സ്വർണം വാങ്ങും, പക്ഷെ രീതി മാറ്റി യുഎഇക്കാർ; വലിയ ലാഭം: കേരളത്തിലും എന്തുകൊണ്ട് പറ്റില്ല
സ്വർണാഭരണങ്ങള് വാങ്ങുന്നതില് വലിയ തോതില് കുറവ് വരുത്തി യുഎഇ നിവാസികള്. സ്വർണവിലയിലുണ്ടായ വർധനവും സാമ്പത്തിക അനിശ്ചിതത്വവും കാരണം ആഭരണങ്ങള്ക്ക് പകരം സ്വർണ കട്ടികളിലും നാണയങ്ങളിലും നിക്ഷേപിക്കുന്നവരുടെ എണ്ണത്തില് വലിയ തോതില് വർധനവ് ഉണ്ടായതായും റിപ്പോർട്ടുകള് വ്യക്തമാക്കുന്നു.
വേൾഡ് ഗോൾഡ് കൗൺസിലിന്റെ ഏറ്റവും പുതിയ കണക്കുകള് പ്രകാരം 2025-ന്റെ രണ്ടാം പാദത്തിൽ യുഎഇയിൽ സ്വർണ ആഭരണങ്ങളുടെ ഡിമാൻഡ് 16 ശതമാനമാണ് കുറഞ്ഞത്. കഴിഞ്ഞ വർഷം ഇതേകാലയളവില് 9.2 ടണ്ണായിരുന്നു യു എ ഇയിലെ സ്വർണാഭരണങ്ങളുടെ ഡിമാന്ഡെങ്കില് ഇത്തവണ അത് 7.7 ആയിട്ടാണ് കുറഞ്ഞത്. തുടർച്ചയായ രണ്ടാം പാദത്തിലാണ് ആഭരണ ഉപഭോഗത്തിൽ ഇടിവ് രേഖപ്പെടുത്തുന്നത്.
അതേസമയം, സ്വർണ കട്ടികളുടേയും നാണയങ്ങളുടെയും ഡിമാൻഡ് 25 ശതമാനം വർധിച്ച്, 2024-ന്റെ രണ്ടാം പാദത്തിൽ 3.3 ടണ്ണിൽ നിന്ന് 2025-ന്റെ രണ്ടാം പാദത്തിൽ 4.1 ടണ്ണായി ഉയർന്നു. കഴിഞ്ഞ പാദവുമായി താരതമ്യപ്പെടുത്തുമ്പോൾ, ഡിമാൻഡ് 31 ശതമാനം വർധിച്ചു. ഇത് ഭൗതിക സ്വർണ ആസ്തികളോടുള്ള വർദ്ധിച്ച താൽപ്പര്യത്തേയും സൂചിപ്പിക്കുന്നു.
നിക്ഷേപ ഡിമാൻഡിൽ വർധനവുണ്ടായിട്ടും, യുഎഇയിലെ മൊത്തം സ്വർണ ഉപഭോഗം രണ്ടാം പാദത്തിൽ 5 ശതമാനം കുറഞ്ഞ് 11.8 ടണ്ണായിട്ടുണ്ട്. എന്നിരുന്നാലും, മുൻ പാദവുമായി താരതമ്യപ്പെടുത്തുമ്പോൾ 7.2 ശതമാനം വർധന രേഖപ്പെടുത്തി എന്നുള്ളതാണ് ശ്രദ്ധേയം. കഴിഞ്ഞ ഒരു വർഷത്തിനിടെ യു എ ഇയിൽ സ്വർണ വില ഏകദേശം 100 ദിർഹം ഉയർന്നു, ഇത് പ്രധാനമായും ആഗോള വില വർധനവിന്റെ ഫലമാണ്. ഭൗമരാഷ്ട്രീയ പിരിമുറുക്കങ്ങൾ, വ്യാപാര തീരുവകൾ, കേന്ദ്ര ബാങ്കുകളുടെ തുടർച്ചയായ വാങ്ങലുകൾ എന്നിവയാണ് ഇതിന് പ്രധാന കാരണം.
വേൾഡ് ഗോൾഡ് കൗൺസിലിന്റെ അഭിപ്രായത്തിൽ, ശരാശരി സ്വർണ വില 40 ശതമാനം വർധിച്ച്, 2024-ന്റെ രണ്ടാം പാദത്തിൽ ഔൺസിന് 2,338 ഡോളറിൽ നിന്ന് 2025-ന്റെ രണ്ടാം പാദത്തിൽ 3,280 ഡോളറായി. വില ഉയർന്നതോടെ യുഎഇ ഉപഭോക്താക്കൾ നിക്ഷേപ ആവശ്യങ്ങൾക്കായി സ്വർണ ബാറുകളും നാണയങ്ങളും തിരഞ്ഞെടുക്കുകയും, വ്യക്തിഗത ഉപയോഗത്തിനായി താരതമ്യേന വില കുറഞ്ഞ 18 കാരറ്റ് ആഭരണങ്ങളിലേക്ക് തിരിയുകയും ചെയ്തു.
