എറണാകുളത്ത് ഇനി സൗജന്യ വൈ-ഫൈ; കെ ഫൈ എങ്ങനെ ഉപയോഗിക്കാം? അറിയാം വിശദമായി..

കൊച്ചി: എറണാകുളം ജില്ലയിലെ 221 പൊതുയിടങ്ങളിൽ കേരള ഐടി മിഷന്റെ സൗജന്യ വൈ - ഫൈ സേവനം ഉടൻ എത്തും. ഇന്റർനെറ്റ് എല്ലാ പൗരന്മാരുടെയും അവകാശമാണ് എന്ന കേരളത്തിന്റെ പോളിസി അനുസരിച്ചാണ് കൊച്ചി ന​ഗരത്തിൽ അടക്കം ഫ്രീ വൈ - ഫൈ സ്പോട്ടുകൾ അവതരിപ്പിക്കുന്നത്. കെ ഫൈ എന്നാണ് ഇത് അറിയപ്പെടുക.

കെ ഫൈ എന്ന സൗജന്യ വൈ ഫൈ പദ്ധതി വ്യാപിപ്പിക്കുകയാണ് കേരള ഐടി മിഷൻ. ഇതിന്റെ ഭാ​ഗമായിട്ട് വരും ആഴ്ചകളിൽ എറണാകുളം ജില്ലയിലെ 221 ഇടങ്ങളിൽ സൗജന്യ വൈ ഫൈ സ്പോട്ടുകൾ പൂർത്തിയാക്കും. കൊച്ചി ന​ഗരത്തിലെ പ്രധാനപ്പെട്ട സ്ഥലങ്ങളിൽ എല്ലാം ഈ സേവനം ലഭ്യമാകും.

മൊബൈൽ ഫോണുകളിലും ലാപ്ടോപ്പുകളിലും ദിവസവും 1 ജി ബി വരെ ഡാറ്റ 10 എം ബി പി എസ് വേ​ഗത്തിൽ ഉപയോ​ഗിക്കാൻ കഴിയുന്ന രീതിയിലാണ് ഐടി മിഷൻ സൗജന്യ വൈ ഫൈ വിഭാവനം ചെയ്തിരിക്കുന്നത്. സർക്കാർ നിശ്ചയിച്ച പ്രകാരം റീചാർജ് ചെയ്ത് സൗജന്യ 1 ജി ബി പരിധിക്ക് ശേഷവും വൈ ഫൈ ആക്സസ് ചെയ്യാം. ഒരു ഹോട്ട് സ്പോട്ടിൽ നിന്ന് ഒരേ സമയം 100 പേർക്ക് വൈ - ഫൈ ആക്സസ് ലഭിക്കും.

ബസ് സ്റ്റാന്റുകൾ, ജില്ലാ ഭരണകൂട ഓഫീസുകൾ, പ‍ഞ്ചായത്ത് ഓഫീസ്, പാർക്കുകൾ, സർക്കാർ സ്ഥാപനങ്ങൾ, ആശുപത്രി, കോടതി തുടങ്ങിയ ഇടങ്ങളിൽ നിലവിൽ ഈ സൗജന്യ നൈ ഫൈ സേവനം ലഭ്യമാണ്. പൊതുമേഖല ടെലികോം കമ്പനിയായ ബി എസ് എൻ എല്ലിന്റെ സഹായത്തോടയാണ് ഈ പദ്ധതി നടപ്പാക്കുന്നത്.

കെ ഫൈ യിൽ ലോ​ഗിൻ ചെയ്യാൻ എന്താണ് ചെയ്യേണ്ടത്..

പൊതുയിടങ്ങളിൽ സൗജന്യ ഇന്റർനെറ്റ് ലഭിക്കാൻ ഫോണിലോ ലാപ് ടോപ്പിലോ വൈ ഫൈ ഓപ്ഷൻ ഓണാക്കി K-FI നെറ്റ് വർക്ക് സെലക്ട് ചെയ്യുക. ശേഷം തുറന്നുവരുന്ന ലാൻഡഡിം​ഗ് പേജിൽ 10 അക്ക മൊബൈൽ നമ്പർ നൽകി ഓ ടി പി ജനറേറ്റ് ചെയ്യുക. ഒടിപി നൽകിയാൽ സൗജന്യമായി ഉപയോ​ഗിക്കാം. എല്ലാ സർക്കാർ വെബ് സൈറ്റുകളും ആപ്ലിക്കേഷനുകളും സൗജന്യമായി ഈ വൈ ഫൈ വഴി ഉപയോ​ഗിക്കാം എന്ന പ്രത്യേകതയമുണ്ട്.