ആദ്യം കൊവിഡ് പിന്നാലെ ന്യൂമോണിയ: 18 ദിവസം ആശുപത്രിക്കിടക്കയിൽ, ആരോഗ്യ നില മെച്ചപ്പെട്ട് മണിയൻ പിള്ള രാജു

കൊച്ചി: കൊറോണ വൈറസ് സ്ഥിരീകരിച്ചതിന് പിന്നാലെയാണ് നടൻ മണിയൻ പിള്ള രാജുവിന് ശബ്ദം നഷ്ടമാകുന്നത്. കൊവിഡിന് പിന്നാലെ ന്യൂമോണിയയും ബാധിച്ചതോടെ മണിയൻ പിള്ള രാജുവിന്റെ നില ഗുരുതരമായിരുന്നു. ഇതോടെ ദിവസങ്ങൾ നീണ്ട ആശുപത്രി വാസത്തിലായിരുന്നു. എന്നാൽ ആരോഗ്യസ്ഥിതി മെച്ചപ്പെട്ടതിന് പിന്നാലെ മണിയൻ പിള്ള രാജു വീട്ടിലേക്ക് എത്തുകയും വിശ്രമത്തിൽ കഴിയുകയുമാണ്.

ഫെബ്രുവരി 26ന് ഒരു പാർട്ട് റെക്കോർഡ് ചെയ്തുുകൊണ്ടിരിക്കെയാണ് മണിയൻ പിള്ള രാജുവിന് കൊവിഡ് സ്ഥിരീകരിക്കുന്നത്. കൊച്ചിയിലായിരുന്നു റെക്കോർഡിംഗ്. അദ്ദേഹത്തിനൊപ്പം തന്നെയുണ്ടായിരുന്ന നടനും എംഎൽഎയുമായ കെബി ഗണേഷ് കുമാറിന് കൊവിഡ് സ്ഥിരീകരിച്ചതിന് തൊട്ടുപിന്നാലെയാണ് മണിയൻ പിള്ള രാജുവിനും കൊവിഡ് ലക്ഷണങ്ങൾ പ്രകടമായത്. തലവേദനയും ചുമയുമായിരുന്നു തുടക്കത്തിൽ അനുഭവപ്പെട്ടത്. തുടർന്ന് നടത്തിയ പരിശോധനയിലാണ് കൊവിഡ് ബാധിച്ചതായി സ്ഥിരീകരണം ലഭിച്ചത്. തൊട്ടുപിന്നാലെ ആശുപത്രിയിൽ പ്രവേശിപ്പിച്ച് ചികിത്സ ഉറപ്പാക്കുകയും ചെയ്തു.

കൊറോണ വൈറസ് ഭേദമായി ആശുപത്രി വിട്ടുവെങ്കിലും തൊട്ടുപിന്നാലെ ന്യൂമോണിയ കൂടി ബാധിക്കുകയായിരുന്നു. ഇതോടെ വീണ്ടും ആശുപത്രിയിൽ പ്രവേിശിപ്പിക്കുകയും ഐസിയുവിലേക്ക് മാറ്റുകയും ചെയ്തു. ഈ സമയത്ത് ശബ്ദം നഷ്ടപ്പെടുകയും ചെയ്തിരുന്നു. തുടർച്ചയായി 18 ദിവസം ആശുപത്രിയിൽ ചികിത്സയിൽ കഴിഞ്ഞ മണിയൻ പിള്ള മാർച്ച് 25ന് വീട്ടിലേക്ക് മടങ്ങുകയും ചെയ്തിരുന്നു. ചികിത്സ തുടരുന്നതിനിടെ 70 ശതമാനം ശബ്ദം തിരിച്ചുകിട്ടിയിട്ടുണ്ട്. ആരോഗ്യം പൂർവ്വ സ്ഥിതിയിലേക്ക് എത്തുന്നതോടെ ടികെ രാജീവ് കുമാറിന്റെ ചിത്രീകരണം നടക്കുന്ന ചിത്രം ബർമുഡയുടെ സൈറ്റിലേക്കാണ് എത്തുക.

English summary

Maniyan Pillai Raju's health condition became better after Covid postive and pneumonia