സിഖ് വിരുദ്ധ കലാപക്കേസ്: മുൻ കോൺ​ഗ്രസ് എംപി സജ്ജൻ കുമാറിന് ജീവപര്യന്തം

ഡൽഹി: 1984 ലെ സിഖ് വിരുദ്ധ കലാപത്തിനിടെ സരസ്വതി വിഹാറിൽ രണ്ട് പേർ കൊല്ലപ്പെട്ട സംഭവത്തിൽ മുൻ കോൺ​ഗ്രസ് എം പിയായ സജ്ജൻ കുമാറിന് ജീവപര്യന്തം ശിക്ഷ. പ്രത്യേക ജഡ്ജി കാവേരി ബവേജയാണ് വിധി പുറപ്പെടുവിപ്പിച്ചത്. നേരത്തെ സജ്ജൻ കുമാർ കുറ്റക്കാരനാണെന്ന് കോടതി കണ്ടെത്തിയിരുന്നു. കലാപത്തിൽ സജ്ജൻ കുമാർ ഈ ആൾക്കൂട്ടത്തിന്റെ ഭാ​ഗമാവുക മാത്രമല്ല അവർ‌ക്ക് നേതൃത്വം നൽകുകയും ചെയ്തുവെന്നും കോടതി പറഞ്ഞിരുന്നു. കലാപത്തിനിടെ അച്ഛനും മകനുമാണ് കൊല്ലപ്പെട്ടത്.

അപൂർവ്വങ്ങളിൽ അപൂർവ്വമായ കേസെന്ന് പരാമർശിച്ചാണ് പ്രോസിക്യൂഷൻ കേസ് വാദിച്ചത്. വിവിധ മതവിഭാ​ഗങ്ങൾക്കിടയിലുള്ള വിശ്വാസത്തെയും ഐക്യത്തെയും ബാധിക്കുന്ന സംഭവമാണ് ഉണ്ടായതെന്നും അതിനാൽ വധശിക്ഷ നൽകണമെന്നുമായിരുന്നു പ്രോസിക്യൂഷന്റെ വാദം.

ഡൽഹിയിലെ സരസ്വതി വിഹാറിൽ 1984 നവംബർ 1 ന് ജസ്വന്ത് സിം​ഗ്, മകൻ തരുൺ സിം​ഗ് എന്നിവരെ തീ കൊളുത്തി കൊലപ്പെടുത്തുകയും വീട് കൊള്ളയടിക്കുകയും ചെയ്തതാണ് കേസ്. അക്രമി സംഘത്തെ നയിച്ചത് സജ്ജൻ കുമാറാണെന്നായിരുന്നു പ്രത്യേക അന്വേഷണ സംഘത്തിന്റെ കണ്ടെത്തൽ. 1991 ൽ സജ്ജൻ കുമാറിനെതിരെ എഫ് ഐ ആർ രജിസ്റ്റർ ചെയ്തു. എന്നാൽ 3 വർഷത്തിന് ശേഷം തെളിവില്ലെന്ന കാരണത്താൽ കുറ്റപത്രം തള്ളി.

പിന്നീട് 2015 പ്രത്യേക അന്വേഷണ സംഘം രൂപീകരിക്കുകയും 2016 ൽ പുനരന്വേഷണം വേണമെന്ന് ആവശ്യപ്പെടുകയും ചെയ്തു. 2021 ൽ ഈ കേസിൽ സജ്ജൻ കുമാറിനെ അറസ്റ്റ് ചെയ്യുകയായിരുന്നു. ഡൽഹി പാലം കോളനിയിൽ 5 പേർ കൊല്ലപ്പെട്ട കേസിലാണ് ഇതിന് മുൻപ് സജ്ജൻ കുമാറിന് ജീവപര്യന്തം ലഭിച്ചത്. ഇതിനെതിരായ ഹർജി ഇപ്പോഴും സുപ്രീം കോടതിയുടെ പരി​ഗണനയിലാണ്.

1984 ഒക്ടോബർ 31 ന് അന്ന് പ്രധാനമന്ത്രി ആയിരുന്നു ഇന്ദിരാ ​ഗാന്ധിയെ സിഖ് അം​ഗരക്ഷകർ വെടിവെച്ച് കൊന്നതിന് തുടർന്നാണ് കലാപം പൊട്ടിപ്പുറപ്പെട്ടത്. ഇന്ദിരാ​ ​ഗാന്ധിയുടെ പ്രതികാരത്തിന് പകരം ചെയ്യാൻ സായുധരായ ഒരു കൂട്ടം ആളുകൾ സിഖുകാരുടെ സ്വത്ത് വകകൾ വൻതോതിൽ കൊള്ളയടിച്ചെന്നും നശിപ്പിച്ചെന്നും പ്രോസിക്യൂഷൻ ആരോപിച്ചിരുന്നു. കലാപത്തിനിടെയാണ് ജസ്വന്ത് സിം​ഗും മകനും കൊല്ലപ്പെട്ടത്. അക്രമികൾ വീട് കൊള്ളയടിക്കുകയും തീ വെയ്ക്കുകയും ചെയ്തു. ജസ്വന്ത് സിം​ഗിന്റെ ഭാര്യയാണ് പരാതി നൽകിയത്.