ഹോളി ആഘോഷത്തിനിടെ സംഘർഷം; കാലടി ശ്രീശങ്കര കോളെജിൽ രണ്ട് പേർക്ക് കുത്തേറ്റു

ഹോളി ആഘോഷത്തിന്റെ ഭാഗമായി കോളജിൽ വിദ്യാർഥികൾ സംഘടിപ്പിച്ച ഡിജെ പാർട്ടിയിൽ പുറത്തുനിന്നുള്ളവരും പൂർവവിദ്യാർഥികളും പങ്കെടുത്തിരുന്നു

എറണാകുളം: കാലടി ശ്രീശങ്കര കോളെജിൽ നടന്ന ഹോളി ആഘോഷത്തിനിടെ സംഘർഷം. രണ്ട് പേർക്ക് കുത്തേറ്റു. ഇതിൽ ഒരാളുടെ നില ഗുരുതരമാണെന്ന് റിപ്പോർട്ട്. പൂർവ്വ വിദ്യാർത്ഥിയായ പെരുമ്പാവൂർ മുണ്ടക്കൽ വീട്ടിൽ അരുൺ ശിവൻ (24), കോളേജിൽ പഠിക്കുന്ന കോടനാട് പാലാട്ടി വീട്ടിൽ ആദിത്യൻ (20) എന്നിവർക്കാണ് കുത്തേറ്റത്. ഇരുവരും അങ്കമാലി എൽ.എഫ് ആശുപത്രിയിൽ തീവ്രപരിചരണ വിഭാഗത്തിൽ ചികിസയിലാണ്. അരുൺ ശിവന്‍റെ വയറ്റിൽ ആണ് കുത്തേറ്റത്. നില ഗുരുതരമാണ്.

ഹോളി ആഘോഷത്തിന്റെ ഭാഗമായി കോളജിൽ വിദ്യാർഥികൾ സംഘടിപ്പിച്ച ഡിജെ പാർട്ടിയിൽ പുറത്തുനിന്നുള്ളവരും പൂർവവിദ്യാർഥികളും പങ്കെടുത്തിരുന്നു. യുവാവിനെ കുത്തിയ വിദ്യാർഥിയും ഇവിടെ നേരത്തെ പഠിച്ചയാളാണ്. ഇരുവരും തമ്മിലുള്ള വ്യക്തി വിരോധമാണ് കത്തിക്കുത്തിൽ കലാശിച്ചത് എന്നാണ് വിവരം. സംഭവുമായി ബന്ധപ്പെട്ട് ഒരാൾ പിടിയിലായതായും, അഞ്ചോളം പേർക്ക് എതിരെ കേസ് എടുത്തതായും പോലീസ് അറിയിച്ചു.

ചൊവ്വാഴ്ച ഉച്ചയ്ക്ക് ആരംഭിച്ച പരിപാടി കോവിഡ് മാനദണ്ഡങ്ങൾ ഒന്നും പാലിക്കാതെയായിരുന്നു സംഘടിപ്പിച്ചതെന്ന ആരോപണവുമുണ്ട്. കോളേജിന് പുറത്ത് നിന്ന് വന്നവരടക്കം ആയിരത്തോളം പേർ പങ്കെടുത്തിരുന്നു. നിരവധി പെൺകുട്ടികളും ഉണ്ടായിരുന്നു. കാമ്പസിനകത്ത് എസ് ബ്ലേക്കിന് സമീപം പ്രത്യേകം സ്റ്റേജ് കെട്ടിയാണ് പരിപാടി നടത്തിയത്. പൊലീസിനെയും ആരോഗ്യവകുപ്പിനെയും അനുമതിയില്ലാതെയായിരുന്നു പരിപാടി.

English summary

Clash in Sree Sankara College kalady during holi celebration