ലുലുവിന് പൂട്ടിടാന് ഓസ്ട്രേലിയന് ഭീമന്മാർ: 'ഒരു തുണ്ട് ഭൂമി കിട്ടില്ല'; എല്ലാം മുന്കൂട്ടി ബുക്ക് ചെയ്തു
ഓസ്ട്രേലിയയിലേക്ക് പ്രവർത്തനം വ്യാപിപ്പിക്കുന്നുവെന്ന ലുലു ഗ്രൂപ്പിന്റെ സ്വപ്നങ്ങള്ക്കുമേല് കനത്ത വെല്ലുവിളി തീർത്ത് ഓസ്ട്രേലിയന് സൂപ്പർമാർക്കറ്റ് ഭീമന്മാർ. ഒക്ടോബറിൽ പ്രധാനമന്ത്രി ആന്തണി അൽബനീസ് നടത്തിയ യു എ ഇ സന്ദർശനത്തിനിടെ ചെയർമാന് എം എ യൂസഫ് അലിയെ നേരിട്ട് കണ്ടായിരുന്നു ലുലു ഗ്രൂപ്പിന് ഓസ്ട്രേലിയയിലേക്ക് ക്ഷണിച്ചത്.
ഓസ്ട്രേലിയയുടെ 148 ബില്യൺ ഡോളർ സൂപ്പർമാർക്കറ്റ് മേഖലയിൽ 66% വിപണി വിഹിതം കൈവശം വെക്കുന്ന കോള്സ്, വൂള്വർത്ത് എന്നീ കമ്പനികളുമായുള്ള വിപണി മത്സരം വർധിപ്പിക്കുകയെന്നതായിരുന്നു ആല്ബനീസിന്റെ ക്ഷണത്തിന് പിന്നിലെ പ്രധാന കാരണം. ജർമൻ കമ്പനിയായ അൾഡിക്ക് 9 ശതമാനവും മെറ്റ്കാഷിന് (ഐജിഎ, ഫുഡ്ലാൻഡ്) 7 ശതമാനം മാത്രമാണ് വിപണിയില് പങ്കാളിത്തമുള്ളു.
രണ്ട് കമ്പനികളുടെ ഈ ഏകാധിപത്യം വിലകൾ വർധിപ്പിക്കുന്നതിനും ഉപഭോക്താക്കളെ ദോഷകരമായി ബാധിക്കുന്നതിനും കാരണമാകുന്നുവെന്ന ആരോപണങ്ങള് ശക്തമായിരുന്നു. ലുലുവിനെ പ്രധാനമന്ത്രി തന്നെ ഓസ്ട്രേലിയയിലേക്ക് ക്ഷണിച്ചെങ്കിലും അവരുടെ വരവിന് തടസ്സം നില്ക്കുന്ന നിരവധി ഘടകങ്ങള് ഉണ്ടെന്നാണ് റീട്ടെയിൽ വിദഗ്ധനും ക്വീൻസ്ലാൻഡ് യൂണിവേഴ്സിറ്റി ഓഫ് ടെക്നോളജിയിലെ പ്രൊഫസർ ഗാരി മോർട്ടിമർ നേരത്തെ വ്യക്തമാക്കിയിരുന്നു. ഇത് തന്നെയാണ് ഇപ്പോള് സംഭവിച്ചുകൊണ്ടിരിക്കുന്നത്.
മിഡിൽ ഈസ്റ്റിലും ഏഷ്യയിലുമായി 250-ലധികം സ്റ്റോറുകൾ പ്രവർത്തിപ്പിക്കുന്ന ലുലു ഗ്രൂപ്പിന്റെ ഹൈപ്പർമാർക്കറ്റ് മെഗാസ്റ്റോറുകൾ, സാധാരണ ഓസ്ട്രേലിയൻ സൂപ്പർമാർക്കറ്റിനെക്കാൾ മൂന്നിരട്ടി വലുപ്പമുള്ളവയാണ്. അതായത് ശരാശരി 9200 ചതുരശ്ര മീറ്റർ വിസ്തൃതിയുള്ള ലുലു ഹൈപ്പർമാർക്കറ്റുകള്ക്ക് വൂൾവർത്ത്സും കോൾസും പോലുള്ള ഓസ്ട്രേലിയൻ സൂപ്പർമാർക്കറ്റുകളെക്കാള് (2500-3500 ചതുരശ്ര മീറ്റർ) വളരെ അധികം ഭൂമി ആവശ്യമാണ്.
