കൈവിരൽ കടിച്ചുമുറിച്ചു; വാഹന ഷോറൂം മാനേജർ ചികിത്സയിൽ; 4 പേർക്കെതിരെ കേസ്
കട്ടപ്പന: ജീവനക്കാരൻ വാഹന ഷോറൂം മാനേജരുടെ കൈവിരൽ കടിച്ചു മുറിച്ചു. കഴിഞ്ഞ ദിവസം രാത്രി എട്ടരയോടെയാണ് സംഭവം നടന്നത്. വാഹന ഷോറൂമിന്റെ മാനേജർ ഇരട്ടയാർ നത്തുകല്ല് സ്വദേശി ടോമി ജോസഫിന്റെ കൈവിരലാണ് കടിച്ചു മുറിച്ചത്.
പാറക്കടവ് സ്വദേശിയും ഷോറൂമിലെ മുൻ ജീവനക്കാരനുമായ രഞ്ചു, ഇയാൾക്കൊപ്പം ഉണ്ടായിരുന്ന മറ്റ് 3 പേർ എന്നിവർക്ക് എതിരെ പൊലീസ് കേസ് എടുത്തിട്ടുണ്ട്. വെള്ളയാംകുടി കെ എസ് ആർ ടി സി ഡിപ്പോയ്ക്ക് സമീപമാണ് വാഹന ഷോറൂം സ്ഥിതി ചെയ്യുന്നത്.
ഈ സ്ഥാപനത്തിലെ ജോലിയിൽ നിന്നും നേരത്തെ രഞ്ചുവിനെ പിരിച്ചു വിട്ടിരുന്നു. ഇതിന് പിന്നാലെയാണ് സംഭവം നടന്നത്. ഷോറൂമിന് മുന്നിൽ വെച്ചാണ് അക്രമം നടന്നത്. രഞ്ചുവും മറ്റു 3 പേരും കാറിൽ എത്തിയപ്പോൾ ടോമി ഷോറൂമിന് മുന്നിൽ നിന്നിരുന്നു. തുടർന്ന് ബലമായി ടോമിയെ രഞ്ചു പിടിച്ചുവലിച്ചു. എതിർക്കാൻ ശ്രമിച്ചുവെങ്കിലും ടോമി എതിർത്തിരുന്നു.
തുടർന്ന് രഞ്ചുവിന്റെ സുഹൃത്തുക്കളും എത്തിയതോടെ ഷോറൂമിലെ മറ്റു ജീവനക്കാരും ഓടിയെത്തി. ഇതിനിടെ ആയിരുന്നു ടോമിയെ ആക്രമിക്കുകയും കൈവിരൽ കടിച്ചുമുറിക്കുകയും ചെയ്തത്. സംഭവത്തിന് പിന്നാലെ നാലംഗ സംഘം കടന്നു കളഞ്ഞിരുന്നു. പരുക്കേറ്റ ടോമി ആശുപത്രിയിൽ ചികിത്സയിലാണ്.
Recommended Video