അഭിമന്യൂ കൊലപാതകം: സിപിഎം ഭീകരവാദികള്ക്ക് കേരളത്തില് വളരാന് അവസരം നല്കുന്നു. സിപിഎം പ്രാദേശിക അംഗങ്ങള് ബിജെപിയിലേക്ക്... കൂടുമാറിയത് സിപിഎം നിലപാടുകളെ വിമര്ശിച്ച്...
മറയൂര്: മറയൂരിലെ നിരവധി സിപിഎം പ്രവര്ത്തകര് ബിജെപിയില് ചേര്ന്നു. അഭിമന്യൂകേസിലെ യഥാര്ത്ഥ പ്രതികളെ അറസ്റ് ചെയ്യാതെ ഭീകരവാദികള്ക്ക് കേരളത്തില് വളരാന് അവസരം ഒരുക്കുന്ന സമീപനമാണ് സി പി എം തുടരുന്നതെന്നും അത്തരം സാഹചര്യത്തില് പാര്ട്ടിയില് തുടരുന്നതിന് താല്പര്യമില്ലെന്നും ചൂണ്ടികാട്ടിയാണ് സിപിഎം ഏരിയകമ്മിറ്റി അംഗമായ സുശീലയുടെ നേതൃത്വത്തില് നിരവധി സിപിഎം പ്രവര്ത്തകര് പാര്ട്ടിവിട്ട് ബിജെപിയില് ചേര്ന്നത്. ശബരിമല സ്ത്രീ പ്രവേശനം, മീശ നോവല് വിഷയം എന്നിവയില് സിപി എം സ്വീകരിച്ച ക്ഷേത്രവിരുദ്ധ നിലപാട് അംഗീകരിക്കനാകില്ലെന്നും സുശീല പറഞ്ഞു.
സി പി എം പ്രാദേശിക നേതാക്കളായ എം.രാജു, രാജി, പട്ടന്, മുത്തു എന്നിവരുടെ നേതൃത്വത്തിലാണ് നിരവധിപേര് സി പി എം ല് നിന്നും ബി െജ പി യിലേക്ക് കൂടുമാറിയത്. ഐ എന് റ്റി യു സി നേതാവായ മനോജിന്റെ നേതൃത്വത്തില് നിരവധി കോണ്ഗ്രസ് പ്രവര്ത്തകരും ബി ജെ പിയില് ചേര്ന്നു.
ബിജെപി ദേവികുളം നിയോജക മണ്ഡലം പ്രസിഡന്റ് വി.എന്. സുരേഷിന്റെ അധ്യക്ഷതയില് ചേര്ന്ന യോഗത്തില് വച്ച് ബി ജെ പി ഇടുക്കി പാര്ലിമെന്റ് മണ്ഡലം കണ്വീനറും, സംസ്ഥാന കമ്മിറ്റി അംഗവുമായ പി.എ.വേലുക്കുട്ടന് പ്രവര്ത്തകരെ പാര്ട്ടിയിലേക്ക് സ്വീകരിച്ചു. തോട്ടംമേഖലയിലടക്കം ബി ജെ പി പാര്ട്ടി പ്രവര്ത്തനം ശക്തിപെടുത്തുമെന്നും പി എ വേലുക്കുട്ടന് പറഞ്ഞു. നിരവധി നേതാക്കള് യോഗത്തില് പങ്കെടുത്തു.