"മിഡിൽ ഈസ്റ്റിലെ സ്വർണ ഡിമാൻഡ് രണ്ടാം പാദത്തിൽ ആഗോള പ്രവണതകളെ പ്രതിഫലിപ്പിച്ചു. ഉയർന്ന വിലകളും തുടർച്ചയായ ഭൗമരാഷ്ട്രീയ അസ്ഥിരതയും ഉപഭോക്തൃ മനോഭാവത്തെ തളർത്തിയതിനാൽ, മേഖലയിലെ ആഭരണ ഉപഭോഗം 11 ശതമാനം കുറഞ്ഞു." വേൾഡ് ഗോൾഡ് കൗൺസിലിന്റെ മിഡിൽ ഈസ്റ്റ് ആൻഡ് പബ്ലിക് പോളിസി മേധാവി ആൻഡ്രൂ നെയ്ലർ പറയുന്നു.
നിക്ഷേപത്തിനായുള്ള സ്വർണ ബാറുകളുടെയും നാണയങ്ങളുടെയും ഡിമാൻഡ് മേഖലയിൽ ജി സി സി മേഖലയില് 4 ശതമാനമാണ് വർധിച്ചതെങ്കിലും, യുഎഇ പ്രാദേശിക നിക്ഷേപകർ സുരക്ഷിതമായ നിക്ഷേപം തേടുന്നതിനാൽ ശ്രദ്ധേയമായ വർധനവാണ് കാണിച്ചത്. "മറ്റ് വിപണികളിൽ, ചില നിക്ഷേപകർ തുടർച്ചയായ വില വർധനയ്ക്കിടയിൽ ലാഭം ഉറപ്പാക്കാൻ തിരഞ്ഞെടുത്തു," അദ്ദേഹം കൂട്ടിച്ചേർത്തു.
2025-ന്റെ രണ്ടാം പകുതിയിലേക്ക് നോക്കുമ്പോൾ, സ്വർണം മിഡിൽ ഈസ്റ്റിൽ തുടർന്നും ആകർഷകമായിരിക്കുമെന്നും നെയ്ലർ പ്രതീക്ഷിക്കുന്നു. എങ്കിലും വില ഉയർന്ന് നില്ക്കുന്നത് ആഭരണത്തിനുള്ള ഡിമാൻഡിനെ പരിമിതപ്പെടുത്തിയേക്കാമെന്നും വിപണി വിദഗ്ധർ ചൂണ്ടിക്കാട്ടുന്നു.
ആഗോളതലത്തിൽ, 2025-ന്റെ രണ്ടാം പാദത്തിൽ മൊത്തം സ്വർണ ഡിമാൻഡ് 45 ശതമാനം ഉയർന്ന് 132 ബില്യൺ ഡോളറിലെത്തി. "നിക്ഷേപകരുടെ ഒഴുക്കാണ് വിലവർധനവിനുള്ള പ്രധാനം കാരണം. സുരക്ഷിത ഡിമാൻഡും റെക്കോർഡ് സ്വർണ വിലയും ഇതിന് കാരണമാകുന്നു. കേന്ദ്ര ബാങ്കുകളുടെ വാങ്ങലുകൾ ശക്തമായി തുടർന്നുണ്ടെങ്കിലും മുൻ വർഷങ്ങളെ അപേക്ഷിച്ച് അല്പം കുറവാണ്. ആഭരണ ഡിമാൻഡിന്റെ അളവ് കുറഞ്ഞെങ്കിലും, ഉയർന്ന സ്വർണ വില കാരണം അതിന്റെ മൊത്തം മൂല്യം വർധിച്ചു," വേൾഡ് ഗോൾഡ് കൗൺസിൽ റിപ്പോർട്ട് പറയുന്നു.
അതേസമയം, ആഭരണങ്ങള് വാങ്ങുന്നത് കുറച്ച് മലയാളികളു സ്വർണ്ണം കട്ടികളായും നാണയങ്ങളായും വാങ്ങുന്നതിലേക്ക് കൂടുതലായി തിരിയണമെന്നും സാമ്പത്തിക വിദഗ്ധർ അഭിപ്രായപ്പെടുന്നു. ആഭരണങ്ങള് വാങ്ങുമ്പോള് പണിക്കൂലി ഇനത്തില് വലിയൊരു തുക കൊടുക്കേണ്ടി വരും. കട്ടികള്ക്കും നാണയങ്ങള്ക്കും ഈ പ്രശ്നമില്ല. ഡിജിറ്റല് ഗോള്ഡിലേക്കാണ് തിരിയുന്നതെങ്കില് നഷ്ടപ്പെടുമോ എന്നത് അടക്കമുള്ള വെല്ലുവിളികളേയും അതിജീവിക്കാം.
Click it and Unblock the Notifications
Sign in with Google