ഒരു മേൽക്കൂരയ്ക്ക് കീഴിൽ പലചരക്ക്, ഗാർഹിക ഉൽപ്പന്നങ്ങൾ, ലൈഫ്സ്റ്റൈൽ ഉൽപ്പന്നങ്ങൾ എന്നിവയുൾപ്പെടെ 85 രാജ്യങ്ങളിൽ നിന്നുള്ള ഉൽപ്പന്നങ്ങൾ വാഗ്ദാനം ചെയ്യുന്നതിനാലാണ് ലുലുവിന് ഇത്രയധികം സ്ഥലം വേണ്ടി വരുന്നത്. ഇത് തന്നെയാണ് ലുലു നേരിടുന്ന ഏറ്റവും വലിയ ബുദ്ധിമുട്ട്. നിരവധി സ്റ്റോറുകള് ആരംഭിച്ചുകൊണ്ട് ഓസ്ട്രേലിയന് വിപണിയിലേക്ക് പ്രവേശിക്കാനാണ് ലുലു ആഗ്രഹിക്കുന്നതെങ്കില് അതിനുള്ള ഭൂമി അവർക്ക് അത്ര പെട്ടെന്ന് ലഭ്യമാകാന് സാധ്യതയില്ലെന്നാണ് വിദഗ്ധർ പറയുന്നത്.
കോൾസും വൂൾവർത്ത്സും ചേർന്ന് 150-ലധികം സ്ഥലങ്ങള് മൂന്കൂട്ടി തന്നെ ബുക്ക് ചെയ്ത് കഴിഞ്ഞു. വിപണിയിലേക്ക് മറ്റൊരു പ്രധാനപ്പെട്ട സൂപ്പർമാർക്കറ്റ് ശൃംഖല കടന്ന് വരാതിരിക്കുകയെന്ന മുന്കരുതലോടെയാണ് ഇരു കമ്പനികളും ചേർന്ന് 'ലാൻഡ് ബാങ്കിങ്' നടത്തുന്നതെന്നാണ് പുറത്ത് വരുന്ന റിപ്പോർട്ടുകള് വ്യക്തമാക്കുന്നത്. വൂൾവർത്ത്സിന് 110, കോൾസിന് 42, ആൾഡിക്ക് 13 എന്നിങ്ങനെയാണ് വികസനം നടക്കാത്ത ഭൂമിയുടെ കണക്കുകൾ. എന്നാല് വൂൾവർത്ത്സും കോൾസും 'ലാൻഡ് ബാങ്കിങ്' ആരോപണങ്ങൾ നിഷേധിച്ചും രംഗത്ത് വന്നിട്ടുണ്ട്.
ലുലു ഹൈപ്പർമാർക്കറ്റ് ഓസ്ട്രേലിയയിലെത്താനുള്ള സാധ്യത കുറവാണ്. ശക്തമായ ചില വെല്ലുവിളികള് അവർക്ക് മുന്നിലുണ്ട്. ഒന്നാമത്തെ പ്രശ്നം സ്ഥലമാണ്. അവരുടെ ഹൈപ്പർമാർക്കറ്റുകൾ വലിയ ഫോർമാറ്റ് ബിസിനസുകളാണ്. അത്തരം വികസനങ്ങൾക്ക് ലഭ്യമായ റിയൽ എസ്റ്റേറ്റ് ഇല്ല. ഇപ്പോൾ മിക്ക പ്രാന്തപ്രദേശങ്ങളിലും ഒരു സൂപ്പർമാർക്കറ്റെങ്കിലും ഉണ്ട്, ചിലയിടങ്ങളിൽ രണ്ടോ മൂന്നോ'ക്വീൻസ്ലാൻഡ് യൂണിവേഴ്സിറ്റി ഓഫ് ടെക്നോളജിയിലെ റീട്ടെയിൽ വിദഗ്ധൻ പ്രൊഫസർ ഗാരി മോർട്ടിമർ പറയുന്നു.
