എറണാകുളത്ത് നടുറോഡില് യുവതിക്ക് നേരെ അതിക്രമം: പ്രതിയെ പിടികൂടിയ പോലീസുകാർക്ക് പോലീസ് മേധാവിയുടെ പ്രശംസ
കൊച്ചി: അര്ദ്ധരാത്രിയിൽ നഗരത്തിലൂടെ ഇരുചക്രവാഹനത്തില് സഞ്ചരിക്കുകയായിരുന്ന യുവതിയെ അധിക്ഷേപിച്ച സംഭവത്തില് അടിയന്തരനടപടി സ്വീകരിച്ച പോലീസ് സംഘത്തിന് സംസ്ഥാന പോലീസ് മേധാവിയുടെ അനുമോദനം. എറണാകുളം സെന്ട്രല് പോലീസ് സ്റ്റേഷന് ഇന്സ്പെക്ടര് എസ് വിജയശങ്കര്, എസ്ഐമാരായ കെ എക്സ് തോമസ്, എം ആര് സരള, സീനിയര് സിവില് പോലീസ് ഓഫീസര്മാരായ കെ എല് അനീഷ്, പി ജി ശ്രീകാന്ത്, വി എസ് ശിഹാബുദ്ദീന്, വി സിന്ധു, സിവില് പോലീസ് ഓഫീസര്മാരായ ഡി രഞ്ജിത്ത് കുമാര്, പി എ ഇഗ്നേഷ്യസ് എന്നിവരാണ് അനുമോദിക്കപ്പെട്ടിട്ടുള്ളത്. ഇവർക്ക് ഡിജിപിയുടെ പ്രശംസാപത്രവും ഗുഡ് സര്വീസ് എന്ട്രിയും നല്കാനാണ് സംസ്ഥാന പോലീസ് മേധാവി ഉത്തരവായത്.
നവംബര് 15ന് രാത്രി 11.30 ന് കൊച്ചിയിലെ ഒരു സുഹൃത്തിന്റെ വീട്ടില് നിന്ന് ഇരുചക്രവാഹനത്തില് മടങ്ങവേയാണ് യുവതിയ്ക്ക് ദുരനുഭവമുണ്ടായത്. പിന്നാലെ എത്തിയ ബൈക്ക് യാത്രക്കാരന് ഹൈക്കോടതി ജംഗ്ഷനു സമീപം വച്ച് സ്ത്രീയെ ആക്രമിക്കുകയും അപമാനിക്കുകയുമായിരുന്നു. ഇതോടെ യുവതി ഉടന് തന്നെ പോലീസിനെ ഫോണില് ബന്ധപ്പെടുകയായിരുന്നു. അവരെ വനിതാ പോലീസ് അടക്കം എത്തി എറണാകുളം നോര്ത്ത് സ്റ്റേഷനിലേക്ക് കൂട്ടിക്കൊണ്ടുപോകുകയായിരുന്നു. തുടര്ന്ന് മൊഴി നല്കുകയും അടുത്തദിവസം രാവിലെ സെന്ട്രല് പോലീസ് ഇന്സ്പെക്ടറെ നേരില് കണ്ട് കാര്യങ്ങള് ധരിപ്പിക്കുകയും ചെയ്തുിരുന്നു.
സംഭവത്തിൽ വിശദമായ അന്വേഷണത്തിനൊടുവില് ഡിസംബര് ഒന്നിന് പോലീസ് പ്രതിയെ പിടികൂടിയിരുന്നു. പരാതിക്കാരിയെ വിളിച്ചുവരുത്തി ആളെ തിരിച്ചറിഞ്ഞ ശേഷമാണ് തുടർനടപടികൾ സ്വീകരിച്ചത്. നിരവധി ക്രിമിനല് കേസുകളില് ഉള്പ്പെട്ടിട്ടുള്ള ആളാണ് പ്രതിയെന്നും പോലീസ് വ്യക്തമാക്കി.
താന് നേരിട്ട ദുരനുഭവവും അര്ദ്ധരാത്രിയില് വളരെ പെട്ടെന്ന് പോലീസ് സഹായം ലഭിച്ചതും വൈകാതെ തന്നെ പ്രതിയെ പിടികൂടിയതും ചൂണ്ടിക്കാട്ടി പരാതിക്കാരി സംസ്ഥാന പോലീസ് മേധാവിയെ ഇ-മെയില് മുഖേന അഭിനന്ദനം അറിയിച്ചിരുന്നു. ഇതിന്റെ അടിസ്ഥാനത്തിലാണ് അന്വേഷണത്തിന് നേതൃത്വം നല്കുകയും പ്രതികളെ പിടികൂടുകയും ചെയ്ത പോലീസ് ഉദ്യോഗസ്ഥര്ക്ക് സംസ്ഥാന പോലീസ് മേധാവി പ്രശംസാപത്രവും ഗുഡ് സര്വീസ് എന്ട്രിയും പ്രഖ്യാപിച്ചത്.
Click it and Unblock the Notifications
Sign in with Google