കും പ്ലാന്‍ അപഗ്രേഡ് ചെയ്യുക.

2017ന്റെ നാലാമത്തെ പാദത്തിൽ റിലയന്‍സ് ജിയോ ഫോണാണ് വിപണിയിൽ മുൻപന്തിയിൽ നിൽക്കുന്നതെന്ന് കൗണ്ടർ പോയിന്റ് റിസര്‍ച്ച് വ്യക്തമാക്കിയിരുന്നു. ഇന്ത്യൻ ടെലികോം വിപണയില്‍ റിലയന്‍സ് ജിയോയ്ക്ക് ആധിപത്യമുറപ്പിക്കാൻ ജിയോ ഫീച്ചർ ഫോണ്‍ സഹായിച്ചുവെന്നാണ് ഗവേഷണ ഫലം അവകാശപ്പെടുന്നത്. സാംസംഗിനേയും മൈക്രോമാക്സിനെയും തള്ളി 26 ശതമാനത്തിന്റെ വർധനവാണ് ജിയോയുടെ വിപണി മൂല്യത്തില്‍ ഉണ്ടായിട്ടുള്ളത്. നാലാമത്തെ പാദത്തില്‍ സാംസംഗും മൈക്രോമാക്സും രണ്ടും മൂന്നും സ്ഥാനങ്ങളിലാണുള്ളതെന്നും ഗവേഷണ ഫലം വ്യക്തമാക്കുന്നു.

1500 രൂപയ്ക്കായിരുന്നു റിലയന്‍സ് ജിയോ ആദ്യത്തെ 4ജി ഫീച്ചര്‍ ഫോണ്‍ പുറത്തിറക്കിയത്. മൂന്ന് വര്‍ഷത്തിന് ശേഷം റീഫണ്ട് ചെയ്യാവുന്ന ഈ തുക മാത്രമാണ് ഫോണിന് വേണ്ടി ഈടാക്കിയിരുന്നത്. ഇന്ത്യന്‍ ടെലികോം വിപണിയില്‍ ആധിപത്യമുറപ്പിച്ചിട്ടുള്ള ഭാരതി എയർടെൽ, ബിഎസ്എൻഎൽ, വോഡഫോൺ എന്നീ കമ്പനികളും റിലയന്‍‍സ് ജിയോ തുടക്കം കുറിച്ച ട്രെന്‍ഡിനൊപ്പം ഫോണുകള്‍ പുറത്തിറക്കിയിരുന്നു.

English summary

Reliance Jio on Thursday announced that Jio Phone users can now avail unlimited voice calls and 1GB 4G data for 28 days at a charge of Rs. 49 as part of its Republic Day 2018 promotions. The telco has also launched data add-ons specifically for Jio Phone at Rs. 11, Rs. 21, Rs. 51, and Rs. 101.