വിചിത്ര തീരുമാനവുമായി തൃക്കാക്കര നഗരസഭ; രാത്രിയില്‍ ഹോട്ടലുകള്‍ തുറക്കില്ല, കാരണം ഇതാണ്

Updated: Monday, November 6, 2023, 18:19 [IST]

കൊച്ചി: തൃക്കാക്കര നഗരസഭയില്‍ രാത്രിയില്‍ ഹോട്ടലുകള്‍ തുറക്കില്ല. നഗരസഭയാണ് ഇത് സംബന്ധിച്ച തീരുമാനമെടുത്തത്. ഹോട്ടല്‍ ഉടമകളുടെ എതിര്‍പ്പ് അവഗണിച്ചാണ് തീരുമാനം. അടുത്ത ആറ് മാസത്തേക്കാണ് പരിഷ്‌കാരം എന്ന് ചെയര്‍പേഴ്‌സണ്‍ രാധാമണി പിള്ള അറിയിച്ചു. രാത്രി ഭക്ഷണം കഴിക്കാന്‍ ഒട്ടേറെ പേര്‍ വരുന്ന ഹോട്ടലുകള്‍ തൃക്കാക്കരയിലുണ്ട്.

രാത്രി 11 മണി മുതല്‍ പുലര്‍ച്ചെ നാല് മണി വരെയാണ് ഹോട്ടലുകള്‍ അടച്ചിടുക. തട്ടുകടളും തുറക്കില്ല. അടുത്ത ആറ് മാസത്തേക്കാണ് ഈ തിരുമാനം. ഇക്കാര്യത്തില്‍ വിശദമായ ചര്‍ച്ചയ്ക്ക് എട്ടാം തിയ്യതി നഗരസഭ യോഗം ചേരും. രണ്ട് മാസം കഴിഞ്ഞാല്‍ അവലോകന യോഗം ചേര്‍ന്ന ശേഷം തുടര്‍ നടപടികള്‍ കൈക്കൊള്ളുമെന്നും നഗരസഭ അധ്യക്ഷ പറഞ്ഞു.

വര്‍ധിച്ചുവരുന്ന ലഹരി ഉപയോഗമാണ് ഈ കടുത്ത തീരുമാനത്തിലേക്ക് നഗരസഭ എത്താന്‍ കാരണം. ലഹരി ഉപയോഗിക്കുന്ന യുവജനങ്ങള്‍ വര്‍ധിച്ചിട്ടുണ്ടെന്നും രാത്രിയിലാണ് ഇതിന് വേണ്ടി കൂടുതല്‍ പേര്‍ എത്തുന്നതെന്നും ഹോട്ടലുകള്‍ മറയാക്കുന്നുണ്ടെന്നുമാണ് ആരോപണം. ഈ പ്രതിസന്ധിക്കെല്ലാം പരിഹാരമായിട്ടാണ് രാത്രിയില്‍ ഹോട്ടലുകള്‍ അടച്ചിടാന്‍ നഗരസഭ തീരുമാനിക്കുന്നത്.

പോലീസില്‍ നിന്നും എക്‌സൈസില്‍ നിന്നുമെല്ലാമുള്ള വിവരത്തിന്റെ അടിസ്ഥാനത്തിലാണ് നഗരസഭ കടുത്ത നിലപാട് സ്വീകരിച്ചിരിക്കുന്നത്. ഐടി നഗരമായതിനാല്‍ പുറത്തുനിന്നുള്ള നിരവധി പേര്‍ ജോലി ചെയ്യുന്ന സ്ഥലം കൂടിയാണ് തൃക്കാക്കര. രാത്രി ജോലി ചെയ്യുന്നവര്‍, വാഹനം ഓടിക്കുന്നവര്‍, വിദൂര യാത്രക്കാര്‍ തുടങ്ങിയവര്‍ക്കെല്ലാം പ്രയാസമുണ്ടാകുന്ന തീരുമാനമാണിത്.

അതേസമയം, തീരുമാനത്തിനെതിരെ ഹോട്ടല്‍ ഉടമകള്‍ രംഗത്തുവന്നു. ഹോട്ടലുകളില്‍ വരുന്നവരോട് വേഗത്തില്‍ ഭക്ഷണം കഴിച്ച് പോകണം എന്ന് പറയാന്‍ പ്രയാസമുണ്ടെന്ന് വ്യാപാരികള്‍ പറഞ്ഞു. മാത്രമല്ല, നഗരസഭയുടെ പരിധിക്കപ്പുറത്ത് ഹോട്ടലുകള്‍ തുറക്കുമ്പോള്‍ ഇവിടെ മാത്രം അടച്ചിടുന്നതില്‍ എന്തു യുക്തിയാണുള്ളതെന്നും അവര്‍ ചോദിക്കുന്നു. പ്രതിഷേധിക്കാനും വേണ്ടി വന്നാല്‍ നിയമനടപടിയിലേക്ക് കടക്കാനുമുള്ള ഒരുക്കത്തിലാണ് ഹോട്ടലുടമകള്‍.

അതേസമയം, രാത്രി ഭക്ഷണം ഓണ്‍ലൈന്‍ വഴി ബുക്ക് ചെയ്തു വരുത്താമല്ലോ എന്ന് നഗരസഭ അധ്യക്ഷ രാധാമണി പിള്ള പ്രതികരിക്കുന്നു. ഒട്ടേറെ പരാതികള്‍ വരുന്നുണ്ട്. രാത്രി നേരത്തെ കഴിക്കാം. 11 മണി വരെ ഹോട്ടലുകള്‍ തുറക്കും. ബുക്ക് ചെയ്താല്‍ നേരത്തെ ഭക്ഷണം എത്താനുള്ള സൗകര്യമുണ്ട്. മാത്രമല്ല, നേരത്തെ ഭക്ഷണം വാങ്ങിവയ്ക്കാനും സാധിക്കുമെന്നും അധ്യക്ഷ പറഞ്ഞു.

അതേസമയം, വിചിത്രമായ പരിഷ്‌കരണമാണ് നഗരസഭ നടപ്പാക്കുന്നതെന്ന വിമര്‍ശനം ഉയര്‍ന്നുകഴിഞ്ഞു. പോലീസ് സംവിധാനവും എക്‌സൈസ് വകുപ്പിന്റെ പ്രവര്‍ത്തനവും ശക്തിപ്പെടുത്തുകയാണ് വേണ്ടതെന്നും പകരം കടകള്‍ അടച്ചിടുന്നത് ഉചിതമല്ലെന്നും നഗരസഭയുടെ തീരുമാനത്തെ എതിര്‍ക്കുന്നവര്‍ വാദിക്കുന്നു. ഏതായാലും എട്ടാം തിയ്യതി ചേരുന്ന യോഗം നിര്‍ണായകമാകും.