മദ്യലഹരിയിൽ തർക്കം; കൊച്ചിയിൽ നൈറ്റ് കഫേ അടിച്ചുതകർത്ത് 26കാരിയും സംഘവും

Updated: Saturday, April 27, 2024, 14:07 [IST]

കൊച്ചി: പനമ്പള്ളി നഗറിൽ നൈറ്റ് കഫേ അടിച്ച് തകർത്ത് ജീവനക്കാരെ പരിക്കേൽപ്പിച്ച യുവതിയും സംഘവും അറസ്റ്റിലായി. പനമ്പിള്ളി നഗർ ഷോപ്പിംഗ് കോംപ്ലക്സിലെ സാപിയൻസ് കഫറ്റീരിയയിൽ ആയുധങ്ങളുമായി എത്തിയാണ് സംഘം ആക്രമണം നടത്തിയത്. സംഭവത്തിൽ കോട്ടയം സ്വദേശിനി ലീന ( 26 ), ഇടുക്കി കട്ടപ്പന മേപ്പാറ ഏഴാച്ചേരിയിൽ ജെനിറ്റ് ( 23), വയനാട് കല്പറ്റ മുണ്ടേരി പറമ്പിൽ ഹൗസിൽ സിനാൻ ( 22 ), കോട്ടയം ചങ്ങനാശ്ശേരി നാലുകോടി ഇടശ്ശേരി ഹൗസിൽ ആദർശ് ദേവസ്യ ( 22 ) എന്നിവരാണ് സൗത്ത് പോലീസിന്റെ പിടിയിലായത്.

സംഭവ സ്ഥലത്ത് നിന്ന് രക്ഷപ്പെട്ട സംഘത്തിലെ കണ്ടാലറിയാവുന്ന നാല് പേർക്ക് എതിരെ പോലീസ് കേസെടുത്തു. ഇവരെ കണ്ടെത്താൻ തിരച്ചൽ തുടരുകയാണ് എന്നാണ് പോലീസ് പറഞ്ഞത്. കഫറ്റീരിയയിൽ ഭക്ഷണം കഴിക്കാൻ എത്തിയ ലീനയും മുൻ സുഹൃത്തുക്കളും തമ്മിൽ വാക്ക് തർക്കവും കയ്യാങ്കളിയും ഉണ്ടായിരുന്നു. മദ്യ ലഹരിയിലായിരുന്ന യുവതിയെ പിന്തിരിപ്പിക്കാൻ ശ്രമിച്ചപ്പോൾ അത് സംഘർൽത്തിൽ എത്തുകയും ഇവർ എത്തിയ കാറിന്റെ ചില്ല് ഒരാൾ പൊട്ടിക്കുകയും ചെയ്തു.

സംഭവത്തിന് പിന്നാലെയാണ് ലീന പനമ്പിള്ളി നഗറിൽ തന്നെ ഉണ്ടായിരുന്ന യുവാക്കളെ കൂട്ടി വന്ന് രാത്രി പത്തേ കാലോടെ പരാക്രമം നടത്തിയത്. ബേസ് ബോൾ ബാറ്റ്, ഇരുമ്പ് വടി എന്നിവ ഉപയോഗിച്ച് ഉള്ള അടിയേറ്റ് കടയുടമ ഫോർട്ട് കൊച്ചി സ്വദേശി അമൻ അഷ്ക്കറിനും പാർട്ണർക്കും സുഹൃത്തിനും രണ്ട് ജീവനക്കാർക്കും പരിക്കേറ്റു.

കടയിലെ സാധന സാമഗ്രികളും സംഘം തല്ലിത്തകർത്തു. മൂന്ന് ലക്ഷം രൂപയുടെ നഷ്ടം ഉണ്ടായതായി പോലീസ് പറയുന്നു. സംഭവ സ്ഥലത്ത് എത്തിയ പോലീസ് ലീന ഉൾപ്പെടെ നാല് പേരെ പിടികൂടി. മറ്റുള്ളവർ അവിടെ നിന്നും കടന്നുകളഞ്ഞു. പ്രതികളെ കോടതിയിൽ ഹാജരാക്കി റിമാന്റ് ചെയ്തിരിക്കുകയാണ്..