ബ്രഹ്മപുരം തീപിടിത്തം; കളക്ടര് ഹാജരായില്ല, ബുധനാഴ്ച എത്തണമെന്ന് ഹൈക്കോടതി
കൊച്ചി: ബ്രഹ്മപുരം മാലിന്യ ശേഖരണ മാലിന്യ പ്ലാന്റിലെ തീപിടിത്തത്തില് രൂക്ഷ വിമര്ശനവുമായി ഹൈക്കോടതി. ജില്ലാ കളക്ടര് രേണു രാജിനോട് ബുധനാഴ്ച കോടതിയില് ഹാജരാകാന് കോടതി നിര്ദ്ദേശിച്ചു. വിഷയത്തില് കഴിഞ്ഞ ദിവസം ഹൈക്കോടതി സ്വമേധയ കേസെടുത്തിരുന്നു. ജസ്റ്റിസ് ദേവന് രാമചന്ദ്രന് സമര്പ്പിച്ച കത്തിന്റെ അടിസ്ഥാനത്തിലാണ് ഹൈക്കോടതി വിഷയത്തില് ഇടപെട്ടത്.
ചൊവ്വാഴ്ച കേസ് പരിഗണിക്കുന്നതിന് മുമ്പ് തന്നെ കൊച്ചി കോര്പ്പറേഷന് സെക്രട്ടറി, പൊല്യൂഷന് കണ്ട്രോള് ബോര്ഡ് ചെയര്മാന് തുടങ്ങിയവരോട് നേരിട്ട് ഹാജരാകാന് കോടതി നിര്ദ്ദേശിച്ചിരുന്നു. ഇതോടൊപ്പം എറണാകുളം കളക്ടറോടും ഹാജരാകാന് നിര്ദ്ദേശിച്ചിരുന്നു. എന്നാല് കളക്ടര് ഹാജരായില്ല. പകരം ദുരന്ത നിവാരണ ചുമതലയുള്ള ഒരു ഉദ്യോഗസ്ഥനാണ് കോടതിയില് എത്തിയത്. എന്നാല് കളക്ടര് നേരിട്ട് ഹാജരാകാത്തതില് കോടതി അതൃപ്തി പ്രകടിപ്പിച്ചു.
കേസ് പരിഗണിച്ച ജഡ്ജിമാരില് ഒരാള് ശനിയാഴ്ച താന് നടക്കാനിറങ്ങിയപ്പോള് കടുത്ത പുകയുണ്ടായിരുന്നെന്നും ശ്വാസം മുട്ടല് അനുഭവപ്പെട്ടതിനെ തുടര്ന്ന് പ്രഭാത സവാരി അവസാനിപ്പിച്ച് മടങ്ങിയെ്നും പറഞ്ഞു. തന്റെ അയല്ക്കാരിയായ കളക്ടര്ക്ക് ഇതുവരെ പുകയുടെ ബുദ്ധിമുട്ട് അനുഭവപ്പെട്ടില്ലേയെന്ന് കോടതി പരിഹാസ രൂപേണ ചോദിച്ചു. കളക്ടര് നാളെ ഹാജരാകാനാണ് കോടതി നിര്ദ്ദേശിച്ചിരിക്കുന്നത്.
അതേസമയം, ബ്രഹ്മപുരം മാലിന്യ പ്ലാന്റില് തീ നിയന്ത്രണ വിധേയമാക്കാന് കഴിഞ്ഞെങ്കിലും പുക ഉയരുന്ന സാഹചര്യമുണ്ട്. പുക ശമിപ്പിക്കുന്നതിന് ഫയര് ആന്റ് റെസ്ക്യൂവിന്റെ നേതൃത്വത്തില് ശ്രമങ്ങള് തുടരുകയാണ്. 30 ഫയര് യൂണിറ്റുകളാണ് പ്രവര്ത്തിക്കുന്നത്. ഒരു യൂണിറ്റില് 40,000 ലിറ്റര് വെള്ളമാണ് ഉപയോഗിക്കുന്നത്. 120 അഗ്നിസുരക്ഷാ സേനാംഗങ്ങളാണ് പുക ശമിപ്പിക്കാനായി രംഗത്തുളളത്. കൂടാതെ കൊച്ചി കോര്പ്പറേഷന് ജീവനക്കാരുമുണ്ട്.
നേവിയുടെ ഹെലികോപ്ടറില് മുകളില് നിന്ന് വെള്ളം പമ്പ് ചെയ്യുന്നുണ്ട്. സിയാലില് നിന്നുള്പ്പടെ യന്ത്രസാമഗ്രികള് ബ്രഹ്മപുരത്തെത്തിച്ചിട്ടുണ്ട്. മാലിന്യക്കൂമ്പാരത്തിന്റെ അടിഭാഗത്ത് നിന്നുയരുന്ന പുക ശമിപ്പിക്കാനാണ് ശ്രമം ഊര്ജിതമായി നടക്കുന്നത്. മാലിന്യം ചികഞ്ഞ് മാറ്റി ഉള്വശത്തേക്ക് വെള്ളം പമ്പ് ചെയ്യുകയാണ്.
മാലിന്യക്കൂമ്പാരം ചികയുന്നതിനായി ആറ് ഹിറ്റാച്ചികളാണ് ഉപയോഗിക്കുന്നത്. തീപിടിത്തമുണ്ടായ പ്രദേശം മുഴുവന് വെള്ളത്തിനടിയിലാക്കുന്ന ഫ്ളഡിംഗ് രീതിയിലാണ് പുക ശമിപ്പിക്കുന്നത്. ഇതിന് കടമ്പ്രയാറില് നിന്ന് ഫ്ളോട്ടിംഗ് ജെസിബിയുടെ സഹായത്തോടെ വെള്ളമെടുക്കുന്നുണ്ട്. രണ്ട് ഫ്ളോട്ടിംഗ് ജെസിബികള് ഉപയോഗിക്കുന്നു. ആലപ്പുഴയില് നിന്നെത്തിച്ച വലിയ രണ്ട് ഡീ വാട്ടറിംഗ് പമ്പുകളും ചെറിയ പമ്പുകളും ഉപയോഗിക്കുന്നുണ്ട്. കൂടുതല് ജെസിബികളും ഉപയോഗപ്പെടുത്തും.
Click it and Unblock the Notifications
Sign in with Google