പൊങ്കലിന് ലീവില്ല, മുതലാളിയുടെ ഭാര്യയെ കുത്തികൊന്നു
ചെന്നൈ: അങ്ങാടിയില് തോറ്റതിന് അമ്മയുടെ നെഞ്ചത്ത് കേറിയിട്ട് വല് കാര്യവുമുണ്ടോ.. പഴഞ്ചൊല്ലിനെ ഓര്മിപ്പിക്കുന്നതാണ് ചെന്നൈയില് നടന്ന ഈ സംഭവം. പൊങ്കലിന് ബോണസും ലീവും നിഷേധിച്ചതിന് തൊഴിലാളി മുതലാളിയുടെ വീട്ടില് പോയി ഭാര്യയെ കുത്തിക്കൊന്നു. ഭാര്യയെ മാത്രമല്ല, മക്കളെയും ഇയാള് ആക്രമിച്ചു, കുട്ടികളുടെ ജീവന് രക്ഷിക്കാന് ഡോക്ടര്മാര്ക്ക് കഴിഞ്ഞു.
ചെന്നൈ അമ്പത്തൂരിലെ ഒരു ഹോട്ടല് ജീവനക്കാരനായ വിഘ്നേശ്വരന് എന്ന 25 കാരനാണ് ഈ ക്രൂരകൃത്യം നടത്തിയത്. തിങ്കളാഴ്ച രാത്രി മുതലാളിയുടെ വീട്ടിലെത്തി ഭാര്യയെയും കുട്ടികളെയും കത്തി കൊണ്ട് കുത്തിവീഴ്ത്തിയ ശേഷം ഇയാള് ഒന്നുമറിയാത്തത് പോലെ ജോലിസ്ഥലത്ത് തിരിച്ചെത്തുകയായിരുന്നു. സി സി ടി വി ക്യാമറ ദൃശ്യങ്ങളില് നിന്നാണ് ഈ അരുംകൊല ചെയ്തത് വിഘ്നേശ്വറാണ് എന്ന് തിരിച്ചറിഞ്ഞത്.
രാത്രി എട്ടരയോടെയാണ് വിക്കി എന്ന വിഘ്നേശ്വര് മുതലാളിയായ മൈക്കല് രാജിന്റെ വീട്ടില് ആക്രമണം നടത്തിയത്. പതിനൊന്നരയോടെ വീട്ടിലെത്തിയപ്പോളാണ് മൈക്കല് രാജ് വീട്ടുകാര് ആക്രമിക്കപ്പെട്ടത് കണ്ടത്. അപ്പോഴേക്കും ഭാര്യ അരോക്കിയ വനിത മരിച്ചിരുന്നു. അഞ്ചുവയസ്സുകാരന് ഡീനിഷ്, 2 വയസ്സുകാരി പ്രിന്സിക എന്നിവര് സാരമായി പരിക്കേറ്റ നിലയിലായിരുന്നു.
എഗ്മോറിലെ ആശുപത്രിയിലെത്തിച്ച കുട്ടികളുടെ ജീവന് രക്ഷിക്കാന് ഡോക്ടര്മാര്ക്ക് സാധിച്ചു. രണ്ട് വയസ്സുകാരിയായ പ്രിന്സികയുടെ കഴുത്തില് 11 മുറിവുകളാണ് ഉണ്ടായിരുന്നതെന്ന് കാഞ്ചി കാമകോടി ആശുപത്രി അധികൃതര് അറിയിച്ചു. നാല്പ്പതിനായിരം രൂപയും വനിതയുടെ കഴുത്തിലുണ്ടായിരുന്ന സ്വര്ണാഭരണങ്ങളും വിക്കി മോഷ്ടിച്ചതായി അന്വേഷണ ഉദ്യോഗസ്ഥര് പറഞ്ഞു.