രണ്ടാമത്തെ പ്രശ്നം ജനസാന്ദ്രതയാണ്. ഓസ്ട്രേലിയയിൽ ചെറിയ ജനസംഖ്യയും വലിയ ഭൂപ്രദേശവും. കിഴക്കൻ തീരപ്രദേശം ഇതിനകം തന്നെ കോൾസ്, വൂൾവർത്ത്സ്, ആൾഡി, ഐജിഎ എന്നിവരുടെ മികച്ച സേവനത്തിന് കീഴിലാണ്. ആൾഡിയും കോസ്റ്റ്കോയും പുതുതായി വിപണിയിലേക്ക് വന്ന് സാന്നിധ്യം അറിയിച്ചവരാണ്. എന്നാൽ അവരുടെ ബിസിനസ് മോഡലുകൾ ലുലു ഹൈപ്പർമാർക്കറ്റിന്റേതിൽ നിന്ന് വ്യത്യസ്തമാണ്.
ആൾഡി വേഗത്തിൽ വളർന്നത് ചെറിയ ഫോർമാറ്റ് ബിസിനസായതിനാലും കുറഞ്ഞ ഇൻഫ്രാസ്ട്രക്ചർ ആവശ്യമില്ലാത്തതിനാലുമാണ്. കോസ്റ്റ്കോ മികച്ച പ്രകടനം കാഴ്ചവച്ചു, പക്ഷേ വളർച്ച വളരെ മന്ദഗതിയിലാണ്. അവരുടെ വളർച്ച ലഭ്യമായ ഭൂമിയെയും ഇടത്തെയും ആശ്രയിച്ചിരിക്കുന്നു. അവർ ഡെസ്റ്റിനേഷൻ റീട്ടെയിലറാണ് .അതായത് ആഴ്ചതോറുമുള്ള പലചരക്ക് ഷോപ്പിങിനല്ല, പക്ഷേ രണ്ടാഴ്ച കൂടുമ്പോൾ ബൾക്ക് വാങ്ങലിന് പോകാം. ഓസ്ട്രേലിയയുടെ സൂപ്പർമാർക്കറ്റ് മേഖല മറ്റ് പ്രധാന വിപണികളെ അപേക്ഷിച്ച് ചെറുതാണെന്നതും അന്താരാഷ്ട്ര കമ്പനികളെ നിരുത്സാഹപ്പെടുത്തുന്ന ഘടകമാണെന്ന് മോർട്ടിമർ പറഞ്ഞു.
ഒരു അന്താരാഷ്ട്ര കളിക്കാരൻ ആദ്യ വർഷം 1% അല്ലെങ്കിൽ 2% വിപണി വിഹിതം നേടിയേക്കാം, പക്ഷേ ടെസ്കോ അല്ലെങ്കിൽ ലോബ്ലാസ് പോലുള്ളവർ 10 അല്ലെങ്കിൽ 20 മില്യൺ ഡോളറിന് റോൾഔട്ട് ചെയ്യുന്നില്ല. അൽബനീസിന്റെ ക്ഷണം "സൗഹാർദ്ദപരമായ വാക്കുകൾ" മാത്രമാണ്. അല്ലാതെ ലുലു ഹൈപ്പർമാർക്കറ്റിനെ ഓസ്ട്രേലിയയിലേക്ക് കൊണ്ടുവരാനുള്ള ഉറച്ച പദ്ധതിയല്ലെന്നും മോർട്ടിമർ അഭിപ്രായപ്പെട്ടു.
ലഭ്യമായ റിയൽ എസ്റ്റേറ്റിന്റെ വെല്ലുവിളികളും ജനസാന്ദ്രതാ പ്രശ്നങ്ങളും, ഭക്ഷ്യ-പലചരക്ക് മേഖലയിൽ ഇതിനകം അമിതമായി സേവനം ലഭിക്കുന്ന ജനസംഖ്യയും പരിഗണിക്കുമ്പോൾ, ലുലു പോലുള്ള ഒരു ബിസിനസ് എങ്ങനെ വിജയകരമായി കടന്നുവന്ന് ലാഭകരമാകുമെന്ന് എനിക്ക് മനസ്സിലാക്കാനാകുന്നില്ലെന്നും അദ്ദേഹം കൂട്ടിച്ചേർത്തു.
Click it and Unblock the Notifications
Sign in with Google