തൃശൂരിൽ നിന്ന് ജോലിക്ക് അബുദാബിയിലെത്തി, ഇപ്പോൾ ഒരു ദിവസത്തെ വരുമാനം 180 കോടി! യൂസഫലി എന്ന അത്ഭുത മനുഷ്യൻ

Updated: Thursday, October 19, 2023, 14:39 [IST]

ഇന്ത്യയിലെ ബിസിനസ്കാരെ കുറിച്ചോർക്കുമ്പോൾ മുകേഷ് അംബാനി, ഗൗതം അദാനി തുടങ്ങി പല വമ്പൻമാരുമാണ് നമ്മുടെ മനസിൽ വരിക. എന്നാൽ കേരളത്തിന്റെ വ്യവസായ മുഖമായി എപ്പോഴും നിൽക്കുന്നത് ലുലു ഗ്രൂപ്പ് ചെയർമാൻ ആയ എം എ യൂസഫലിയെ ചുറ്റിപ്പറ്റിയാണ്. എം എ യൂസഫലിയെക്കുറിച്ച് വളരെ കൗതുകകരമായ ഒരു വാർത്തയാണ് ഇപ്പോൾ പുറത്തു വരുന്നത്. ഒരു ദിവസം യൂസഫലി സമ്പാദിക്കുന്നത് 180 കോടി രൂപയാണ് എന്നാണ് ചില റിപ്പോർട്ടുകൾ പറയുന്നത്.

കഴിഞ്ഞ വർഷം ഫോർബ്‌സ് ഇന്ത്യ റിച്ച് ലിസ്റ്റ് 2022 പുറത്തു വിട്ടപ്പോൾ അതിൽ 35-ാമത്തെ സ്ഥാനം നേടിയിരുന്നു എം എ യൂസഫലി. യൂസഫ് അലി മുസലിയാം വീട്ടിൽ അബ്ദുൾ ഖാദർ എന്നാണ് ഇദ്ദേഹത്തിന്റെ മുഴുവൻ പേര്. മിഡിൽ ഈസ്റ്റ്, ഇന്ത്യ, യുഎസ്, യൂറോപ്പ് തുടങ്ങി 23 രാജ്യങ്ങളിൽ വ്യാപിച്ച് കിടക്കുന്ന ലുലു ഗ്രൂപ്പിന്റെ ചെയർമാനും മാനേജിംഗ് ഡയറക്ടറുമാണ് ഇദ്ദേഹം. 65,000-ത്തിലധികം ജീവനക്കാരാണ് ലുലു ഗ്രൂപ്പിൽ പ്രവർത്തിക്കുന്നത്. കമ്പനിയുടെ വാർഷിക വരുമാനം ഏകദേശം 8 ബില്യൺ ഡോളർ അതായത് 66,000 കോടി രൂപയാണ്.

ഫോബ്‌സ് ഇന്ത്യ റിച്ച് ലിസ്റ്റ് പ്രകാരം കേരളത്തിലെ ഏറ്റവും വലിയ കോടീശ്വരനായ എം എ യൂസഫലിയുടെ 2022 ലെ ആസ്തി 43,612.56 കോടി രൂപയാണ്. ഇപ്പോഴത്തെ ഇദ്ദേഹത്തിന്റെ ആസ്തി 7.1 ബില്യൺ ഡോളറാണ്. അതായത് 5,91,18,15,00,000 രൂപ.

ബിസിനസ് മാനേജ്മെന്റിലും അഡ്മിനിസ്ട്രേഷനിലും ഡിപ്ലോമ നേടിയ എം എ യൂസഫലി 1973-ൽ തന്റെ അമ്മാവനൊപ്പം ഒരു ചെറിയ വിതരണ കമ്പനിയിൽ ജോലി ചെയ്യാനായി അബുദാബിയിലേക്കു പോയി. എന്നാൽ അവിടെ നിന്ന് കഷ്ടപ്പെട്ട് കഠിനാധ്വാനം ചെയ്തും 1990-കളിൽ അദ്ദേഹം ആദ്യത്തെ ലുലു സൂപ്പർസ്റ്റോർ ആരംഭിച്ചു. യുഎഇയുടെ തലസ്ഥാന നഗരമായ അബുദാബിയിൽ ലുലു വൻ വിജയം നേടിയതോടെ ആ ശൃംഖല വളർത്താൻ അദ്ദേഹം തീരുമാനിച്ചു. അങ്ങനെ ഗൾഫിലാകെ പടർന്ന ലുലു പതിയെപ്പതിയെ മറ്റു രാജ്യങ്ങളിലേക്കും വ്യാപിച്ചു.

ബിസിനസിനു പുറമേ മറ്റ് ഓർഗനൈസേഷനുകളുടെ പ്രവർത്തനങ്ങളുടെയും ഭാഗമാണ്. സാമൂഹികപരമായുള്ള മാറ്റങ്ങളിലും കേരളത്തിലെ , പ്രത്യേകിച്ച് കൊച്ചിയെ ഇത്ര പ്രസിദ്ധ നഗരമാക്കിയതിലും യൂസഫലിക്ക് വലിയ പങ്കുണ്ട്. ഷബീറ യൂസഫലിയാണ് ഇദ്ദേഹത്തിന്റെ ഭാര്യ.