അതെ, ജിയോ തന്നെയാണ് വേഗതയില് ഒന്നാമന്, ട്രായിയും അംഗീകരിച്ചു
രണ്ടാമന് ഐഡിയ
മുംബൈ: ടെലികോം റഗുലേറ്ററി അതോറിറ്റി ഓഫ് ഇന്ത്യയും(TRAI) അംഗീകരിച്ചു, വേഗതയില് ജിയോ തന്നെയാണ് ഒന്നാമന് എന്ന്. രാജ്യത്തെ ഏറ്റവും വേഗതയേറിയ 4ജി നെറ്റ്വര്ക്ക് ജിയോ ആണെന്ന് ട്രായ് അംഗീകരിച്ചു. രണ്ടാം സ്ഥാനത്ത് ആദിത്യ ബിര്ളാ ഗ്രൂപ്പിന്റെ ഐഡിയ സെല്ലുലാര് ആണ്. മൂന്നാമത് വോഡാഫോണും. എയര്ടെല് നാലാം സ്ഥാനത്താണ്.
സെക്കന്റില് 19 എംബിയാണ് ജിയോയുടെ ശരാശരി ഡൗണ്ലോഡ് സ്പീഡ്. ഐഡിയയുടേത് സെക്കന്റില് 13.7 എംബിയും. നേരിയ വ്യത്യാസത്തിലാണ് വോഡാഫോണ് മൂന്നാമതെത്തിയത്. വോഡാഫോണിന്റെ ശരാശരി ഡൗണ്ലോഡിങ് വേഗത സെക്കന്റില് 13.3 എംബിയാണ്. തങ്ങളുടെ നെറ്റ്വര്ക്ക് ആണ് ഏറ്റവും വേഗതയേറിയതെന്ന് സ്വയം പ്രഖ്യാപിച്ച എയര്ടെലിന്റെ ഡൗണ്ലോഡിങ് വേഗത സെക്കന്റില് 10.15 എംബിയാണ്. എന്നാല് അപ്ലോഡ് വേഗതിയില് ഐഡിയ ആണു മുന്നില്. സെക്കന്റില് 8.45 എംബിയാണ് ഐഡിയയുടെ അപ്ലോഡ് വേഗത. അപ്ലോഡ് വേഗതയില് രണ്ടാമന് വോഡാഫോണ് ആണ്. സെക്കന്റില് 7.3 എംബി ആണ് വോഡാഫോണിന്റെ അപ്ലോഡ് വേഗത. അപ്ലോഡ് വേഗതയില് മൂന്നാമതാണ് ജിയോ. സെക്കന്റില് 5.3 ആണ് ജിയോയുടെ അപ്ലോഡ് വേഗത.
2016 സെപ്റ്റംബറിലായിരുന്നു ടെലകോം രംഗത്ത് വിപ്ലവം സൃഷ്ടിച്ചുകൊണ്ട് ജിയോയുടെ കടന്നുവരവ്. എയര്ടെല്,ടാറ്റ ഇന്ഡികോം തുടങ്ങി ടെലകോം രംഗത്തെ വമ്പന്മാരുടെയെല്ലാം വരുമാനം ജിയോയുടെ കടന്നുവരവോടെ ഇടിഞ്ഞിരുന്നു.