ഭാര്യയുടെ ചികിത്സയ്ക്ക് പണമില്ല; ഭര്ത്താവ് കുഞ്ഞിനെ വിറ്റു
മല്കന്ഗിരി: ഭാര്യയ്ക്കു മരുന്നു വാങ്ങാന് ഭര്ത്താവ് രണ്ടു മാസം പ്രായമായ മകനെ 700 രൂപയ്ക്കു വിറ്റു. ഒഡീഷയിലെ മല്കാന്ഗിരി ജില്ലയിലെ ചിട്ടപള്ളി ഗ്രാമത്തിലാണു സംഭവം. സുകുരാ മുദുലി ഭാര്യ ധുംസി മുദുലി എന്നിവരാണു മരുന്നു വാങ്ങാന് പണമില്ലാത്തതിനാല് സ്വന്തം കുഞ്ഞിനെ വിറ്റത്. 700 രൂപയ്ക്കാണു കുഞ്ഞിനെ മറ്റൊരു സ്ത്രീയ്ക്കു കൈമാറിയത്. ഇക്കഴിഞ്ഞ ഫിബ്രവരിയിലായിരുന്നു സംഭവം. എന്നാല്, ശനിയാഴ്ചയാണ് ഇക്കാര്യം പുറത്തറിഞ്ഞത്.
മാല്കങ്കിരി ജില്ലാ കളക്ടര് ഡി. പ്രശാന്ത് കുമാര് റെഡ്ഡിയുടെ നിര്ദേശപ്രകാരം ശിശുക്ഷേമ സമിതി നടത്തിയ അന്വേഷണത്തില്, ദാരിദ്ര്യം കാരണമാണ് കുഞ്ഞിനെ വിറ്റതെന്ന് വെളിവായി.
താന് ഭാര്യയ്ക്ക് മരുന്നും 50 കിലോ അരിയും വാങ്ങാനാണ് കുട്ടിയെ വിറ്റതെന്ന് സുകുര സി.ഡബ്ല്യു.സി.ക്ക് മൊഴിനല്കി.സുകുരയ്ക്കും കുടുംബത്തിനും ഇന്ദിര ആവാസ് യോജന പ്രകാരം വീട് നല്കാനും ബി.പി.എല്ലിലും മറ്റ് പദ്ധതികളും ഉള്പ്പെടുത്താനും നടപടിയെടുത്തതായി കളക്ടര് അറിയിച്ചു.
കുഞ്ഞിനെ നോക്കാന് സുകുരയ്ക്കും ഭാര്യക്കും ശേഷിയില്ലാത്തതിനാല് 'ആശ' വര്ക്കറുടെ വീട്ടില്തന്നെ ഇപ്പോള് കഴിയുമെന്നും അദ്ദേഹം പറഞ്ഞു.