റിസര്‍വ് ബാങ്ക് വായ്പാ നയം പ്രഖ്യാപിച്ചു: റിപ്പോ നിരക്ക് കാല്‍ശതമാനം കുറച്ചു

റിപ്പോ നിരക്കില്‍ കാല്‍ശതമാനമാണ് റിസര്‍വ് ബാങ്ക് കുറച്ചത്

ദില്ലി: റിസര്‍വ് ബാങ്കിന്‍റെ വായ്പാ നയം പ്രഖ്യാപിച്ചു. അടിസ്ഥാന പലിശ നിരക്കില്‍ കാല്‍ശതമാനമാണ് റിസര്‍വ് ബാങ്ക് കുറച്ചത്. റിപ്പോ നിരക്ക് 6.25ല്‍ നിന്ന് ആറ് ശതമാനമാക്കി കുറയ്ക്കുകയായിരുന്നു. ഇതോടെ കഴിഞ്ഞ ഏഴ് വര്‍ഷത്തെ ഏറ്റവും കുറഞ്ഞ നിരക്കിലാണ് എത്തിനില്‍ക്കുന്നത്. റിവേഴ്സ് റിപ്പോ നിരക്ക് 5.75 ശതമാനമായും കുറയും. ആര്‍ബിഐ ഗവര്‍ണര്‍ ഉര്‍ജിത് പട്ടേലിന്‍റെ നേതൃത്വത്തില്‍ നടന്നുവന്ന പണനയ അവലോകന സമിതിയാണ് ബുധനാഴ്ച റിസര്‍വ് ബാങ്കിന്‍റെ വായ്പാ നയം പ്രഖ്യാപിച്ചത്.

റിസര്‍വ് ബാങ്ക് പലിശ നിരക്കുകള്‍ കുറച്ചതോടെ ഭവന- വാഹന വായ്പയുടെ പലിശനിരക്കുകളും കുറഞ്ഞേക്കും. വാണിജ്യ ബാങ്കുകളില്‍ നിന്ന് റിസര്‍വ് ബാങ്ക് ഈടാക്കുന്ന പലിശ നിരക്കായ റിപ്പോ നിരക്ക് നിലവില്‍ 6.5 ശതമാനമാണ്. നേരത്തെ രണ്ടു തവണയും പണപ്പെരുപ്പം കുറഞ്ഞില്ലെന്ന വാദം ഉന്നയിച്ച് റിപ്പോ നിരക്കില്‍ മാറ്റം വരുത്താന്‍ റിസര്‍വ് ബാങ്ക് തയ്യാറായിരുന്നില്ല. കഴിഞ്ഞ ദിവസം സ്റ്റേറ്റ് ബാങ്ക് ഓഫ് ഇന്ത്യ സേവിംഗ്സ് അക്കൗണ്ടുകളുടെ പലിശനിരക്ക് കുറച്ചിരുന്നു. .5 ശതമാനമാണ് എസ്ബിഐ കുറച്ചത്. ഇത് റിസര്‍വ് ബാങ്കിന്‍റെ നീക്കം മുന്‍കൂട്ടി കണ്ടാണെന്നും സൂചനയുണ്ട്.

English summary

The Reserve Bank of India (RBI) on Wednesday finally cut interest rate, in line with what the Street was largely expecting. Repo rate - the rate at the which the central bank lends short-term money to banks - was cut by 25 basis points to 6 per cent from 6.25 per cent.