ഭര്‍ത്താവിനെ കൊന്നു, റിയാലിറ്റി ഷോയില്‍ കുന്പസാരം

ചെന്നൈ: കഥയല്ലിത് ജീവിതം എന്നത് ഒരു റിയാലിറ്റി ഷോയുടെ പേരാണ്. ഈ വാര്‍ത്ത വായിക്കുന്നവരോട് ലേഖകന് പറയാനുള്ളതും ഇത് തന്നെയാണ്. കഥയല്ല, ജീവിതം തന്നെയാണ് ഈ പറയാന്‍ പോകുന്നത്. കാമുകനെയും കൂട്ടി ഭര്‍ത്താവിനെ കൊലപ്പെടുത്തിയ കാര്യം റിയാലിറ്റി ഷോയില്‍ വെച്ച് കുമ്പസാരിച്ച 39 കാരിയായ സ്ത്രീയുടെ ജീവിതകഥയാണിത്.

2010 ല്‍ ഭര്‍ത്താവ് രാധാകൃഷ്ണനെ കൊലപ്പെടുത്തിയ കാര്യമാണ് 39 കാരിയായ ബേബി കല ടി വി റിയാലിറ്റി ഷോയില്‍ തുറന്ന് പറഞ്ഞത്. കാമുകനായ ഗൗരി ശങ്കറിന്റെ സഹായത്തോടെയാണത്രെ കല ഭര്‍ത്താവിനെ കൊലപ്പെടുത്തിയത്. കഴിഞ്ഞ ദിവസം ഒരു തമിഴ് ചാനലില്‍ നടന്ന റിയാലിറ്റി ഷോയിലാണ് കല ഇക്കാര്യങ്ങള്‍ തുറന്നുപറഞ്ഞത്.

കാമുകനായ ഗൗരി ശങ്കര്‍ മറ്റൊരു സ്ത്രീയുമായതിന്റെ പക തീര്‍ക്കാന്‍ വേണ്ടിയാണ് ഇവര്‍ ഇപ്പോള്‍ ഭര്‍ത്താവിനെ കൊലപ്പെടുത്തിയ കാര്യങ്ങള്‍ പുറത്ത് വിട്ടത് എന്നാണ് റിപ്പോര്‍ട്ട്. റിയാലിറ്റി ഷോയില്‍ കാര്യങ്ങള്‍ വെളിപ്പെടുത്തി പകയൊക്കെ തീര്‍ത്തെങ്കിലും കാമുകനായ ഗൗരീ ശങ്കറിനൊപ്പം കലയും പോലീസിന്റെ പിടിയിലായി.

15 വര്‍ഷം മുന്‍പാണ് കലയും രാധാകൃഷ്ണനും വിവാഹിതരായത്. ചെന്നൈ വില്ലുവാക്കത്തായിരുന്നു ഇവരുടെ താമസം. ഭര്‍ത്താവിനോട് വഴക്കിടാറുണ്ടായിരുന്ന കല അയല്‍വാസിയായ ഗൗരി ശങ്കറുമായി അടുപ്പത്തിലായി. രാധാകൃഷ്ണന്റെ ശല്യം ഒഴിവാക്കി ഒരുമിച്ച് ജീവിക്കാന്‍ വേണ്ടിയാണ് ഇവര്‍ രണ്ടുപോരും ചേര്‍ന്ന് 2010 ല്‍ ഈ കൊല നടത്തിയത്.

English summary

Man's murder comes to light after wife's confession on TV reality show in Chennai.